Su Pakenalan pantag kanu Sapulu Kataw a Laga a manga Abay nu Pegkawingen
25
“Na sia kanu kapendatu nu Kadenan kanu entu ba a manga timpu na nia nin kalagidan na mana bun su sapulu kataw a laga a abay nu pegkawingen a namananggit sa sulu ka 'bpagalawn nilan su pegkawingen a mama.a 2 Na su lima kataw kanilan na balaitungan enggu su lima kataw menem na dikena balaitungan 3 kagina su lima kataw na matag silan namananggit sa sulu na dala nilan adili sa lanagas a itenggung'ilan lun 4 ugaid'a su lima kataw menem na inadilan nilan sa lanagas a itenggung'ilan kanu manga sulu nilan. 5 Na guna a nia maangga su kauma nu pegkawingen a mama na tinulatud silan taman sa namakatulug silan langun. 6 Daka guna su manga luk i gay den na aden linemalis sa ‘Ilay nu, pakauma den su pegkawingen, lu kanu den ka alaw nu sekanin.’ 7 Na ginemedam su manga laga a abay ka pibpia-pianan nilan su sumbuan nu sulu nilan. 8 Daka pidtalu nu manga dikena balaitungan kanu manga balaitungan i ‘Enggi kami nu pan san sa lanagas'u a nan ka 'gkaibpedan den i sulu nami'a.’ 9 Ugaid'a nia inisumpat'u manga balaitungan na ‘Di basi makadtun sa lekitanu i lanagas a nia, makin lu kanu sa pendagang'a ka enggu kanu makapamasa sa lekanu.’ 10 Na kanu kabpamasa nilan na nakauma su pegkawingen. Na su namakapagadil bu i nakaludep kaped'u pegkawingen lu kanu pegkalilangan, entu pan ka pinintuan den su bengawan. 11 Daka da matana-tana na nakauma bun su kaped a entu a manga abay. Na nia nilan pidtalu na ‘Mapulu, Mapulu, bukati kami pan'a.’ 12 Ugaid'a nia nin pidtalu kanilan na ‘Saben-sabenal a di ku a benal sekanu kangatawan.’13 “Kagina ka maitu na nia dait na adil kanu kagina di nu katawan u ngin a gay atawa ka kutika i kauma nu Kaka nu Manusia.
Su Pakenalan pantag kanu Telu Kataw a Panunugun a Sinaligan sa Pilak
14 “Na su kapendatu nu Kadenan na mana bun su pinggula nu mama a linemalakaw sa mawatan. Tinawag'in su manga ulipen nin ka inisalig'in kanilan su kaaden nin. 15 Inisalig'in kanu sakataw su lima ngibu i kadakel'in a pilak,b su sakataw menem na dua ngibu i kadakel'in a pilak enggu su sakataw menem na sangibu i kadakel'in a pilak, sia luyud kanu ngin i magaga nilan. Na entu pan ka ginemanat su mama. 16 Na endaw demun i kinatalima nu ulipen kanu lima ngibu i kadakel'in a pilak na kanu entu bun ba na ginemanat ka inipamantiali nin su inisalig lun taman sa nakauntung sa lima ngibu bun i kadakel'in a pilak. 17 Na maitu bun ba su nakatalima sa dua ngibu i kadakel'in a pilak, nakauntung bun sa dua ngibu i kadakel'in a pilak. 18 Ugaid'a su nakatalima sa sangibu i kadakel'in a pilak na ginemanat ka inilebeng'in kanu lupa su pilak'u mapulu nin a inisalig lun.
19 “Na guna maipus su manga timpu na minuli su mapulu nilan. Na inipatawag'in su manga ulipen nin ka idsa nin kanilan u pila i nauntung'ilan kanu inisalig'in kanilan a pilak. 20 Na sinupegan sekanin nu sinaligan sa lima ngibu i kadakel'in a pilak ka inenggay nin su lima ngibu bun i kadakel'in a pilak a nauntung'in sa nia nin pidtalu na ‘Mapulu, nia su inisalig'engka sa laki a lima ngibu i kadakel'in a pilak na ilay ka, nakauntung sa lima ngibu bun i kadakel'in a pilak.’ 21 Nia pidtalu nu mapulu nin na ‘Mapia i entu! Kasaligan ka enggu mapia ka a ulipen. Kagina ka kasaligan ka sa manaut bu a nia a inisalig sa leka na isalig ku sa leka su labi pan i kasela nin. Na sia ka, ka amungi ka su mapulu nengka kanu kapenggalaw-galaw nin.’ 22 Na sinupegan bun mambu sekanin nu sinaligan sa dua ngibu i kadakel'in a pilak sa nia nin pidtalu na ‘Mapulu, nia su inisalig'engka sa laki a dua ngibu a pilak na ilay ka, nakauntung aku sa dua ngibu bun i kadakel'in a pilak.’ 23 Nia pidtalu nu mapulu nin na ‘Mapia i entu! Kasaligan ka enggu mapia ka a ulipen. Kagina ka kasaligan ka sa manaut bu a nia a inisalig sa leka na isalig ku sa leka su labi pan i kasela nin. Na sia ka, ka amungi ka su mapulu nengka kanu kapenggalaw-galaw nin.’ 24 Na sinupegan bun mambu sekanin nu sinaligan sa sangibu i kadakel'in a pilak sa nia nin pidtalu kanu mapulu nin na ‘Mapulu, katawan ku i mapasang ka a taw, 'gkapagagani nengka i dikena nengka pinamula enggu 'gkakua nengka su dikena nengka pinggalebekan. 25 Kagina ka 'gkagilekan aku na inilebeng ku kanu lupa su inisalig'engka sa laki. Ilay ka, nia bun su pilak'engka a inisalig'engka sa laki.’ 26 Daka nia pidtalu sa lekanin nu mapulu nin na ‘Da katagan nengka a ulipen. Mapauk ka a benal! 'Gkatawan nengka den i 'gkapagagani ku i dikena ku pinamula enggu 'gkakua ku su dikena ku pinggalebekan 27 na ngintu ka da nengka pan itagu sa bangku su pilak ku ka enggu nia ku kambalingan na aden mauntung'in?’ 28 Daka inisugu nu mapulu i ‘Makin nu kua sa lekanin su inisalig lun a nan ka inggay nu kanu aden sapulu ngibu i kadakel'in i pilak'in. 29 Ka apia entain a taw i kasaligan kanu ngin i inisalig lun na makin edsisinggumanan pan su isalig lun ugaid'a su taw a di kasaligan kanu apia paidu bu a inisalig lun na makin kuan su inisalig lun. 30 Na idtug su ulipen a dala katagan nin lu kanu kalibutengan a 'bpamanguliang i taw nin enggu 'bpamegkiget i ngipen nin.’
