Su Pakenalan pantag kanu Patutuludu sa Pamumulanen a di Kasaligan
12
Daka linudsuan nu Isa al-Masih embitiala su manga mapulu nu 'bpamangurban enggu su manga gulu nu pangitaban taman den kanu 'gkangaunutan nu manga Yahudi sa ukit a manga pakenalan sa nia nin pidtalu na “Aden kun mama a namumulan sa ubas. Na inalad'in su entu enggu inumbalan nin sa lupitan na ubas enggu pinatindegan nin sa 'bpanandengan.a Entu pan ka inipatuludu nin kanu manga 'bpangangawid ka linemu sa mawatan a dalepa. 2 Na guna su nauma den su kapegkasabpet na sinemugu sekanin kanu ulipen nin lu kanu manga pinatuludu nin a 'bpangangawid asal'a makua nin kanilan su umun nin kanu pamumulanen nin. 3 Ugaid'a sinigkem'ilan su ulipen ka pinametay nilan taman sa pinauli nilan a dala nakua nin. 4 Na sinemugu menem sekanin 'bpaluman sa ulipen nin lu kanilan. Na su nia na pinametay nilan sia sa ulu enggu pinagkaya nilan pan. 5 Daka sinemugu menem sekanin 'bpaluman sa ulipen nin. Na su nia na inimatayan nilan. Na madakel pan i ped a sinugu nin, su ped kanu entu na pinametay nilan enggu su ped menem na inimatayan nilan. 6 Na aden pamun sakataw a nasama sa lekanin, su wata nin a mama a pinadtaya. Na guna su maitu na entu den ba i sinugu nin lu kanilan sa nia nin 'gkadtalu kanu ginawa nin na ‘Pagadatan nilan su wata ku a nia.’ 7 Ugaid'a su manga 'bpangangawid na endaw i kinailay nilan kanu wata nu kigkuan a pakauma na nia nilan pidtalu kanu uman i isa kanilan na ‘Sia kanu ka nia den su pebpusakan, imatayan tanu sekanin ka enggu tanu makua su ipebpusaka lun a nia.’ 8 Daka sinigkem'ilan su wata nu kigkuan kanu pamumulanen a entu ka inimatayan nilan entu pan ka inidtug'ilan lu kanu liu nu pamumulanan.9 “Na ngin basi i enggulan nu kigkuan kanu pamumulanen a entu? Na lemu sekanin ka pangimatayan nin su manga 'bpangangawid enggu ipatuludu nin sa ped su pamumulanen a entu a ubas. 10-11 Ngintu, da nu pamun mabatia su nakadalem kanu kitab a
‘Su watu a inendan nu manga panday na walay na entu bun ba su nabaluy a balapantag kanu langun nu watub nu walay.
Su Kadenan i migkahanda sa entu a nanggula.
Sangat a makagaip-gaip kanu mata nu uman i isa su entu a kahanda nu Kadenan’?”c
12 Daka kiugan semigkem'u manga mapulu nu 'bpamangurban enggu su manga gulu nu pangitaban taman den kanu 'gkangaunutan su Isa al-Masih kagina naimamanan nilan i silan i pedtumbuken nin kanu entu a pakenalan nin. Ugaid'a 'gkagilekan silan kanu madakel a taw tembu ginanatan nilan den sekanin.
