Su Kagubal'u Suti a 'Bpagagaman
24
Na ginanatan nu Isa al-Masih su Suti a 'Bpagagaman, na kanu kinaliu nilan lu na sinupegan sekanin nu 'bpamangunut lun ka inipasandeng'ilan lun su Suti a 'Bpagagaman taman kanu namakabalibet lun. 2 Ugaid'a nia pidtalu nu Isa al-Masih kanilan na “Su langun na namba a 'gkangailay nu na apia satiman na dala mailay nu lun a mamakapamaguntul a watu nin ka natalatantu a aden gemubal lun su langun nu entu.”Su manga Tanda sa kanu Gay a Mauli
3 Na gagalu na kabpagagayan nu Isa al-Masih lu kanu Palaw nu Ulibus na sinupegan sekanin nu 'bpamangunut lun ka tinalipulu nilan lun midsa i “Edtalu ka pan sa lekami u kanu i kanggula kanu entu ba enggu ngin i tanda nu kambalingan nengka sia enggu su Gay a Mauli.” 4 Na nia pidtalu nu Isa al-Masih kanilan na “Pangingati nu i dala makapasibay sa lekanu. 5 Madakel i embuat a nia nilan edtalun na silan su Masih taman sa madakel i makapasibay nilan. 6 Na makakineg kanu sa embubunua magidsan i masupeg enggu mawatan a dalepa, na da kanu magilek ka nasisita a manggula i entu ugaid'a dikena pamun i entu su kabangkit kanu dunia. 7 Kagina embubunua pan su manga bangsa enggu embubunua pan su manga sultan. Na maaden su kanggutem enggu manga linug kanu madakel a dalepa. 8 Ugaid'a ludsuan bu i nia nu kamalasayan a nia nin kalagidan na mana su masakit a 'bpelumpak kanu endaw demun i kabpeludsu pembata nu babay.
9 “Kagina ka luyud kanu sa laki na kabensian kanu nu langun na bangsa. Ipalad kanu nilan lu kanu 'bpamungkaid ka enggu kanu nilan pakapasangan taman sa imatayan kanu nilan. 10 Na madakel i temagak kanu salig'ilan taman sa tipun enggu kabensian den na uman i isa i ped'in. 11 Na madakel i embubuat a 'bpenabi-nabi ka pasibayn nilan su madakel a taw. 12 Na sabap sa 'bpangiseg bun su kadaluakan, na madakel den i pegkelas i limu nin. 13 Ugaid'a su taw a temigkel sa kanu paginugut'in taman sa kapupusan na entu ba i malipuas. 14 Na makapangusiat pan su nia a Mapia a Tutuma pantag kanu kapendatu nu Kadenan kanu pat a pisuk'u dunia asal'a katawan langun nu bangsa su entu. Entu pan ba ka mauma den su kapupusan.
15 “Na amaika mailay nu den su pakangingilu a pakagiabu a nadtalu nu Nabi Danyila a edtindeg den lu kanu Suti a 'Bpagagaman a punan a katagak kanu dalepab (na dait a katuntayan nu pembatia su pantag kanu nia) 16 sa su langun na taw sia sa Yudia na dait a mamagayas den silan malalaguy lu kanu manga palaw. 17 Na su lu kanu liu nu walay nin na di den lemudep asal'a kemua pan sa manga langun-taman nin. 18 Maitu bun su lu kanu 'bpangangawidan na di den dait a muli pan asal'a kemua sa lambung'in. 19 Na duan-duan nin den su manga babay a magingay enggu papedsusu sa wata kanu entu ba a manga timpu! 20 Na ipangeni-ngeni nu i di manggula su entu kanu timpu na kambalat atawa ka Gay nu Kabpangintelenen 21 kagina kanu entu ba a manga timpu na temala su manga taw sa da idsan nin a kamalasayan. Su entu a kamalasayan na dala pagidsan nin iganat pan sa kinapangaden kanu dunia sampay den saguna enggu di den a benal kabpalumanan su entu. 22 Ugaid'a sabap kanu manga taw a pinamili nu Kadenan na pigkahanda nin i pupusen nin den mangagan su entu ba a manga timpu kagina amaika dili na dala masama a bibiag a taw.”
Su manga Tanda sa Kambalingan nu Kaka nu Manusia
23 Nia pan pidtalu nu Isa al-Masih na “Amaika aden edtalu sa lekanu sa ‘Ilay nu, nia den su Masih’ udi na ‘Ilay nu, entu den sekanin!’ na da kanu maginugut sa entu 24 ka embubuat su manga 'bpamagigiling sa Masih enggu su manga 'bpenabi-nabi. Na enggalebek silan sa kangagaipan a kabarakatan asal'a makapasibay nilan apia su manga taw a pinamili nu Kadenan amaika magaga nilan. 25 Na pinakatawan ku den ba a nia sa lekanu su entu sa unan na di pan 'gkanggula. 26 Tembu amaika aden edtalu sa lekanu sa ‘Entu den sekanin kanu tawan-tawan a dalepa’ na da kanu lemu. Na amaika aden menem edtalu sa lekanu sa ‘Entu sekanin kanu bilik'a’ na da kanu maginugut. 27 Kagina su kauma nu Kaka nu Manusia na nia nin kalagidan na mana bun su kapedtalas'u kilat iganat sa sebangan taman sa sedepan a pegkaliwanag'in su kawang-kawangan. 28 Na mana bun man su kauma nu Kaka nu Manusia na amaika mailay nu i mabulig den su masela a papanuk a 'bpangan sa minatay na katawan nu den i aden bangkay lu.
