Su Pakembang'u manga Taw a Lusud kanu Lumpukan a Parisiyu
12
Na ngibu-ngibuan den a manga taw i 'gkangalimud taman sa pakandadampuaya den silan. Na nia pidtalu nu Isa al-Masih kanu 'bpamangunut lun na “Pangingat kanu sa kanu pakembang'u manga taw a lusud kanu lumpukan a Parisiyu a su kabpamagigiling'ilan. 2 Ka da man inipagena a di makapayag atawa ka da natangguban a di kasawan. 3 Tembu apia ngin i edtalun nu sia kanu malibuteng na makineg bun lu kanu malinawag enggu apia ngin i ipagedunga nu sia kanu bilik na makapayag bun kanu adapan nu madakel a taw.Su Dait a Ikagilek
4 “Na nia ku madtalu sa lekanu manga pakat na da kanu magilek kanu manusia a nia nin bu 'gkagaga 'bpagimatay na su badan, ka liu sa entu na dala den 'gkagaga nilan. 5 Ugaid'a edtalun ku sa lekanu u entain i dait a ikagilek. Su Kadenan bu i dait a ikagilek kagina sekanin bu i aden bagel'in sa kaidtug sa naraka kanu taw ulian nu kapatay nin tembu ba edtalun ku sa lekanu i dait a ikagilek'u sekanin. 6 Ugaid'a apia ka maitu na apia su manga papanuk a pamugun a mababa den sa langun i alaga nin na dala isa bu kanilan i idtalipenda nu Kadenan. 7 Apia su kadakel'u buk'u na katawan nu Kadenan. Tembu da kanu magilek sa manggula ka labi paman i kabalapantag'u kumin kanu manga pamugun.
Su Kapaginugut kanu Isa al-Masih enggu su Dili Kapaginugut lun
8 “Na edtalun ku sa lekanu i apia entain i ipayag'in sia kanu adapan nu manga taw i 'bpaginugut sekanin sa laki na idsaksi bun sekanin nu Kaka nu Manusia sia kanu adapan nu manga malaikat'u Kadenan i nalusud sekanin sa laki. 9 Ugaid'a apia entain menem i kemias sa laki sia kanu adapan nu manga taw na ikias bun sekanin kanu adapan nu malaikat'u Kadenan. 10 Na apia entain i edtalu sa sungkang kanu Kaka nu Manusia na maampun bun ugaid'a apia entain i semakutu kanu Suti a Ruh na di den maampun.
11 “Na amaika pananggiten kanu nilan lu kanu pedsambayangan nu manga Yahudi atawa ka iadap kanu nilan lu kanu manga 'bpangukum enggu 'gkangaunutan na di nu 'bpelidua i ginawa nu sa panun i kapaninindeg'u kanu ginawa nu udi na u ngin i edtalun nu, 12 ka su entu demun ba a kutika na su Suti a Ruh i temutulu sa lekanu sa ngin i dait a edtalun nu.”
13 Na aden mama lu kanu madakel a taw i midtalu kanu Isa al-Masih sa “Gulu, edtalu ka pan kanu kaka ku sa umunan aku nin pan kanu inibpusaka nu ama nami.” 14 Na nia inisumpat'u Isa al-Masih na “Manga dua na suled na entain i minenggay sa laki sa kawagib sa kapagumun ku sa lekanu kanu inibpusaka sa lekanu?” 15 Na pidtalu bun nu Isa al-Masih kanu madakel a taw i “Edsipat kanu enggu pangingat kanu sa kanu langun na ukit a di kasukul ka su uyag-uyag'u na dikena 'gkailay sia kanu kadakel'u kakawasan nu ka aden pamun lawan kanu entu.”
16 Pidtalu pamun nu Isa al-Masih kanilan su nia a pakenalan sa “Aden mama a kawasa a mapia gaid i kabpagunga nu pamumulan nin. 17 Na nia nin nadtalu sa ginawa na ‘Ngin guna i enggulan ku ka da den besen 'gkabetadan ku kanu manga nasabpet ku?’ 18 Daka nia nin napagitung na ‘Nia ku besen enggulan na ipageba ku su manga kamalig ku ka mapatindeg aku sa labi pan i kasela nin a kamalig a kabetadan ku kanu langun nu nasabpet ku enggu kanu ped pan a kaaden ku. 19 Entu pan ka nia ku edtalun sa ginawa ku na “Madakel den i nalimud ku a kaaden a mausal ku sa mangauma pan a timpu. Na nia ku bun den enggulan na keman, minem enggu mapakapia sa ginawa.” ’ 20 Ugaid'a nia pidtalu nu Kadenan sa lekanin na ‘Da sabut'engka! Saguna bun ba a nia a magabi na tebpeden den su napas'engka. Na entain saguna i kapianan kanu linimud'engka a nan kanu ginawa nengka?’
