Su Dait a Ukit a Kapangalimuan
6
“Na pangingati nu i makapailay nu gaid kanu manga taw su kanggalebek'u kanu kaikelasan asal'a mapamedta kanu nilan ka amaika maitu na da den balas'u kanu Ama nu a lu sa sulega. 2 Kagina ka maitu na u mangalimuan kanu na di nu den ipembuyayang kanu manga taw a mana bun su ukit'u manga taw a dikena senep sa atay i kabpagagama nilan. Na penggalebeken nilan i entu lu kanu pedsambayangan nilan enggu lu kanu lalan asal'a mapugi silan nu manga taw. Na saben-sabenal a pedtalun ku sa lekanu i nakua nilan den man su balas'ilan. 3 Ugaid'a sekanu na u mangalimuan kanu na di nu den mapakatawi kanu biwang a lima nu u ngin i ibpangalimuan nu kawanan a lima nu 4 ka enggu di den mapayag su entu. Na su Ama nu a lu sa sulega a pakailay kanu pinggula nu a entu i mamalas sa lekanu.Su Dait a Ukit a Kapangeni-ngeni
5 “Na u mangeni-ngeni kanu menem na da kanu miling kanu manga taw a dikena senep sa atay i kabpagagama nin. Nia nilan kalinian na pedtindeg silan a 'bpangeni-ngeni lu kanu pedsambayangan nilan enggu sia kanu ligid'u lalan asal'a mailay silan nu manga taw. Na saben-sabenal a pedtalun ku sa lekanu i nakua nilan den man su balas'ilan. 6 Ugaid'a sekanu na uman kanu mangeni-ngeni na ludep kanu kanu bilik ka enggu dala pakailay sa lekanu, entu pan ka pangeni-ngeni kanu kanu Ama nu a lu sa sulega a di 'gkailay. Na sekanin a pakailay kanu apia su di 'gkailay i mamalas sa lekanu. 7 Na sia kanu kapangeni-ngeni nu na di nu den pedsasalumani su kapedtalu nu a mana bun su penggulan nu manga taw a dikena-Yahudi ka nia nilan kataw na sia kanu kalendu nu kapedtalu-talu nilan na pakikinegen silan. 8 Na di nu silan milingi. Ka su Ama nu man na bagu nu pan 'bpangenin su ngin i nasisita nu na 'gkatawan nin den su entu. 9 Na maya ba i ukit a kapangeni-ngeni nu
‘Hu Ama nami a lu sa sulega, dait man a 'bpagadatan su ingala nengka a suti.
10 Ibpangeni-ngeni nami i makalangkap den sia sa liwawaw na dunia su kapendatu nengka taman sa matuman su kahanda nengka sia a mana lu sa sulega.
11 Enggi kami kanu sagugunay a makan nami.
12 Ampun ka su kabaladusan nami sa mana bun su kinaampun nami kanu mindusa sa lekami.
13 Di kami nengka semuguti sa masasat ugaid'a makin kami nengka itangka kanu Saitan.’a
14 Ka amaika ampunen nu man su kabaladusan nu ped'u sa lekanu na ampunen kanu bun nu Ama nu a lu sa sulega. 15 Ugaid'a amaika di nu silan ampunen na su Ama nu a lu sa sulega na di kanu nin bun ampunen.
Su Dait a Ukit a Kabpuasa
16 “Na uman kanu 'bpuasa na di nu 'bpagilingi su manga taw a dikena senep sa atay i kabpagagama nin, pendidilimeng silan ka di nilan pedtuganulen su beneng'ilan asal'a katusan nu taw i pebpuasa silan. Na saben-sabenal a pedtalun ku sa lekanu i nakua nilan den man su balas'ilan. 17 Ugaid'a sekanu na u 'bpuasa kanu na 'bpia-piani nu su buk'u enggu panagupi nu su beneng'u 18 asal'a di katusan nu manga taw i pebpuasa kanu. Na su Ama nu a lu sa sulega a di 'gkailay i mamalas sa lekanu. Na sekanin i pakailay kanu apia su di 'gkailay.
