Su Pantag kanu Gay nu Kabpangintelenen
6
Na kanu Gay nu Kabpangintelenen na minukit su Isa al-Masih lu kanu inawidan a bantad. Na nangetes sa tiugkayan na bantad su 'bpamangunut lun enggu inukad'ilan kanu lima nilan ka kinan nilan. 2 Daka ped kanu manga taw a lusud kanu lumpukan a Parisiyu i midtalu sa “Nginan ka penggulan nu i nan? Di a benal i nan 'gkaalus kanu Gay nu Kabpangintelenen.”3 Na nia inisumpat'u Isa al-Masih kanilan na “Ngintu besen, da nu pamun mabatia kanu kitab u ngin i pinggula nu Daud kanu timpu a 'gkagutem sekanin apeg'u manga tagapeda nin? 4 Na linemudep su Daud lu kanu walay a pedsimban kanu Kadenan ka kinan nin su pan a inigkurban kanu Kadenan a inenggay sa lekanin. Na di a benal 'gkaalus a kanen nin su entu ka nia bu alus a makakan kanu entu na su 'bpamangurban. Na pidsan ka maitu na inenggan nin pan su manga tagapeda nin.” 5 Na daka pidtalu nin pan kanilan i “Su Kaka nu Manusia na apia sia kanu Gay nu Kabpangintelenen na sekanin i Mapulu.”
Su Mama a Migkipes i Sabala a Lima nin
6 Na kanu Gay bun nu Kabpangintelenen na linemu sekanin kanu pedsambayangan nu manga Yahudi ka 'bpamandu sekanin. Na aden lu mama a migkipes i kawanan a lima nin. 7 Na pedtulikan nu manga gulu nu pangitaban enggu su manga taw a lusud kanu lumpukan a Parisiyu su Isa al-Masih ka pedsipatan nilan u amaika pagkapian nin su mama a entu kanu Gay nu Kabpangintelenen ka enggu aden makasendit'ilan sa lekanin. 8 Ugaid'a 'gkatawan bun nu Isa al-Masih su manga kahanda nilan. Na nia nin pidtalu kanu mama a migkipes i lima nin na “Edtindeg ka kanu luk'u manga taw.” Guna su maitu na pinggula den mambu nu mama a entu su pidtalu nu Isa al-Masih.
9 Na nia pidtalu nu Isa al-Masih kanilan na “Ngin i kalangan nu lun i 'gkaalus kanu Gay nu Kabpangintelenen, kanggula sa mapia atawa ka kanggula sa mawag; kalipuas kanu umul'u taw atawa ka kabinasa lun?”
10 Na pinangingilay nin silan langun ka nia nin pidtalu kanu mama a entu na “Betel ka i lima nengka a nan!” Na binetel'in mambu taman sa migkapia su lima nin. 11 Guna su maitu na miniseg i sakit'a ginawa nilan kanu Isa al-Masih taman sa mimbibitiala silan u panun i pakaidan nilan sa lekanin.
Su Kinapamili kanu Sapulu enggu Dua a 'Bpamangunut kanu Isa al-Masih
12 Na aden isa a gay a tinemakedeg su Isa al-Masih kanu palaw ka nangeni-ngeni. Na nalalamagan na nangeni-ngeni bu sekanin kanu Kadenan. 13 Guna su mapita den na tinawag'in su 'bpamangunut sa lekanin ka pinamili nin su sapulu enggu dua a pinggungalanan nin sa sinugu. Na nia ba su manga napamili nin: 14-15 Si Simiun a binedtuan nin bun sa Pitru, si Anduk a suled'i Simiun Pitru, si Yakub enggu si Yuhan, si Pilipus enggu si Bintulumi, si Mataya,a si Tumas enggu si Yakub a wata ni Alpayus, si Simiun a 'bpaninindeg kanu dalepa, 16 si Yahuda a wata ni Yakub enggu si Yahuda Iskalia a temipu kanu Isa al-Masih.