Su Gay a Kakukum kanu manga Taw
31 “Na sia kanu kambalingan nu Kaka nu Manusia a lu sa lekanin su kabarakat a kaped'u langun nu malaikat na mayan den sekanin kanu kulesi nin ka endatu den sekanin. 32 Na langun nu bangsa na endidilimudan den kanu adapan nin, na padsenggayan nin den silan sa nia nin kalagidan na mana bun su patutuganul sa bili-bili a isenggay nin su manga bili-bili kanu manga kambing. 33 Na sia nin ibetad su manga bili-bili kanu tampal sa kawanan nin enggu su manga kambing menem sia kanu biwang'in. 34 Entu pan ka edtalun nu pendatu a entu kanu sia sa kawanan nin i ‘Sekanu a pinalihalan nu Ama ku, sia kanu ka talima nu su inibpusaka sa lekanu a kandatu nu Kadenan a inadil sa lekanu iganat pan kanu kinapangaden kanu dunia. 35 Kagina kanu timpu a 'gkagutem aku na inenggan aku nu sa makan enggu kanu timpu a pakainem aku na pinainem aku nu. Na kanu timpu menem a nakabagu aku kanu dalepa nu na pinatalus aku nu kanu walay nu 36 enggu kanu timpu a dala balegkas ku na pinambalegkas aku nu. Na kanu timpu a di aku 'bpangengelag na kinakap aku nu taman kanu timpu a kinabilanggu ku na pibpawangan aku nu.’ 37 Na nia edtalun nu manga ikelas kanu Datu na ‘Mapulu, kanu i kinailay nami sa leka a 'gkagutem a pinakan nami seka atawa ka pakainem a pinainem'ami seka? 38 Enggu kanu i kinailay nami sa leka a nakabagu ka kanu dalepa nami a pinatalus'ami seka kanu walay nami atawa ka dala balegkas'engka na pinambalegkas'ami seka? 39 Kanu menem i kinailay nami sa leka a di ka 'bpangengelag atawa ka nabilanggu ka a pibpawangan nami seka?’ 40 Nia isumpat'u Datu kanilan na ‘Saben-sabenal a pedtalun ku sa lekanu i u ngin i pinggula nu kanu apia entain kanu manga suled ku, apia su mababa pan sa langun kanilan na mana nu bun pinggula sa laki su entu.’
41 “Na edtalun menem'u Datu kanu sia tampal kanu biwang'in i ‘Awa kanu sia manga taw a inidsinta lu kanu da kapedtaman nin a apuy sa naraka a inadil kanu Datu na Giadsal enggu kanu manga ulayat'in.c 42 Kagina kanu kinagutem ku na dala aku nu enggi sa makan enggu kanu kapegkainem ku na dala aku nu painema. 43 Na kanu kinabagu ku kanu dalepa nu na dala aku nu patalusa kanu walay nu enggu kanu dala balegkas ku na dala aku nu pambalegkasa. Na kanu di ku kabpangengelag enggu kinabilanggu ku na dala aku nu kakapa.’ 44 Daka nia nilan edtalun sa lekanin na ‘Mapulu, kanu i kinailay nami sa leka a 'gkagutem ka, 'gkamalan ka, nakabagu ka kanu dalepa nami, da ka makambalegkas, da ka pangengelag enggu nabilanggu ka a da nami seka edtabangi?’ 45 Na nia nin edtalun kanilan na ‘Saben-sabenal a pedtalun ku sa lekanu i u ngin i da nu enggula kanu apia entain kanu manga suled ku, apia su mababa pan sa langun kanilan na da nu bun enggula i entu sa laki.’
46 “Na su nia ba a manga taw na lu den makasangul kanu da den taman nin a kasiksan ugaid'a su manga taw menem a ikelas na lu den makasangul kanu uyag-uyag a da taman nin.”