Su Salig'u Kapitan nu Sundalu a Dikena-Yahudi
7
Guna mapasad'u Isa al-Masih edtalu i entu kanu langun nu taw na linemu sekanin sa Kapurnaum. 2 Na aden lu kapitan nu sundalu na Ruma a aden panunugun nin a ipegkalimu nin a pebpaya den. 3 Guna makineg'u kapitan su pantag kanu Isa al-Masih na pinasuguan nin su Isa al-Masih kanu 'gkangaunutan nu manga Yahudi sa lemu pan su Isa al-Masih sa lekanin ka enggu nin makapagkapia su panunugun nin. 4 Na pibpawangan nilan mambu su Isa al-Masih ka pinamagayukan nilan sa lemu pan sekanin sa nia nilan pidtalu na “Su nia a taw sa Ruma na dait bun a kadtabangan nengka 5 ka ipegkalimu nin su manga Yahudi taman sa napaumbal sekanin sa walay a pedsambayangan tanu.” 6 Guna su maitu na minunut mambu su Isa al-Masih kanilan.Na guna su pakasiken den silan kanu walay na inipasumbak'u kapitan nu sundalu kanu manga pakat'in su Isa al-Masih ka inipadtalu nin kanilan i “Mapulu, di ka den 'bpagangga i ginawa nengka ka di aku a benal makadait a 'bpawangan nengka pan i walay ku 7 ka apia man su kaadap ku sa leka na di aku den makadait. Ugaid'a edtalun nengka bu man i 'gkapia su panunugun ku na 'gkapia den sekanin. 8 Na katawan ku i entu ka apia saki na aden pan mapulu ku a pedsugu sa laki enggu aden bun manga sundalu ku a saki i pegkakataw lun, na amaika edtalun ku kanu isa kanilan i ‘Lu ka’ na lemu sekanin, u edtalun ku menem kanu ped i ‘Sia ka’ na semia sekanin. Na u edtalun ku menem kanu ulipen ku i ‘Enggalebek ka i nia’ na enggalebeken nin.”
9 Na guna makineg'u Isa al-Masih su entu na nagaip sekanin. Na linengian nin su madakel a taw a pedtatanggunut lun ka nia nin nadtalu na “Edtalun ku sa lekanu i apia sakataw sia sa Israil na dala aku pamun makailay sa maya ba i kasela na salig'in.” 10 Na guna embalingan kanu walay su manga sinugu nu kapitan nu sundalu na migkapia den su panunugun a entu a pebpaya.
Su Kinapambibiag'u Isa al-Masih kanu Wata nu Balu a Babay
11 Na ulian nu entu na linemu menem su Isa al-Masih kanu dalepa a bedtuan sa Nain a kaped'in su 'bpamangunut sa lekanin enggu su madakel a taw a pedtatanggunut lun. 12 Na kanu kapegkauma nilan kanu bengawan nu dalepa na 'gkadsumbak'ilan i kabpelebeng kanu tunggal a wata a mama nu balu a babay a kaped'in su madakel a taw. 13 Na guna mailay nu Mapulu a su Isa al-Masih su ina nu wata na sangat a nalat i ginawa nin lun sa nia nin pidtalu na “Babu, da ka den 'bpaguguliang.”
14 Na inubay nu Isa al-Masih su binetadan kanu bangkay ka inami nin, saleta mambu na su manga pembantial lun na mibpalen silan. Na nia nin pidtalu kanu minatay na “Datu, pedsugun ku seka sa embangun ka.” 15 Daka mimbangun mambu su minatay enggu nakadtalu. Na entu pan ka initapenay nu Isa al-Masih kanu ina nin. 16 Na sangat a nangagilekan su manga taw taman sa napugi nilan su Kadenan sa nia nilan nadtalu na “Nakauma den sa lekitanu su barakat a nabi” enggu “Tinabangan nu Kadenan su manga taw nin.” 17 Na su makapantag a nia kanu Isa al-Masih na pakapayapat den kanu lusud'u Yudia taman den kanu embala-bala a dalepa lu.
