Su Kaingat kanu 'Gkangaunutan nu manga Yahudi
23
Daka nia pidtalu nu Isa al-Masih kanu madakel a taw enggu kanu 'bpamangunut lun na 2 “Su manga gulu nu pangitaban enggu su manga taw a lusud kanu lumpukan a Parisiyu na silan i nasanganan sa kapamandu sa kanu kasuguan nu Musa.a 3 Na paginuguti nu su langun nu ibpamandu nilan ugaid'a di nu munuti su penggalebeken nilan kagina matag'ilan ibpamandu su entu na dikena nilan ipenggulalan. 4 Su ibpamandu nilan na nia nin kalagidan na mana nilan pinadtitimpung su mangaugat a it a mapasang a benal 'bpananggiten ka inipapananggit'ilan kanu manga taw ugaid'a dikena silan pedtabang sa panun i kagkapegkag'u kabpananggit lun.5 “Na langun nu penggalebeken nilan na penggalebeken nilan bu i entu asal'a mailay nu taw. Upama, su kapapegkasela nilan kanu taguan a dinidaleman kanu kadtalu nu Kadenan a inibalud kanu bias'ilan enggu kanu ngelay nilanb enggu su kapapegkalendu nilan kanu palumpung'u balegkas'ilan.c 6 Kalilinian nilan gaid a makapagagayan silan lu kanu 'bpagagayanan nu manga mapulu lu kanu pegkakanduli enggu lu kanu manga pedsambayangan tanu a manga Yahudi. 7 Kalilinian nilan bun gaid i kapagadatan silan nu manga taw lu kanu manga padian enggu pedtawagen silan a gulu. 8 Ugaid'a sekanu na da kanu papedtawag sa gulu kagina sakataw bu i gulud nu enggu edsusuled kanu langun. 9 Di nu temawag sa ama su apia entain sa lekanu sia sa dunia ka sakataw bu i Ama nu ka su Ama nu bu a lu sa sulega. 10 Di nu bun temawag sa mapulu su apia entain sa lekanu ka sakataw bu i Mapulu nu ka su Masih bu. 11 Ka apia entain sa lekanu i miug mabaluy a balapantag na dait a mabaluy a panunugun. 12 Na apia entain menem a taw i ipulu nin i ginawa nin na makababa enggu apia entain menem i ibaba nin i ginawa nin na makapulu.”
Su Kinadaway nu Isa al-Masih kanu 'Gkangaunutan nu manga Yahudi
13 Nia pan pidtalu nu Isa al-Masih na “Duan-duan nin den i sekanu a manga gulu nu pangitaban enggu sekanu a manga taw a lusud kanu lumpukan a Parisiyu, dikena senep sa atay i kabpagagama nu! Ka pinelen nu man su manga taw sa kalusud'ilan kanu kapendatu nu Kadenan. Na sekanu mismu na di kanu man makalusud kanu kapendatu nu Kadenan taman sa di nu bun pedsugutan su ped a taw sa kalusud'ilan lu ba.e
15 “Duan-duan nin den i sekanu a manga gulu nu pangitaban enggu sekanu a manga taw a lusud kanu lumpukan a Parisiyu, dikena senep sa atay i kabpagagama nu ka 'gkalapat'u den 'bpelakaw pagidsan i sia sa kapuluan enggu ig asal'a makapangenggat kanu sa apia sakataw bu sia kanu kabpagagama nu. Na apia entain a taw i makapapaginugut'u na nasisigulu a benal i kanaraka nin kumin sa lekanu.
16 “Duan-duan nin den i sekanu a 'gkangaunutan a mana manga pisek! Kagina pedtalun nu na apia entain i edsapa kanu Suti a 'Bpagagaman na da bun kapantag'in su entu. Ugaid'a apia entain i edsapa kanu bulawan a sia kanu Suti a 'Bpagagaman na di 'gkawagib a di matuman su entu. 17 Sekanu a mana manga pisek enggu di pamakatidtu i itungan nin! Ngin besen i balapantag, su bulawan atawa ka su Suti a 'Bpagagaman a pedsuti kanu bulawan? 18 Pedtalun nu bun i apia entain i edsapa kanu pegkurbanan na da bun katagan nu entu. Ugaid'a apia entain i edsapa kanu ipegkurban na di 'gkawagib a di matuman su entu. 19 Sekanu a mana manga pisek! Ngin besen i balapantag, su ipegkurban atawa ka su pegkurbanan a pedsuti kanu ipegkurban? 20 Na pedtalun ku sa lekanu i apia entain man i pedsapa kanu pegkurbanan na apeg'u langun nu lu kanu pegkurbanan na pakalalagit'in pedsapa. 21 Na su pedsapa menem kanu Suti a 'Bpagagaman na apeg'u Kadenan na pakalalagit'in bun pedsapa. 22 Na su pedsapa menem kanu sulega na pakalalagit'in bun pedsapa su kulesi nu Kadenan apeg'u sekanin a 'bpagagayan lun.