Su Kakawasan sa Dunia
19 “Na da kanu 'bpelimud sa kakawasan sia sa dunia ka kanen bu na ligay enggu anay enggu lusudan bu na tanegkawn ka tegkawn nin. 20 Ugaid'a lu ka limud sa kakawasan sa sulega ka di makan lu na ligay enggu anay enggu di bun kalusudan su walay asal'a mategkaw nilan. 21 Ka u endaw man i kakawasan nengka na lu bun ba i pamusungan nengka.
22 “Su mata na su palitan nu badan, na amaika su mata nengka ka matingaw na 'gkaliwanag su badan nengka. 23 Ugaid'a amaika su mata nengka ka malebug na 'gkalibuteng su badan nengkab na amaika nia nengka palitan i da tayaw nin na sangat den i kalibuteng'a uyag-uyag'engka.
24 “Na dala taw a makapadsalengan nin enggalebek su dua kataw a mapulu nin ka apia ngin den na makadtalipenda nin su sakataw ka su sakataw bu i kanggalebekan nin sa mapia, sakataw bu i makakalimu nin ka makapadtaday nin su sakataw. Na di nengka man makapadsalengan su kasimba nengka kanu Kadenan enggu su kapangilay nengka sa kakawasan sa dunia.
Su di Dait a Kalidu sa Ginawa pantag kanu Kauyag
25 “Kagina ka maitu na nia ku madtalu sa lekanu na di nu 'bpelidua i ginawa nu sa kauyag'u, u ngin i kanen nu atawa ka panun i kainem'u atawa ka kambalegkas'u. Dikena ba nia labi a balapantag na su ginawa nu kumin kanu makan, enggu su badan kumin kanu balegkas? 26 Ilay nu su manga papanuk sa kawang-kawangan, dikena silan 'bpamula atawa ka pedsabpet atawa ka 'bpelimud sa makan ugaid'a su Ama nu a lu sa sulega i papegkan lun. Na sekanu pan a entu a labi a balapantag kumin kanu manga papanuk? 27 Na entain sa lekanu i sia kanu kapegkalidu na ginawa nin na makapagkalendu nin su umul'in sa apia sakauras bu?
28 “Na makapantag menem sa kapembalegkas na enduken ka 'gkaliduan nu sa ginawa su entu? Edsusuliman nu su manga ulak sa benday u panun i kapegkasela nilan. Dikena silan penggalebek atawa ka 'bpagaul 29 ugaid'a edtalun ku sa lekanu i apia su Ragya Sulaimanc a kawasa den a benal na dala kalepengi na kapia na balegkas'in su kapia nu apia satiman bu kanu manga ulak ba a nia. 30 Na su manga utan kanu benday na pedtuganulen bun nu Kadenan apia sagugunay bu i kabpaguyag'in ka kanu temundug a gay na tutungen bun, na nia pan a entu i sekanu? Nga den a kanaut'a salig i lekanu a nan kanu Kadenan.
31 “Kagina ka maitu na di nu den 'bpelidui sa ginawa u ngin basi i kanen nu, u panun basi i kainem'u atawa ka kambalegkas'u. 32 Ka su manga taw a dala sabut'in kanu Kadenan na maitu bun ba i 'bpaginapasen nin. Na 'gkatawan bun man nu Ama nu a lu sa sulega i nasisita nu su langun nu entu. 33 Ugaid'a nia nu muna paginapas na su kapendatu nu Kadenan enggu su kaikelasan nin ka su langun nu nia ba na matalima nu bun. 34 Kagina ka maitu na di nu den 'bpelidui sa ginawa su makatundug a gay ka nia nu bu pagitunga na su sagugunay bu ka su makatundug a gay na salakaw menem i entu a lidu na ginawa.”