Su Tidtu a Edsakat
21
Na guna tengab su Isa al-Masih na nailay nin su manga kawasa a 'bpagulug sa edsakat lu kanu 'bpagulugan sa kuleta kanu Suti a 'Bpagagaman. 2 Na nailay nin bun su miskinan a balu a babay a 'bpagulug bun sa dua lad a sinsiliu a kuleta.a 3 Na nia pidtalu nu Isa al-Masih na “Saben-sabenal a pedtalun ku sa lekanu i su miskinan a nia a balu na nia pan madakel i nakaulug'in lu kanu 'bpagulugan sa kuleta kumin kanu langun nilan. 4 Kagina su inenggay nilan na subela bu nu kakawasan nilan ugaid'a su miskinan a nia na inenggay nin su langun nu kauyagan nin.”Su Pantag kanu Kagubal'u Suti a 'Bpagagaman
5 Na aden ped a manga taw a pembibitiala pantag kanu sangat i kapia nin a manga watu enggu su inenggay nu manga taw a inibpalas kanu Suti a 'Bpagagaman. Ugaid'a nia pidtalu nu Isa al-Masih na 6 “Aden mauma a timpu a apia satiman na dala mailay nu lun a mamakapamaguntul a watu ka natalatantu i aden gemubal lun su langun nu entu ba.”
Su manga Tanda kanu Gay a Mauli
7 Na inidsan nu 'bpamangunut lun su Isa al-Masih sa “Gulu, kanu i kanggula kanu entu ba enggu ngin i tanda sa manggula den su entu?” 8 Nia inisawal'u Isa al-Masih na “Pangingati nu i dala makapasibay sa lekanu. Madakel i embuat a nia nilan edtalun na silan su Masih enggu nauma den su Gay na Harikiamat. Ugaid'a da kanu 'bpaginugut sa entu. 9 Na u makakineg kanu den sa embubunua enggu manga samuk, na da kanu magilek ka nasisita a manggula muna i entu ugaid'a dikena nia nin maena i entu den ba su kabangkit kanu dunia.”
10 Na pidtalu nin pan kanilan i “Embubunua pan su manga bangsa enggu embubunua pan su manga sultan. 11 Na maaden su manga linug a sangat i kabagel'in kanu madakel a dalepa enggu maaden bun su kanggutem taman sa temala sa mapasang a sakit su manga taw. Na maaden bun su pakatiawan-tiawan a manggula enggu kangagaipan a manga tanda a makabpun kanu kawang-kawangan. 12 Unan na kanggula kanu langun nu nia na mangasigkem kanu muna enggu pamungkaidanan kanu. Ipalad kanu lu kanu walay a pedsambayangan nu manga Yahudi taman sa ipabilanggu kanu. Na ipalad kanu bun kanu adapan nu manga sultan enggu kanu manga gubilnadul sabap sa laki. 13 Na sabap sa entu na makadsaksi kanu kanilan pantag sa laki. 14 Kagina ka maitu na di nu den 'bpelidui sa ginawa i kapagadil'u sa kapaninindeg'u kanu ginawa nu 15 ka saki demun i temutulu sa lekanu enggu menggay sa ilemu u ngin i dait a edtalun nu. Na dala makagaga edtindega sa lekanu atawa ka matu sa lekanu. 16 Na su manga lukes'u, manga suled'u, su manga pagali nu atawa ka su manga pakat'u na ipalad kanu nilan kanu manga kuntela nu enggu paimatayan nilan su ped sa lekanu. 17 Na sabap sa laki na kabensian kanu nu langun nu taw. 18 Ugaid'a saki i mataw sa lekanu, na apia salias kanu buk'u na da mabinasa lun. 19 Na sia kanu katigkel'u na malipuas kanu.”
Su Kabinasa kanu Awrusalim
20 Na pidtalu pamun nu Isa al-Masih i “Amaika mailay nu den su Awrusalim a nabalibet den na manga sundalu na katawan nu den i mangagan den su kabinasa lun. 21 Na su lu sa Yudia na dait a mamagayas den silan malalaguy lu kanu manga palaw. Na su langun menem'u lu kanu siudad na mamangawa den silan. Na su lu kanu 'bpangangawidan na di den lemudep kanu siudad 22 kagina entu den ba su manga gay a tidtu-tidtu a kasiksan ka lu den ba matuman su langun a kadtalu a inipayag sia kanu kitab. 23 Na duan-duan nin den su manga babay a magingay enggu papedsusu sa wata kanu entu ba a manga timpu ka su manga taw na temala den sa mapasang a kamalasayan enggu su lipunget'u Kadenan na makatingguma kanu nia ba a manga taw. 24 Na aden mamamatay na pali, su ped menem na masigkem taman sa madtapik lu kanu ped a manga dalepa. Na su Awrusalim na dakudaken den nu manga taw a dikena-Yahudi taman kanu timpu a kapupus'u kutika a inenggay nu Kadenan kanu manga taw a dikena-Yahudi.
Su Kauma nu Kaka nu Manusia
25 “Na maaden su manga masela a tanda a manggula sia kanu senang, sia kanu ulan-ulan enggu sia kanu manga bitun. Na mabulibug enggu kagilekan su langun nu bangsa sia kanu liwawaw na dunia sabap kanu dagus'u lagat enggu su kapendedsa nu bagel. 26 Na mangalunguk sa gilek'ilan su manga taw sa kapagitung'ilan kanu pakatingguma sia sa liwawaw na dunia kagina su langun nu aden bagel'in lu sa kawang-kawangan na mangakuyung den. 27 Entu pan ka mailay su Kaka nu Manusia a lu makasaleta kanu gabun a makauma sia sa dunia. Na mailay nu taw su kabarakat'in enggu su sigay nin. 28 Na amaika lemudsu den manggula su langun nu nia ba na tingada kanu den sa pulu enggu pakabagel'u i manggiginawa nu ka entu den ba i kauma nu kalipuas sa lekanu.”
Su Pakenalan pantag kanu Kayu a Igus
29 Na pidtalu pan nu Isa al-Masih kanilan su nia a pakenalan sa “'Gkalendem'u su kayu a igus enggu su manga ped pan a kayu. 30 Na amaika mailay nu den i 'bpeleteb menem su laun nin na katawan nu den i mangagan den su kabpanenang. 31 Na maitu bun ba u mailay nu den i manggula den su langun nu entu ba na katawan nu den i masupeg den su kapendatu nu Kadenan.
32 “Na saben-sabenal a pedtalun ku sa lekanu i natalatantu a di matag makadalung su manga taw kanu nia a timpu taman sa di pan manggula su langun nu entu ba. 33 Na madala den su langit enggu su lupa ugaid'a su kadtalu ku na di madala.
34 “Na ingati nu i masimpang kanu nu bilu bangkawat, su kandalangutan enggu su manga lidu na ginawa sa sagugunay a timpu ka basi kauman kanu sa maitu ba. Kagina su kauma nu entu ba a manga gay na di 'gkatekawan a mana bun su litag a pakatekaw demun pebpekas. 35 Na makatingguma i entu ba a gay kanu langun nu taw sia sa liwawaw na dunia. 36 Ugaid'a pangingat kanu kanu langun nu timpu, ipangeni-ngeni nu i enggan kanu sa bagel sa panun i kalipuas'u kanu langun nu nia ba u makatingguma den ka enggu kanu makaadap kanu Kaka nu Manusia.”