21 “Na maitu ba i manggula nu taw a lemimud sa kakawasan kanu ginawa nin ugaid'a miskinan sia kanu adapan nu Kadenan.”
22 Na nia pan pidtalu nu Isa al-Masih kanu 'bpamangunut lun na “Kagina ka maitu na nia ku madtalu sa lekanu na di nu 'bpelidua i ginawa nu sa kauyag'u sa u ngin i kanen nu atawa ka su kambalegkas'u. 23 Ka nia man labi a balapantag na su ginawa kumin kanu makan enggu su badan kumin kanu balegkas. 24 Na nia nu ilay na su manga uwak, dikena silan 'bpamula atawa ka pedsabpet, dikena bun silan 'bpelimud sa makan ugaid'a su Kadenan i papegkan kanilan. Na sekanu pan a entu a labi a balapantag kumin kanu manga uwak? 25 Na entain sa lekanu i sia kanu kapegkalidu na ginawa nin na makapagkalendu nin su umul'in sa apia sakauras bu? 26 Na u apia su paidu a entu ka di nu 'gkagaga penggula na ngintu ka 'bpelidun nu pamun i ginawa nu kanu manga ped pan a manga nasisita? 27 Nia nu man edsusuliman na su manga ulak u panun i kapegkasela nilan. Dikena silan penggalebek atawa ka 'bpagaul ugaid'a edtalun ku sa lekanu i apia su Ragya Sulaiman a kawasa den a benal na dala kalepengi nu kapia na balegkas'in su kapia nu apia satiman bu kanu manga ulak ba a nia. 28 Na su manga utan kanu benday na pedtuganulen bun nu Kadenan apia sagugunay bu i kabpaguyag'in ka kanu temundug a gay na tutungen bun, na nia pan a entu i sekanu? Nga den a kanaut'a salig i lekanu a nan kanu Kadenan. 29 Na di nu den gaid 'bpelidui sa ginawa su kapangilay nu sa makan nu enggu kainem'u. 30 Ka su manga taw a dala sabut'in kanu Kadenan na maitu bun ba i 'bpaginapasen nin. Na 'gkatawan bun man nu Ama nu a lu sa sulega su ngin i nasisita nu. 31 Ugaid'a nia nu man paginapas na su kapendatu nu Kadenan ka su langun nu nia ba na matalima nu bun.
Su Kakawasan lu sa Sulega
32 “Na sekanu a paidu bu a 'bpamangunut sa laki na di nu 'bpelidua i ginawa nu ka su Ama a su Kadenan na pinamili kanu nin den a makalusud kanu kapendatu nin. 33 'Bpapasa nu su langun nu manga kaaden nu ka ipangalimuan nu kanu manga pakanasisita. Na limud kanu sa kaaden lu sa sulega a di pegkalat enggu di makan na anay enggu di kasupegan na tanegkawn. 34 Ka u endaw man i kakawasan nu na lu bun ba i pamusungan nu.
35 “Tatap'u adil i ginawa nu enggu palalayun nu su kaliwanag'u palitan nu. 36 Na nia nu ilingi na mana su manga panunugun a 'bpagangapan nilan su mapulu nilan ebpun sa kawingan sa kauma nin ka enggu nilan kaukan semambut. 37 Na ngin den i kapia nin kanu manga panunugun amaika kauman nu mapulu nilan a dikena silan pedtulug ka pagangapan nilan demun su kapegkauma nu mapulu nilan. Na nia ku madtalu sa lekanu na edsambi sekanin sa balegkas ka paayanen nin silan taman sa talagadan nin sa makan. 38 Amaika makauma su mapulu nilan sa luk i gay atawa ka magan mapita na ngin den i kapia nin kanu manga panunugun a entu amaika kauman nin silan a penggedam pamun enggu adil. 39 Ka mana bun man su kigkuan kanu walay, na u 'gkatawan nin bu u kanu i kauma nu tanegkawn na di nin sugutan a kalusudan su walay nin. 40 Na dait a adil kanu sa apia ngin a kutika kagina su kauma nu Kaka nu Manusia na kanu kutika a dikena nu 'bpagantapen.”