Su Kinabatalu kanu Isa al-Masih makapantag kanu Kapembayad sa Buwis
13 Na sinemugu silan sa manga taw a lusud kanu lumpukan a Parisiyu enggu manga taw nu Hirud ka enggu nilan 'gkadulatan su Isa al-Masih sia kanu kadtalu nin. 14 Na guna den silan makauma na pidtalu nilan kanu Isa al-Masih i “Gulu, katawan nami i matidtu ka enggu di ka mapambidaya a taw. Dikena nengka 'bpagilayn su malatabat'u taw ugaid'a ibpamandu nengka su lalan kanu Kadenan sia luyud kanu bantang. Na ngintu, wagib sa lekitanu a manga Yahudi i mayad sa buwis kanu Sultand sa Ruma atawa ka dili? 15 Ngintu, dait ba a mayad tanu atawa ka dili?” Ugaid'a katawan nin i 'bpamagigiling bu silan daka nia nin pidtalu kanilan na “Nginan ka pembatalun aku nu? Pananggiti aku nu sia sa kuleta a sinsiliue ka ilayn ku.” 16 Daka pinananggitan nilan sekanin sa satiman. Na inidsan nin silan sa “Entain i kipalas sa nia enggu entain i kingala lun?” Na nia nilan inisawal na “Kanu Sultan sa Ruma.” 17 Na nia mambu pidtalu nu Isa al-Masih kanilan na “Inggay nu kanu Sultan su ngin i kanu Sultan enggu kanu Kadenan su ngin i kanu Kadenan.” Na sangat a nangagaip silan sa lekanin.
Su Kinabatalu nu manga Sadusiyu kanu Isa al-Masih makapantag kanu Kambibiag 'Bpaluman
18 Na aden manga taw a lusud kanu lumpukan a Sadusiyu a pedtalu sa dala kambibiag 'bpaluman nu namamatay. Na sinupegan nilan su Isa al-Masih ka inidsa nilan lun i 19 “Gulu, nia inisulat'u Nabi Musa sa lekitanu na amaika matay su mama a dala makamuliataw kanu kaluma nin na dait a pangaluman nu suled'in su balu nin a entu. Na su mambata nilan na mabaluy a wata nu suled'in a entu a minatay. 20 Na aden pitu kataw a edsusuled a mama. Na su kaka sa langun na nangaluma ugaid'a minatay sekanin a dala makamuliataw. 21 Daka pinangaluma nu ikadua a suled'ilan su balu nu suled'ilan a entu ugaid'a minatay bun sekanin a dala makamuliataw. Na maitu bun ba i nanggula nu ikatelu 22 taman kanu pitu kataw a entu a edsusuled ugaid'a minatay bun silan a dala makamuliataw. Nia mauli sa entu na minatay bun mambu su babay. 23 Na sia kanu kambibiag 'bpaluman nu namamatay na entain i kikaluma kanu babay a entu? Kagina nagkaluma nin langun su pitu kataw a entu a edsusuled.” 24 Na nia pidtalu nu Isa al-Masih kanilan na “Pakasibay kanu sabap sa di nu 'gkatuntayan su nakadalem kanu kitab enggu su kabarakat'u Kadenan. 25 Kagina kanu kambibiag 'bpaluman nu namamatay na dikena den 'bpangaluma su manga mama enggu dikena den 'bpangaluman su manga babay ka mana den silan manga malaikat lu kanu sulega. 26 Ugaid'a makapantag menem sa u embibiag 'bpaluman su namamatay na ngintu, dala nu pamun mabatia kanu Kitab a Inisulat'u Nabi Musa su kinadtalu nu Kadenan sa lekanin lu kanu pegkalaw-kalaw a kayu? Sa nia nin kadtalu na ‘Saki su Kadenan a pedsimban nu Ibrahim, Iskak enggu Yakub.’f 27 Su namamatayg na di den pakasimba kanu Kadenan ka su manga bibiag bu i pakasimba lun. Sangat a pakasibay kanu den a benal.”
