Su manga Sinugu nu Isa al-Masih
10
Na ulian nu entu na namili su Mapulu a su Isa al-Masih sa pitupulu enggu dua a manga mama ka sinugu nin menem silan sa enggaga-dua kataw lu kanu manga dalepa a kahanda nin a 'bpagangayan nin. 2 Na nia nin pidtalu kanilan na “Su pedsabpeten na madakel den a benal ugaid'a paidu bu i gumagalebek. Kagina ka maitu na pangeni nu kanu kigkuan kanu pedsabpeten i semugu pan sekanin sa manga ped pan a manga gumagalebek kanu pedsabpeten nin. 3 Na ganat kanu den! Ugaid'a tanudi nu i pedsugun ku sekanu a mana manguda a manga bili-bili lu kanu manga taw a mana asu a pakagkaid. 4 Na da kanu edtatanggit sa 'bpanaguan sa kuleta atawa ka apia ngin a taguan maitu bun i ampis'a ay. Di nu den pedsalam su apia entain a madsumbak'u. 5 Na apia endaw i kaludepan nu a walay na salam'u su kigkuan lun sa ‘Assalamu Alaikum.’ 6 Na amaika malilini sa kalilintad su taw a pegkaleben lu na embarakat i entu kanilan. Ugaid'a amaika dili na di embarakat i entu kanilan. 7 Na apia entain i temalima sa lekanu na lu kanu den ba edtangen. Lu kanu den ba kan enggu inem sa endaw taman i maatul'ilan sa lekanu ka nanget man a matalima nu gumagalebek su sukay nin. Na da kanu den magalat-alat sa walay.8 “Apia entain i temalima sa lekanu a dalepa na kan nu i apia ngin i italagad'ilan sa lekanu. 9 Pagkapia nu su apia entain a pedsakit kanu entu ba a dalepa enggu edtalu nu kanilan i ‘Su kapendatu nu Kadenan na masupeg den a benal sa lekanu.’ 10 Ugaid'a apia endaw a dalepa i di temalima sa lekanu na lu kanu kanu manga lalan ka edtalu nu i 11 ‘Apia su libubuk kanu dalepa nu a nia a nakadeket kanu manga ay nami na pubpugen nami pamun sa amadan sa sungkang sa lekanu. Ugaid'a tanudi nu i nia, su kapendatu nu Kadenan na masupeg den a benal.’ 12 Na pedtalun ku sa lekanu i su entu ba a dalepa a da talima sa lekanu na labi a maugat i kukuman kanilan sia kanu Gay nu Harikiamat kumin kanu dalepa a Sudum.”
Su manga Siudad a da Edtaubat
13 Na nia nin pidtalu na “Duan-duan nu den a manga taw sa Kurasin enggu sekanu a manga taw sa Bitsaida!a Ka u mana bu man ka lu bu sa dalepa a Tair enggu Sidunb nanggula su kangagaipan a pinggula ku sa lekanu na nauget den man silan mimbalegkas sa saku enggu minayan kanu aw a tanda na kapedtaubat'ilan. 14 Ugaid'a labi a maugat i kukuman sa lekanu kumin kanu manga taw sa Tair enggu Sidun sia kanu Gay nu Harikiamat. 15 Sekanu menem a manga taw sa Kapurnaum na ngintu, nia nu kataw na pakasugkul kanu den sa langit? Dikena, ka lu kanu man makaidtug sa naraka!”
16 Pidtalu pan nu Isa al-Masih kanu manga pedsugun nin i “Apia entain i maginugut sa lekanu na saki bun i pinaginugutan nin. Na apia entain menem i kemias sa lekanu na inikias aku nin bun. Na apia entain i kemias sa laki na inikias'in bun su sinemugu sa laki.”
Su Mapia a Tudtulan nu manga Sinugu
17 Na guna makambalingan su pitupulu enggu dua a manga sinugu na sangat a 'gkangapia i ginawa nilan sa nia nilan 'gkangadtalu kanu Isa al-Masih na “Mapulu, apia su manga saitan na pakapaginugut sa lekami sabap kanu ingala nengka.” 18 Nia inisumpat'u Isa al-Masih kanilan na “Nailay ku a mana kilat a nakadadsang su Datu na Giadsal ganat sa sulega. 19 Ilay nu! Inenggan ku sekanu sa bagel sa kadakudak'u kanu manga nipay enggu ulang sa di kanu kagkaidan taman sa kalawanan nu su bagel'u Datu na Giadsal a kuntela nu. 20 Nia mauli sa entu na da kanu pedsisigalaw sabap kanu kinapaginugut'u manga saitan sa lekanu ugaid'a edsisigalaw kanu sabap sa nakasulat den su manga ngala nu lu sa sulega.”
Su Kinagalaw nu Isa al-Masih
21 Na kanu entu bun ba a manga kutika na sangat a pinagkagalaw nu Suti a Ruh su Isa al-Masih. Na nia nin pidtalu na “Hu Ama a Mapulu a pendatu sa sulega enggu dunia, pebpugin ku seka kagina inipagena nengka su langun nu entu kanu manga taw a balaitungan enggu mangategel sia sa dunia ugaid'a lu nengka inipayag kanu manga taw a da gaid sabut'in. Benal man Ama a nia man ba i pakasuat sa leka.”