Su Kasaligan a Panunugun
41 Na nia inidsa ni Pitru na “Mapulu, ngintu, su pakenalan ba a nia na sekami bu i 'gkasugat'in atawa ka apeg'u langun nu taw?” 42 Nia inisumpat'u Mapulu na “Ngin ba i dait a ula-ula nu matidtu enggu balaitungan a 'gkasaligan nu mapulu kanu langun nu panunugun sa kapakan kanilan sa kanu timpu na kakan? 43 Na mapia den a benal kanu panunugun u muli su mapulu nin na kauman sekanin a penggalebeken nin su inisalig lun. 44 Na saben-sabenal a pedtalun ku sa lekanu i isalig'in su langun nu kaaden nin kanu entu ba a panunugun. 45 Ugaid'a amaika su panunugun ka nia nin mapagitung na kagina ka dala pamun lu su mapulu nin, na ludsuan nin mametay su pagidsan nin bun a panunugun magidsan i babay enggu mama. Na mamakut sekanin keman enggu minem taman sa endalangutan. 46 Na su mapulu nu entu a panunugun na muli kanu manga gay a di nin 'bpagantapen enggu kanu manga kutika a di nin katawan. Na lupet-lupeten nin su panunugun a entu taman sa itampung'in kanu manga taw a dikena 'bpamaginugut.
47 “Amaika su panunugun ka apia katawan nin bun su ipedsugu sa lekanin nu mapulu nin ugaid'a dikena sekanin adil atawa ka di nin penggalebeken na siksan sekanin sa mapasang. 48 Ugaid'a su panunugun a di nin katawan i ipedsugu sa lekanin lun nu mapulu nin na apia makanggalebek sekanin sa dait a isiksa lun na mapegkag bu a siksa i matalima nin. Na u entain i madakel i nakaenggay lun na madakel bun i mapangilay lun enggu u entain i madakel i inisalig lun na madakel bun i mapangeni lun.”
Su Masih i Sabapan na Kadsusungkanga nu manga Taw
49 Na nia pan pidtalu nu Isa al-Masih na “Sinemia aku ka enggu ku madtapik kanu manga taw su apuy,a na nia ku 'gkapangingalap na kemaleg den. 50 Ugaid'a aden pan dait a kaukitan ku a salawatb na taman sa di pan matuman su entu ba na di pan makatelen i manggiginawa ku. 51 Nia nu kataw ka su kinasia ku sa dunia na kalilintad i madtatanggit ku? Edtalun ku sa lekanu i dikena kalilintad i madtatanggit ku ka kabpipitas. 52 Na iganat saguna na su sakambinabatan a lima kataw na makabpipitas, su telu kataw na sungkang kanu dua kataw, maitu bun ba su dua kataw na sungkang menem kanu telu kataw. 53 Na su ama na sungkang kanu wata nin a mama enggu su wata menem a mama na sungkang menem kanu ama nin. Na su ina menem na sungkang kanu wata nin a babay enggu kanu mamanugang lun a babay. Na su wata a babay na sungkang menem kanu ina nin enggu su mamanugang a babay na sungkang kanu panugangan nin a babay.”
Su Kataw kanu Pilatas'u manga Timpu
54 Na pidtalu pamun nu Isa al-Masih kanu madakel a taw i “Amaika makailay kanu sa gabun a pakabpun sa sedepan na 'gkatawan nu semambut i mulan, na 'gkatuman su entu. 55 Amaika magedam'u menem i semanggiup su sambel sa laya na 'gkatawan nu i manenang, na 'gkatuman su entu. 56 Manga taw a dikena senep sa atay i kabpagagama nin! Katawan nu a benal 'bpilatas su ula-ula nu gay sia kanu kapegkailay nu kanu kawang-kawangan enggu kanu sanggiup'u sambel. Ugaid'a ngintu ka di nu katawan 'bpilatas su manga tanda kanu 'gkanganggula sa saguna a manga timpu?
Su Pantag sa Kapagayun nu Nagukag
57 “Na ngintu ka di nu makapaayun su ginawa nu sa ngin i dait atawa ka wagib? 58 Amaika aden taw a mangaden sa leka sa bitiala taman sa pananggiten ka nin sa walay na kukuman na paginatul ka i kapagayun nu gagalu na di kanu pan pakauma kanu walay nu kukuman ka tabia bun ka tabanan ka na ipalad ka nu 'bpangukum kanu tameng ka enggu ka mabilanggu. 59 Na nia ku madtalu sa leka na taman sa di nengka kabayadan langun na di ka makaliu lu ba.”