Su Kapianan nu Kamiskin enggu su Kawagan nu Kakawasa
17 Guna embaba su Isa al-Masih kanu palaw enggu su manga kaped'in na lu silan midtaman kanu maulad a kadatalan. Na madakel kanu 'bpamangunut sa lekanin i lu apeg den nu madakel a taw a ganat sa Yudia enggu Awrusalim taman den kanu manga dalepa a lu tampal sa dedsan nu lagat sa Tair enggu Sidun. 18 Na linemu su entu a manga taw asal'a makineg'ilan su panduan nu Isa al-Masih enggu makapagkapia su sakit'ilan. Na pinagkapia nin bun su manga taw a inasukan na saitan. 19 Na sabap kanu kabarakat'in na 'bpagapasen nu langun nu taw lu i maami nilan sekanin kagina langun na 'bpagami lun na pegkapia.
20 Na linengian nin su 'bpamangunut sa lekanin ka nia nin pidtalu na
“Mapia gaid i sekanu a nan a manga miskinan
ka malusud kanu kanu kapendatu nu Kadenan.
21 Na mapia den a benal i sekanu a 'gkangagutem sa saguna
ka pakausugan kanu nu Kadenan.
Maitu kanu bun a 'bpamanguliang
ka padtatawan kanu nu Kadenan.
22 “Na mapia den a benal sa lekanu amaika kabensian kanu nu manga taw, ikias kanu nilan taman sa pagkayan kanu nilan enggu bedtuan kanu sa daluaka sabap kanu salig'u kanu Kaka nu Manusia. 23 Ka maya bun ba i pinakaidan nu manga kalukesan nu entu a manga taw kanu manga nabi. Na sangat a enggalaw-galaw kanu den ka masela a benal i balas'u lu sa sulega.
24 “Ugaid'a duan-duan nin den su manga taw a kawasa
ka naipus'ilan den su kapianan nilan sia sa dunia.
25 Duan-duan nin den su manga taw a 'gkangausugan a benal
ka silan menem i mangagutem.
Duan-duan nin bun su manga taw a 'gkangapia a benal i ginawa nin
ka silan menem i mamanguliang.
26 Duan-duan nin den su manga taw a 'bpamedtan a benal'u madakel a taw
ka maya bun ba i pinakaidan nu manga kalukesan nilan kanu manga 'bpenabi-nabi.
Su Kakalimu kanu Kuntela
27 “Ugaid'a pakikineg'u sa mapia su pedtalun ku sa lekanu, ikalimu nu su kuntela nu. Tabangi nu sa mapia su 'gkabensi sa lekanu. 28 Ipangeni-ngeni nu i palihalan nu Kadenan su manga taw a pedsinta sa lekanu sa mawag. Na ipangeni-ngeni nu bun su apia entain a papegkapasang sa lekanu. 29 Amaika aden temebpi kanu bala a pipi nengka na ilengi nengka pamun su sabala. Na u aden menem kemua kanu lambung'engka na inggay nengka pamun su balegkas'engka. 30 Na apia entain i mangeni sa leka na enggi ka. Na u kuan menem su tamuk'engka na di ka den kemua 'bpaluman. 31 Nia nu enggula kanu ped'u na u ngin i kalinian nu a enggulan nu ped'u sa lekanu.
