Su Isa al-Masih enggu su Nabi Yahiya a Nanalawat
11
Na guna den mapasad'u Isa al-Masih manutuma su sapulu enggu dua a 'bpamangunut lun na ginemanat lu ka tinemalus kanu kabpamandu nin enggu kabpangusiat'in kanu manga dalepa bun lu.2 Na kanu entu a timpu na lu sa bilangguan su Nabi Yahiya. Na nakineg'in su pantag kanu manga penggalebeken nu Masih. Daka sinugu nin lu kanu Isa al-Masih su 'bpamangunut lun 3 ka ipebpagidsa nin kanilan i “Ngintu, seka ba su inibpasad'u Kadenan a pakaumaa atawa ka mamamati kami pan sa ped?” 4 Na nia inisumpat'u Isa al-Masih kanilan na “Embalingan kanu sa lekanin ka edtalu nu lun u ngin i nakineg'u enggu nailay nu. 5 Namakailay su di pamakailay, namakalakaw su di pamakalakaw, nasuti su 'bpamedsakit sa debpig, nakakineg su di pamakakineg, nakambibiag su namamatay enggu nakapangusiat kanu manga miskinan su Mapia a Tutuma.b 6 Na mapia den a benal kanu taw u dala kandua-dua nin sa kapaginugut pantag sa laki.”
7 Na guna makaganat su 'bpamangunut kanu Yahiya na linemudsu edtalu-talu su Isa al-Masih pantag kanu Yahiya lu kanu madakel a taw sa nia nin pidtalu na “Su kinalu nu a entu kanu tawan-tawan a dalepa,c na ngin i 'gkapanganganay nu a mailay nu lu? Dikena nia nu 'gkapanganganay a mailay nu lu su taw a malubay i tindeg'in a mana tiugaw a 'gkasugat'a sambel. 8 Ugaid'a ngin basi i pegkiugan nu 'bpagilay lu kanu kinalu nu? Di nu bun pegkiugan 'bpagilay su mama a mimbalegkas sa balaalaga. Tanudi nu, ka su taw a mimbalegkas sa balaalaga na lu nu mailay kanu tulugan nu manga sultan. 9 Ka nia nu man pegkiugan 'bpagilay kanu kinalu nu na isa a nabi. Uway, benal a nabi sekanin ugaid'a nia ku madtalu sa lekanu na minuna pan sekanin sa nabi 10 ka sekanin ba a nia su nakadalem kanu kitab a
‘Ilay ka! Paunan ku sa leka su pedsugun ku ka enggu nin mapagadil su lalan nengka.’d
11 Na saben-sabenal a pedtalun ku sa lekanu i dala nakalawan sa kabalapantag kanu Yahiya a Nanalawat sa kanu langun nu pimbata sia sa dunia. Ugaid'a apia ka maitu na su kabalapantag'u Yahiya na dala makatimbang kanu kabalapantag'u mababa den sa langun a taw a nalusud kanu kapendatu nu Kadenan. 12 Na iganat kanu timpu nu kabpanalawat'u Yahiya taman den saguna na 'bpangiseg bun su kapendatu nu Kadenan enggu aden manga taw a 'bpaginapasen nilan i kalusud'ilan lun. 13 Ka su inipayag'u langun nu manga nabi enggu su kasuguan nu Musa na sia pan linemudsu i kinatuman lun sa kanu kinauma nu Yahiya. 14 Na amaika 'bpaginugutan nu su kadtalu nu manga nabi na katuntayan nu i su Yahiya den ba a nia su Nabi Ilias a nalabit a pakauma. 15 Na su entain i aden tangila nin a pakakineg na makikineg sa mapia.
16 “Ugaid'a ngin basi i kalagidan ku kanu manga taw a nia sa saguna a timpu? Mana silan manga wata a pendalemet lu kanu plasa a ibpananawag'ilan kanu manga ped'ilan i 17 ‘Pidtambulan nami sekanu na dala kanu edsagayan. Na guna nami menem sekanu edsengali sa sengal pantag sa kapatay na dala kanu bun pamanguliang.’ 18 Na maitu ba i kalagidan ku kanilan, na mana kanu manga wata ba a entu, kagina guna a nia makauma su Yahiya a tatap pebpuasa enggu dala inem sa makalangut na nia nilan lun pidtalu na ‘Inasukan sekanin na saitan.’ 19 Na guna menem makauma su Kaka nu Manusia sia sa dunia a pegkan enggu 'bpaginem na nia nilan menem pidtalu lun na ‘Ilay nu ba i mama a nia, busawn enggu palalangut. Nia nin pakat na su manga 'bpangubela sa buwis enggu su dikena balaagama!’e Ugaid'a su ilemu nu Kadenan na mailay man i kabantang'in sia kanu galebekan nu entain i tinemalima lun.”
Su manga Siudad a da Edtaubat
20 Na dinaway nu Isa al-Masih su manga siudadf a pinggalebekan nin sa madakel a kagaipan kagina apia ka maitu na da bun silan edtataubat. 21 Na nia nin pidtalu na “Duan-duan nu den a manga taw sa Kurasin enggu sekanu a manga taw sa Bitsaida! Ka u mana bu man ka lu bu sa dalepa a Tair enggu Sidung nanggula su kangagaipan a pinggula ku sa lekanu na nauget den man silan mimbalegkas sa saku enggu minayan kanu awh a tanda na kapedtaubat'ilan. 22 Ugaid'a pedtalun ku sa lekanu i labi a maugat i kukuman sa lekanu kumin kanu manga taw sa Tair enggu Sidun sia kanu Gay nu Harikiamat. 23 Sekanu menem a manga taw sa Kapurnaum na ngintu, nia nu kataw na pakasugkul kanu den sa langit? Dikena, ka lu kanu man makaidtug sa naraka! Ka u mana bu man ka lu bu sa dalepa a Sudum nanggula su kangagaipan a pinggula ku sa lekanu na basi sampay saguna na sia pamun su entu a dalepa. 24 Ugaid'a pedtalun ku sa lekanu i labi a maugat i kukuman sa lekanu kumin kanu manga taw sa dalepa a Sudum sia kanu Gay nu Harikiamat.”
Su Kapapangintelenen nu Isa al-Masih kanu manga Taw a Pakanasisita lun
25 Na kanu entu ba a timpu na nangeni-ngeni su Isa al-Masih sa nia nin pidtalu na “Hu Ama a Mapulu a pendatu sa sulega enggu dunia, pebpugin ku seka kagina inipagena nengka su langun nu entu kanu manga taw a balaitungan enggu mangategel sia sa dunia ugaid'a lu nengka inipayag kanu manga taw a da gaid sabut'in. 26 Benal man Ama a nia man ba i pakasuat sa leka.”
27 Na pidtalu pan nu Isa al-Masih i “Saki i tinapenayan nu Ama ku kanu langun-langun. Dala isa bu a mataw kanu Wata nia tabia na su Ama. Dala bun isa a mataw kanu Ama nia tabia na su Wata enggu su manga taw a mapamili nu Wata a payagan nin lun.”
28 Na pidtalu bun nu Isa al-Masih i “Langun nu a 'gkangalugat enggu mangaugat i 'bpananggiten nin na sia kanu sa laki ka papangintelenen ku sekanu. 29 Talima nu su ingkuli a ibpangenggay ku sa lekanu enggu tuntut kanu sia sa laki ka saki na malemek i palangay ku enggu mababa i muletad ku taman sa makapangintelenen man su ginawa nu. 30 Kagina malemu 'bpananggiten su ingkul a ibpangenggay ku enggu mapegkag sa lekanu i kapananggit'u lun.”