Su Balapantag sa Langun na manga Kasuguan
28 Na aden mambu sinemupeg a gulu nu pangitaban. Na nakineg'in su kapendadalawana nilan taman sa nadsuliman nin i nasawal silan nu Isa al-Masih sa mapia. Na inidsan nin su Isa al-Masih sa “Ngin i balapantag kanu langun nu kasuguan nu Kadenan?” 29 Na nia inisumpat'u Isa al-Masih na “Nia balapantag sa langun na kasuguan na ‘Pakikineg kanu a manga taw sa Israil: Su Kadenan tanu a Mapulu na kaisa-isa nin bu. 30 Ikalimu nengka sekanin sa senep kanu atay nengka, senep kanu ginawa nengka enggu kanu itungan nengka taman den kanu langun nu 'gkagaga nengka.’h 31 Nia menem temundug na ‘Ikalimu nengka su ped'engka sa mana bun su kakalimu nengka kanu ginawa nengka.’i Dala den ped a kasuguan a lemawan pan kanu nia ba a manga kasuguan.” 32 Na nia pidtalu nu gulu nu pangitaban sa lekanin na “Gulu, nakasugat ka kanu pidtalu nengka a nan, benal a kaisa-isa nin bu su Kadenan, dala den salakaw pan. 33 Na su kakalimu sa lekanin sa senep sa atay, senep sa itungan enggu kanu langun nu 'gkagaga nengka taman sa kakalimu kanu pagubay sa mana bun kanu kakalimu sa ginawa na labi lawan pan i kapia nin kanu langun nu manga kurban enggu su manga ped pan a ipegkurban a pedtutungen.” 34 Daka guna madsuliman nu Isa al-Masih i nakasumpat sa mapia su gulu nu pangitaban a entu na pidtalu nin sa lekanin i “Dikena ka bun mawatan kanu kapendatu nu Kadenan.” Na da den ba a entu nakatika pan midsa sa lekanin.
Su Kadtalu nu manga Gulu nu Pangitaban pantag kanu Masih
35 Na kanu kabpamandu nu Isa al-Masih kanu manga taw lu kanu Suti a 'Bpagagaman na nia nin pidtalu na “Panun a entu ka nadtalu nu manga gulu nu pangitaban i ‘Su Masih na tupu nu Daud’? 36 Kagina su Daud demun i midtalu kanu kadtalu a nia a ebpun kanu Suti a Ruh sa
‘Pidtalu nu Kadenan a Mapulu kanu Mapulu ku i
“Ayan ka sia tampal kanu kawanan ku
taman sa pasugiuden ku su manga kuntela nengka kanu palad'u ay nengka.” ’j
37 Amaika su Daud ka nia nin kinatawag kanu Masih na Mapulu na panun basi a entu i kinadtupu nin lun?” Na 'gkalilinian gaid sekanin 'bpamakikineg'u madakel a taw lu.
Su Kinandaludaya nu manga Gulu nu Pangitaban kanu manga Balu
38 Na kanu kabpamandu nu Isa al-Masih na nia nin pidtalu na “Pangingati nu su manga gulu nu pangitaban a malilini lemambungk kanu kapendadalakaw nilan asal'a kapagadatan silan nu manga taw lu kanu manga padian. 39 Na nia nilan kiugan na makapagagayan silan lu kanu 'bpagagayanan nu manga mapulu lu kanu manga pedsambayangan tanu a manga Yahudi enggu lu kanu manga pegkakanduli. 40 Na 'bpamagakalan nilan su manga balu a babay asal'a maakup-akup'ilan su manga kaaden nu entu a manga balu. Na 'bpangeni-ngeni silan sa malendu asal'a makapailay nilan i balaagama silan. Na silan ba a entu i makatalima sa labi lawan den i kapasang'in a kasiksan.”
Su Kinaenggay nu Balu kanu Langun nu Aden sa lekanin
41 Daka nagagayan su Isa al-Masih lu kanu kasangulan nu 'bpagulugan sa kuleta lu kanu Suti a 'Bpagagaman ka pedsusulimanen nin su madakel a taw a 'bpagulug lu ba. Na madakel a kawasa i 'bpagulug lu sa madakel a kuleta. 42 Na aden sinemupeg a miskinan a balu a babay ka minulug sa dua lad a sinsiliu a kuleta.l 43 Daka tinawag'u Isa al-Masih su 'bpamangunut sa lekanin ka nia nin pidtalu kanilan na “Saben-sabenal a pedtalun ku sa lekanu i su miskinan a nia a balu na nia pan madakel i nakaulug'in lu kanu 'bpagulugan sa kuleta kumin kanu langun nu ped pan a 'bpagulug lu ba. 44 Kagina su inenggay nilan na subela bu nu kakawasan nilan ugaid'a su miskinan a nia na inenggay nin su langun nu aden sa lekanin a mana su langun nu kauyagan nin.”