32 “Na amaika nia nu bu ikalimu na su taw a malimu sa lekanu na dala balas a makua nu sa entu. Ka apia su manga baladusa na ikalimu nilan bun su malimu kanilan. 33 Na amaika nia nu bu 'bpia-pianan na su taw a minggalebek sa leka sa mapia na dala balas a makua nu lun. Ka apia su manga baladusa na maitu bun ba i penggulan nilan. 34 Na amaika nia nu bu pasembayn su taw a katawan nu i makauli bun su pedsembayan nin na dala balas a makua nu lun. Ka apia su taw a manga baladusa na papedsembay bun kanu manga taw a baladusa ka 'gkatawan nin bun i makambalingan bun sa lekanin su sinembayan lun. 35 Ugaid'a nia man wagib na ikalimu nu su kuntela nu enggu 'bpia-piani nu silan. Pasembay nu silan sa di nu den 'bpangingalap i makauli nilan pan. Ka amaika maitu na masela i balas'u enggu katawan i sekanu na wata kanu nu Kadenan a Mapulu sa Langun. Ka malimu man sekanin apia kanu manga taw a di masukul enggu kanu manga mawag a taw. 36 Pangalimuan kanu a mana bun su Ama nu a lu sa sulega.b
Su Kapanendit kanu Ped'engka
37 “Da kanu manendit kanu ped'u ka enggu di kanu bun wagiban nu Kadenan. Di nu semugat sa kawagib su ped'u ka enggu di kanu bun sugaten sa kawagib'u Kadenan. Ampun nu su ped'u ka enggu kanu bun ampunen nu Kadenan. 38 Pangenggay kanu ka subela-subela pan i inggay nu Kadenan sa lekanu taman sa mamelapay, ka u ngin i asadan sa kapangenggay nu na maitu bun ba i asadan sa kaenggay sa lekanu.”
39 Na pidtalu pan nu Isa al-Masih kanilan su nia sa ukit a pakenalan sa “Ngintu, matundan nu pisek su pagidsan nin bun a pisek? Dili, ka amaika maitu na isa bu i kaulug'ilan kanu kalut. 40 Na dala man mulit a kalawanan nin su gulu nin. Nia taman na malepeng'in bu su gulu nin amaika mapasad den sekanin mamandu sa mapia. 41 Ngintu ka nia nengka madsima na su puling'u ped'engka inunta na su puling'engka a mana den lendu i kasela nin na di nengka madsima? 42 Panun ba i kapedtalu nengka kanu ped'engka sa ‘Kaka, sia ka pan ka iawa ku i puling'engka a nan,’ inunta na su puling'u mata nengka a mana den lendu i kasela nin na di nengka madsima? Seka a dikena senep sa atay i kabpagagama nin na iawa nengka muna su puling'u mata nengka a manga mana den lendu i kasela nin ka enggu nengka mailay sa mapia su kaawa nengka kanu puling'u ped'engka.
Su Kayu na Mailay sia kanu Unga nin
43 “Na su mapia a kayu na nia nin bun unga na mapia. Ugaid'a su di mapia a kayu na nia nin bun unga na di bun mapia. 44 Na sia nengka katawan i embiasan na kayu kanu unga nin. Di man munga su kayu a teneken sa igus atawa ka unga na ubas. 45 Na maitu bun ba su taw, su mapia a taw na nia nin bun manggalebek na mapia kagina nia nakadalem kanu atay nin na mapia. Na su mawag menem a taw na nia nin bun manggalebek na mawag kagina nia nakadalem kanu atay nin na mawag. Kagina u ngin i dalem'u atay nu taw na entu bun ba i lemiu kanu ngali nin.
Su Embalangan nu Taw a Pembudsud sa Walay
46 “Na ngintu ka pembedtuan aku nu sa Mapulu inunta na di nu pamun ipenggulalan su inisugu ku sa lekanu? 47 Na apia entain i semia sa laki enggu pakikinegen nin su panduan ku taman sa enggulan nin su entu na nia nin kalagidan na 48 mana su mama a mimbalay. Na kinemalut sekanin sa madalem ka inibudsud'in lu kanu lakungan a watu. Guna 'gkadalem su lawas'u ig na dala mageba su walay kagina mabagel i kinabudsud lun. 49 Ugaid'a apia entain menem i makikineg kanu panduan ku ugaid'a di nin inggulalan na nia nin kalagidan na su mama a mimbalay sa dala nin embageli mudsud su palaus'in. Guna den masugat'u kadalem na nagubal taman sa nabinasa sa tidtu-tidtu.”