29 “Na endaw i kaipus'u entu a kamalasayan kanu entu a manga timpu na endukilem su senang, su ulan-ulan na di den 'gkalinawag enggu su manga bitun na mangaulug ganat kanu kawang-kawangan taman sa su langun nu lu sa kawang-kawanganc na mangakuyung. 30 Entu pan ka mailay kanu kawang-kawangan su tanda a pakauma den su Kaka nu Manusia. Na su langun nu bangsa kanu pat a pisuk'u dunia na maguguliang den entu pan ka mailay nilan su Kaka nu Manusia a lu makasaleta kanu manga gabun a makauma sia sa dunia. Na mailay nu manga taw su kabarakat'in enggu su sigay nin. 31 Na yupen su tambuli sa matanug ka sugun nin den su manga malaikat'in ka limuden nilan su langun nu pinamili nin kanu pat a pisuk'u dunia.”
Dala Makataw u Kanu i Kambalingan nu Kaka nu Manusia
32 Nia pan pidtalu nu Isa al-Masih na “Ilay nu su kayu a igus.d Endaw demun i kaleteb'u manga laun nin kanu manga sapak'in na katawan den i masupeg den su kabpanenang. 33 Na maitu bun ba u mailay nu i manggula den su langun nu entu na katawan nu den i masupeg den a benal su kauma nin a mana san den sa bengawan i kasupeg'in. 34 Na saben-sabenal a pedtalun ku sa lekanu i natalatantu a di matag makadalung su manga taw kanu nia a timpu taman sa di pan manggula su langun nu entu ba. 35 Na madala den su langit enggu su lupa ugaid'a su manga kadtalu ku na di madala.
36 “Ugaid'a makapantag kanu gay enggu kutika nu kanggula kanu entu ba na dala isa bu a makataw lun nia tabia na su Ama bu. Apia su Tunggal'in na di nin katawan, maitu bun su manga malaikat'in lu sa sulega na di nilan bun katawan. 37 Ka su kauma nu Kaka nu Manusia na nia nin kalagidan na mana su timpu nu Nabi Nuh. 38 Na bagu nakauma su kadalem na su manga taw kanu entu ba a timpu na mana bun dala 'gkanggula ka 'bpamegkan bun silan, 'bpamanginem enggu 'bpapamangalumaya pamun silan taman kanu gay a nageda den su Nabi Nuh kanu kapal. 39 Na di nilan 'gkaimamanan na pakauma den besen su kadalem taman sa nia nilan den kinatekaw na nangaled den silan langun. Na maitu bun ba su kauma nu Kaka nu Manusia na di bun katekawan.
40 “Na kanu entu ba a manga timpu na aden dua kataw a mama lu kanu 'bpangangawidan, na kuan su sakataw enggu su sakataw na itabun. 41 Na aden bun dua kataw a babay a penggiling, na maitu bun ba, kuan su sakataw enggu itabun su sakataw. 42 Kagina ka maitu na endiaga kanu ka di nu katawan u ngin a gay i kauma nu Mapulu nu. 43 Ka mana bun man su kigkuan kanu walay, na u 'gkatawan nin bu u kanu i kauma nu tanegkawn na endiaga sekanin asal'a di kalusudan su walay nin. 44 Na nia ba i sabap'in a dait a adil kanu sa apia ngin a kutika kagina su kauma nu Kaka nu Manusia na kanu kutika a dikena nu 'bpagantapen.
Su Matidtu enggu su Dupang a Panunugun
45 “Na ngin ba i dait a ula-ula nu matidtu enggu balaitungan a panunugun a sinaligan nu mapulu kanu langun nu panunugun sa kapakan kanilan sa kanu timpu na kakan? 46 Na mapia den a benal kanu panunugun u muli su mapulu nin na kauman sekanin a penggalebeken nin su inisalig lun. 47 Na saben-sabenal a pedtalun ku sa lekanu i isalig'in su langun nu kaaden nin kanu entu ba a panunugun. 48 Ugaid'a su dupang a panunugun na nia nin mapagitung na kagina ka dala pamun lu su mapulu nin, 49 na ludsuan nin mametay su pagidsan nin bun a panunugun enggu mamakut keman enggu minem a kaped'u manga palalangut. 50 Na su mapulu nu entu a panunugun na muli kanu manga gay a di nin 'bpagantapen enggu kanu manga kutika a di nin katawan. 51 Na lupet-lupeten nin su panunugun a entu taman sa itampung'in kanu manga taw a dikena senep sa atay i kabpagagama nin a lu kanu 'bpamanguliang i taw nin enggu 'bpamegkiget i ngipen nin.