23 “Duan-duan nin den i sekanu a manga gulu nu pangitaban enggu sekanu a manga taw a lusud kanu lumpukan a Parisiyu, dikena senep sa atay i kabpagagama nu! Ka apia man su manga paninuf nu a nasabpet'u na pedsakatan nu ugaid'a ipedtalipenda nu su labi a balapantag kanu kasuguan a mana su kaenggay sa kawagib, su kakalimu enggu su katidtu. Dait man a menggay kanu sa edsakat ugaid'a di nu ipedtalipenda su langun nu entu a labi a balapantag a kasuguan. 24 Na nia nu kalagidan na pedsalalen nu su tagenek sia kanu 'bpaginemen nu inunta na 'bpelameden nu su unta! Sekanu a 'gkangaunutan na mana kanu man manga pisek!
25 “Duan-duan nin den i sekanu a manga gulu nu pangitaban enggu sekanu a manga taw a lusud kanu lumpukan a Parisiyu, dikena senep sa atay i kabpagagama nu! 'Bpelimpiuan nu su liu na tagayan nu enggu lampay nu ugaid'a sia sa ludep'in na napenu na da makalila enggu unga na di kagaga kemumpen kanu ginawa. 26 Sekanu a lusud kanu lumpukan a Parisiyu a mana manga pisek! Limpiu nu muna su ngin i sia sa ludep'u tagayan nu ka makaamung bun kalimpiuan su liu nin.
27 “Duan-duan nin den i sekanu a manga gulu nu pangitaban enggu sekanu a manga taw a lusud kanu lumpukan a Parisiyu, dikena senep sa atay i kabpagagama nu! Mana kanu bun manga lebeng a binintulan sa maputi taman sa mapia gaid mambu a 'bpagilayn i sia sa liu nin ugaid'a sia sa ludep'in na napenu-penu na manga suag'a minatay enggu langun pan na embalangan na kaledsik. 28 Na maitu ba i kalagidan nu, kagina nia kapegkailay nu manga taw na ikelas kanu ugaid'a nia nin kabantang na su kabpaguyag-uyag'u na pakasungkang kanu pangitaban enggu napenu kanu na kabpamagigiling.”
Su Kinadtalu nu Isa al-Masih kanu 'Gkangaunutan nu manga Yahudi pantag kanu Kasiksan nilan
29 Na pidtalu pamun nu Isa al-Masih i “Duan-duan nin den i sekanu a manga gulu nu pangitaban enggu sekanu a manga taw a lusud kanu lumpukan a Parisiyu, dikena senep sa atay i kabpagagama nu! Inumbalan nu sa tampatg su manga nabi enggu pibpalasan nu bun su tampat'u ikelas a manga taw 30 sa nia nu 'gkangadtalu na ‘U mana bu man ka 'bpaguyag-uyag tanu kanu timpu nu manga kalukesan tanu na di tanu silan amungan kanu kinapatuga nilan kanu lugu nu manga nabi.’ 31 Na nia nin maena na sekanu mismu i 'bpangimbenal lun sa manga muliataw kanu nu manga taw a minimatay kanu manga nabi! 32 Na patalus'u den mimasad su galebekan a linudsuan nu manga kalukesan nu. 33 Manga tupu nu nipay! Di nu man malipuas su kasiksan sa naraka. 34 Kagina ka maitu na nia ku madtalu sa lekanu na mapasugu aku san sa lekanu sa manga nabi, manga balaitungan a manga taw enggu manga gulu nu pangitaban. Na nia nu pakaidan kanilan na pangimatayan nu su ped, su ped menem na ipatutuk'u kanu kayu a pinambalawaga enggu su ped menem na pakapasangan nu mametay sia kanu manga pedsambayangan nu enggu pamugawn nu kanu apia endaw a dalepa. 35 Tembu ba kawagiban kanu den sa kinaigis'u lugu nu langun nu manga ikelas a taw sia sa dunia iganat pan kanu Habil a ikelas a taw taman den kanu wata nu Barakia a si Zakaria a inimatayan nuh sia kanu pageletan nu Suti a 'Bpagagaman enggu kanu pegkurbanan. 36 Na saben-sabenal a pedtalun ku sa lekanu i langun nu nia ba a nanggula na maningguma sia kanu manga taw sa saguna ba a nia a timpu.
Su Kapegkalidu na Ginawa nu Isa al-Masih kanu manga Taw sa Awrusalim
37 “Manga taw sa Awrusalim! Sekanu man i 'bpangimatay kanu manga nabi enggu 'bpamengel sa watu kanu manga sinugu san sa lekanu a sabapan na kapatay nilan. Nakapila-pila ku den sekanu pegkiugan 'bpelimud sa katuludu ku sa lekanu a mana bun kanu ina nu manuk a 'bpelekepan nin su manga pipis'in ugaid'a di kanu pegkiug. 38 Ilay nu! Ka taligkudan den nu Kadenan su dalepa nu. 39 Na pedtalun ku den ba a nia sa lekanu i di aku nu den mailay 'bpaluman nia tabia na mauma pan su gay a edtalun nu den i ‘Palihalan su pakauma a sinugu nu Kadenan.’ ”