22 Na pidtalu pan nu Isa al-Masih i “Saki i tinapenayan nu Ama ku kanu langun-langun. Dala isa bu a mataw u entain su Wata nia tabia na su Ama. Dala bun isa a mataw u entain su Ama nia tabia na su Wata enggu su manga taw a mapamili nu Wata a payagan nin lun.”
23 Na sinangulan nu Isa al-Masih su 'bpamangunut lun ka pidtalu nin sa dala ped a nakakineg lun i “Sangat den i kapia nin sa lekanu ka nailay na mata nu su ngin i 'gkailay nu saguna. 24 Ka nia ku madtalu sa lekanu na madakel kanu manga nabi enggu manga datu i 'gkapaginagkay nilan i kailay nilan kanu ngin i 'gkailay nu ugaid'a dala nilan mailay enggu kakineg'ilan kanu ngin i 'gkakineg'u ugaid'a dala nilan makineg.”
Su Pakenalan pantag kanu Taw sa Samaria
25 Na aden isa a gulu nu pangitaban nu manga Yahudi a sinemupeg kanu Isa al-Masih ka batalun nin sekanin sa nia nin lun inidsa na “Gulu, ngin i dait a enggulan ku asal'a matalima ku su uyag-uyag a da taman nin?” 26 Nia inisawal'u Isa al-Masih na “Ngin i nakadalem sia kanu kitab? Ngin i natuntayan nengka lun?” 27 Na nia inisumpat'u gulu na “‘Ikalimu nengka su Kadenan a Mapulu sa senep sa atay nengka, senep kanu ginawa nengka enggu kanu itungan nengka taman den kanu langun nu 'gkagaga nengka’ enggu ‘Ikalimu nengka su ped'engka sa mana bun kanu kakalimu nengka kanu ginawa nengka.’ ”c 28 Nia pidtalu nu Isa al-Masih na “Nakasugat su sawal'engka. Na entu ba i enggula ka, ka enggu nengka matalima su uyag-uyag a da taman nin.” 29 Kagina ka pegkiugan nu gulu nu pangitaban a itindeg'in su ginawa nin na inidsa nin menem kanu Isa al-Masih i “Entain ba i nadtalu a ped ku?”
30 Na nia inisumpat'u Isa al-Masih sa ukit a pakenalan na “Aden mama a 'bpelu sa Yariku ebpun sa Awrusalim. Na pinagayanan sekanin nu manga tulisan na linuwasan nilan enggu pinametay nilan taman sa initagak'ilan a sama bu da matay. 31 Na natabu i aden pedsagad a 'bpangurban kanu entu ba a lalan. Na guna nin mailay su entu a mama na makin nin sinibayan. 32 Na maitu bun ba aden menem minukit a pedtiakap kanu Suti a 'Bpagagaman. Na pidtulikan nin bu su entu ba a mama enggu sinibayan nin. 33 Na aden menem 'bpagukit a mama a taw sa Samariad ugaid'a guna nin mailay su mama a entu na sangat a nalat i nanam'in lun. 34 Na inubay nin ka binubusan nin sa lana enggu alak entu pan ka binausan nin su manga pali nu mama. Na inilulan nin kanu ayam'in ka pidtapik'in lu kanu walay a pembayadan a pedtulugan ka lu nin ba tiniakapan. 35 Na kanu kinagkapita na binayadan nin sa dua kadinarius su kigkuan kanu walay a entu. Nia nin pan pidtalu kanu kigkuan na ‘Tiakapi ka sekanin ka endaw i di ganapan nu nia ba a kuleta na bayadan ku bu sa leka kanu kambalingan ku sia.’ ”
36 Na nia inidsa nu Isa al-Masih kanu gulu na “Entain kanu telu kataw a entu a minukit i tidtu a tagapeda nu mama a pinagayanan nu manga tulisan?” 37 Na nia inisumpat'u gulu nu pangitaban na “Su nalimu sa lekanin.” Daka nia pidtalu nu Isa al-Masih sa lekanin na “Maitu bun ba i enggula ka, ilingi ka su entu.”
Su Kinakakap'u Isa al-Masih kani Marta enggu Mariam
38 Na kanu kabpelalakaw nu Isa al-Masih enggu su 'bpamangunut lun na nakauma silan sa manga kawalayan. Na aden lu babay a bedtuan sa Marta a napatalus kanilan lu kanu walay nin. 39 Na aden ali nin a bedtuan sa Mariam a lu demun 'bpagagayan kanu ubay nu ay nu Isa al-Masih ka 'bpakikinegen nin su kangadtalu nin. 40 Ugaid'a madakel a benal i penggalebeken ni Marta tembu di den pakatuganul kanu penggalebeken nin. Na minubay sekanin ka pidtalu nin kanu Isa al-Masih i “Mapulu, da demun sa leka i pinadtaday aku na ali ku a nan sa kabpamagatul sia? Edtalu ka pan a nan sa lekanin i tabangan aku nin.”