Su Kapanendit sa Ped'engka
7
Pidtalu pamun nu Isa al-Masih i “Da kanu manendit kanu ped'u ka enggu di kanu bun wagiban nu Kadenan. 2 Kagina u ngin i isendit'u kanu ped'u na maitu bun ba i iwagib sa lekanu nu Kadenan. Na u ngin i kasela na ipedsendit'u kanu ped'u na maitu bun ba i kasela na iwagib sa lekanu. 3 Ngintu ka nia nengka madsima na su puling'u ped'engka inunta na su puling'engka a manga mana den lendu i kasela nin na di nengka madsima? 4 Atawa ka panun ba i kapedtalu nengka kanu ped'engka sa ‘Sia ka, ka iawa ku i puling'engka a nan,’ inunta na manga mana den lendu i kasela nu puling'engka? 5 Seka a dikena senep sa atay i kabpagagama nin na iawa nengka muna su puling'u mata nengka a manga mana den lendu i kasela nin ka enggu nengka mailay sa mapia su kaawa nengka kanu puling'u ped'engka.6 “Na di nu menggay kanu manga asu su suti a langun-taman ka edtaliungan kanu nin bun mebut. Atawa ka di nu midtug kanu manga taw sa lupa su manga muntia ka dakudaken nilan bu.
Su Kapangeni kanu Kadenan
7 “Pangeni kanu man ka enggan kanu, pangilay kanu ka makatun kanu, panutuk kanu ka ukan kanu. 8 Ka apia entain man i mangeni na makatalima, na su 'bpangilay na makatun enggu su 'bpanutuk na kaukan.
9 “Na entain ba sa lekanu sia a manga lukes i amaika mangeni su wata nin sa pan na nia nin lun inggay na watu, 10 udi na u mangeni sa seda su wata nin na nia nin lun inggay na nipay? 11 Na apia ngin den man i kawag'a palangay nu na katawan nu menggay sa mapia su wata nu. Na nia pan a entu su Ama nu a lu sa sulega a mataw menggay sa mapia kanu apia entain a mangeni sa lekanin!
12 “Kagina ka maitu na nia nadtimuan nu kasuguan a inisulat'u Musa enggu su panduan nu manga nabi na ‘Nia nu enggula kanu ped'u na u ngin i kalinian nu a enggulan nu ped'u sa lekanu.’ ”
Su Masimpit a Lalan
13 Na pidtalu pan nu Isa al-Masih i “Sia kanu ukit kanu masimpit a bengawan. Ka su bengawan a ibpawang sa kabinasan na maulad enggu madaya i lalan nin. Na madakel i 'bpagukit lun. 14 Ugaid'a su bengawan a ibpawang sa uyag-uyag a da taman nina na masimpit enggu dikena malemu a 'bpagukitan. Na paidu bu i pakatun lun.
Su Kapangingat kanu manga Taw a 'Bpenabi-nabi
15 “Pangingat kanu kanu manga 'bpenabi-nabi a 'bpamamandu sa di pakatidtu. Semupeg silan sa lekanu a mana bun silan manga bili-bili. Ugaid'a nia nin kabantang na mana silan asu sa damakayu a dupang. 16 Na makilala nu silan sia kanu galebek'ilan. Ka di man munga su kayu a teneken sa ubas atawa ka unga na kayu a igus. 17 Na su mapia a kayu na nia nin bun unga na mapia. Ugaid'a su di mapia a kayu na nia nin bun unga na di bun mapia. 18 Ka di man makaunga sa di mapia su mapia a kayu. Maitu bun ba su di mapia a kayu na di bun makaunga sa mapia a unga. 19 Na langun na kayu a di 'bpagunga sa mapia na 'bpanebpeden ka ibpagidtug kanu apuy. 20 Na maya ba i kakilala nu kanilan, na sia kanu galebek'ilan.
Su manga Taw a di Pegkilalan nu Isa al-Masih
21 “Dikena langun na pedtawag sa laki sa ‘Mapulu, Mapulu’ na makalusud kanu kandatu nu Kadenan ka nia bu makalusud na su penggalebek kanu kahanda nu Ama ku a lu sa sulega. 22 Ka sia kanu Gay a Mauli na madakel a taw i temawag sa laki sa ‘Mapulu, Mapulu, dikena ba inipayag'ami bun su kadtalu nu Kadenan sia nakanggulalan kanu ingala nengka enggu namugaw kami bun sa saitan taman sa napailay kami sa manga kangagaipan sia nakanggulalan kanu ingala nengka?’ 23 Na nia ku mambu isumpat kanilan na ‘Di ku a benal sekanu kangatawan. Awa kanu sia, sungkang a manga taw.’ ”
Su Embalangan a Pembudsud sa Walay
24 Na pidtalu pan nu Isa al-Masih i “Apia entain i 'bpakikineg kanu kadtalu ku taman sa ipenggulalan nin su entu na nia nin kalagidan na mana su mama a balaitungan a mimbalay na lu nin inibudsud sa mabagel kanu lakungan a watu. 25 Na guna makauma su ulan taman sa migkadalem enggu sinemambel sa sangat i kabandes'in a pakasugat kanu walay na da bun mageba su walay ka mabagel i kinabudsud'in lun.
26 “Na apia entain menem i 'bpakikineg kanu kadtalu ku ugaid'a di nin ipenggulalan su entu na nia nin menem kalagidan na mana su mama a dala itungan nin a mimbalay na lu nin inibudsud kanu damapedtad. 27 Na guna makauma su ulan taman sa migkadalem enggu sinemambel sa sangat i kabandes'in a pakasugat kanu walay na nabinasa sa tidtu-tidtu su walay.”
Su Kinapamandu nu Isa al-Masih a aden Kawagib'in