Su Kinapaidsa nu Yahiya a 'Bpanalawat lu kanu Isa al-Masih
18 Na su 'bpamangunut kanu Yahiya a 'Bpanalawat na pidtalu nilan kanu Yahiya su langun nu entu ba a nanganggula. 19 Daka tinawag'u Yahiya su dua kataw kanu 'bpamangunut lun ka sinugu nin lu kanu Isa al-Masih ka ipebpagidsa nin kanilan i “Ngintu, seka ba su inibpasad'u Kadenan a pakauma atawa ka mamamati kami pan sa ped?” 20 Na ginemanat den mambu silan, na guna silan makauma kanu Isa al-Masih na pidtalu nilan lun i “Sinugu kami nu Yahiya a 'Bpanalawat ka ipebpagidsa nin u ‘Ngintu, seka ba su inibpasad'u Kadenan a pakauma atawa ka mamamati kami pan sa ped?’ ”
21 Na kanu entu bun ba a kutika na madakel i pinagkapia nu Isa al-Masih a 'bpamedsakit. Pinaawa nin su manga saitan a minasuk kanu manga taw enggu pinailay nin su manga di pamakailay. 22 Na nia inisumpat'u Isa al-Masih kanu sinugu a entu nu Yahiya na “Embalingan kanu sa lekanin ka edtalu nu lun u ngin i nailay nu enggu nakineg'u. Namakailay su di pamakailay, namakalakaw su di pamakalakaw, nasuti su 'bpamedsakit sa debpig, nakakineg su di pamakakineg, nakambibiag su namamatay enggu nakapangusiat kanu manga miskinan su Mapia a Tutuma. 23 Na mapia den a benal kanu taw u dala kandua-dua nin sa kapaginugut pantag sa laki.”
24 Na guna makaganat su 'bpamangunut kanu Yahiya na linemudsu edtalu-talu su Isa al-Masih pantag kanu Yahiya lu kanu madakel a taw sa nia nin pidtalu na “Su kinalu nu a entu kanu tawan-tawan a dalepa, na ngin i 'gkapanganganay nu a mailay nu lu? Dikena nia nu 'gkapanganganay a mailay nu lu su taw a malubay i tindeg'in a mana tiugaw a 'gkasugat'a sambel. 25 Ugaid'a ngin basi i pegkiugan nu 'bpagilay lu kanu kinalu nu? Di nu bun pegkiugan 'bpagilay su mama a mimbalegkas sa mapulu i alaga nin. Tanudi nu, ka su taw a mimbalegkas sa mapia enggu mapia a benal i kabpaguyag-uyag'in na lu nu mailay kanu tulugan nu manga sultan. 26 Ka nia nu man pegkiugan 'bpagilay kanu kinalu nu na isa a nabi. Uway, benal a nabi sekanin ugaid'a nia ku madtalu sa lekanu na minuna pan sekanin sa nabi 27 ka sekanin ba a nia su nakadalem kanu kitab a
‘Ilay ka! Paunan ku sa leka su pedsugun ku ka enggu nin mapagadil su lalan nengka.’a
28 Edtalun ku sa lekanu i dala nakalawan sa kabalapantag kanu Yahiya sa kanu langun nu pimbata sia sa dunia. Ugaid'a apia ka maitu na su kabalapantag'u Yahiya na dala makatimbang kanu kabalapantag'u mababa den sa langun a taw a nalusud kanu kapendatu nu Kadenan.”
29 Na guna makineg'u langun nu manga taw lu su entu apeg den nu manga 'bpangubela sa buwis na tinalima nilan su kadtalu nu Kadenan. Na su manga taw a nia na nakapasalawat den silan kanu Yahiya. 30 Ugaid'a su manga taw a lusud kanu lumpukan a Parisiyu enggu su manga gulu na pangitaban na da nilan talima su kahanda nu Kadenan enggu da bun silan pasalawat kanu Yahiya.
31 Pidtalu pamun nu Isa al-Masih i “Ngin basi i kalagidan ku kanu manga taw a nia sa saguna a timpu? Ngin basi i pagidsan nilan? 32 Mana silan manga wata a pendalemet lu kanu plasa a ibpananawag'ilan kanu manga ped'ilan i ‘Pidtambulan nami sekanu na dala kanu edsagayan. Na guna nami menem sekanu edsengali sa sengal pantag sa kapatay na dala kanu bun pamanguliang.’
33 “Na maitu ba i kalagidan ku sa lekanu, na mana kanu manga wata ba a entu kagina guna a nia makauma su Yahiya a Nanalawat a tatap pebpuasa enggu dala inem sa makalangut na nia nu lun pidtalu na ‘Inasukan sekanin na saitan.’ 34 Na guna menem makauma su Kaka nu Manusia sia sa dunia a pegkan enggu 'bpaginem na nia nu menem pidtalu lun na ‘Ilay nu ba i mama a nia, busawn enggu palalangut. Nia nin pakat na su manga 'bpangubela sa buwis enggu su dikena balaagama!’ 35 Ugaid'a su ilemu nu Kadenan na mailay man su kabantang'in sia kanu galebekan nu langun nu namedtalima lun.”
Su Kinalu nu Isa al-Masih kanu Walay nu Taw a Lusud kanu Lumpukan a Parisiyu
36 Na aden taw a lusud kanu lumpukan a Parisiyu a bedtuan sa Simiun a minenggat kanu Isa al-Masih sa lu pan keman kanu walay nin. Na minunut mambu sa lekanin su Isa al-Masih. 37 Na lu ba kanu dalepa a entu na aden pegkaleben a babay a sundal.b Na sabap sa nakineg'in i lu pegkan su Isa al-Masih kanu walay nu taw a lusud kanu lumpukan a Parisiyu na linemu sekanin a nananggit sa kamutan a lana a inibetad sa taguan a bedtuan sa alabastru. 38 Na lu sekanin midtindeg kanu ubay nu Isa al-Masih a masupeg kanu ay nin. Na 'bpaguguliang sekanin taman sa 'gkalumes den nu lu nin su ay nu Isa al-Masih. Na pebpunasan nin kanu buk'in su ay nu Isa al-Masih enggu 'bpaniumen nin taman sa pembubusan nin pan sa kamutan.
39 Na guna mailay nu minenggat a entu sa lekanin a lusud kanu lumpukan a Parisiyu su entu na nia nadtalu nu ginawa nin na “Amaika tidtu-tidtu a nabi i mama a nia na katawan nin u entain i babay a nia a 'bpagami sa lekanin enggu su ukit'u uyag-uyag'in.” 40 Daka nia pidtalu nu Isa al-Masih na “Simiun, aden pedtalun ku sa leka.” Nia nakasumpat'i Simiun na “Ngintu ba? Edtalu ka sa laki, Gulu.”
41 Na nia pidtalu nu Isa al-Masih na “Aden dua kataw a minutang sa kuleta lu kanu 'bpangutangan. Na su sakataw na minutang sa lima gatus a dinarius,c na su sakataw menem na limapulu a dinarius. 42 Na guna su di den silan pakabayad kanu utang'ilan na da den silan pabayada nu nautangan nilan. Na entain basi kanilan dua i labi a mapailay sa kakalimu sa lekanin?” 43 Nia inisumpat'i Simiun na “Kalangan ku lun na su masela bun i nautang'in.” Na nia pidtalu nu Isa al-Masih na “Nakasugat ka.” 44 Daka linengian nin su babay enggu pidtalu nin kani Simiun i “Simiun, 'gkailay nengka i babay a nia? Pinasia aku nengka kanu walay nengka ugaid'a da aku nengka demun kaenggi sa ig a makagagas ku kanu ay ku. Ugaid'a sekanin na penggagasan nin kanu lu nin su ay ku enggu pebpunasan nin kanu buk'in. 45 Da aku nengka bun masakaw sa sium ugaid'a sekanin na iganat sa kinauma nin na da den pinda na kapedsium'in kanu ay ku. 46 Da nengka bun kabubusi sa lana su ulu ku ugaid'a sekanin na linapat'in mubus sa lana a mamut su ay ku. 47 Na nia ku madtalu sa leka na su kinapailay nin sa tidtu-tidtu a kakalimu sa laki na amadan sa sekanin na madakel i kabaladusan nin a naampun. Ugaid'a su paidu bu i kinaampun lun na paidu bun mambu i kapailay nin sa limu.”
48 Na nia pidtalu nu Isa al-Masih kanu babay na “Su kabaladusan nengka na inampun den.” 49 Na su manga kaped'in pegkan lu na nia nilan 'gkangadtalu na “Entain i mama a nia a pakapangampun kanu kabaladusan?” 50 Ugaid'a pidtalu pan nu Isa al-Masih kanu babay i “Su salig'engka i napambaya-baya sa leka, na uli ka den sa malilintad.”