Su Pantag kanu manga Kabaladusan nu Taw
13
Kanu entu demun ba a kutika na aden manga taw lu a pidtalu nilan kanu Isa al-Masih su pantag kanu manga taw sa Galili a pinangimatayan nu Pilatu sa timpu na kapegkurban nilan lu kanu Suti a 'Bpagagaman. Na nakadsimbul su lugu nilan kanu lugu nu manga ayam a ipegkurban nilan. 2 Na nia inisumpat'u Isa al-Masih na “Ngintu, nia nu kataw ka sabap kanu nanggula nilan a entu na labi a baladusa silan kumin kanu ped a taw sa Galili? 3 Dikena! Ugaid'a nia ku madtalu sa lekanu na dait a edtataubat kanu ka mamamatay kanu bun langun a pagidsan nilan. 4 Na su nanggula nu sapulu enggu walu kataw a entu a minatay lu sa Silaum a naudtangan nu malambeg a 'bpanandengan, na ngintu, nia nu kataw ka labi a baladusa silan kumin kanu ped a taw sa Awrusalim? 5 Dikena! Nia ku madtalu sa lekanu na dait a edtataubat kanu ka mamamatay kanu bun langun a pagidsan nilan.”6 Na pidtalu pan nu Isa al-Masih su nia a pakenalan kanilan a “Aden isa a mama a aden pinamula nin a kayu a igus lu kanu 'bpamumulanan nin sa ubas. Na kinakap'in su entu ka inilay nin u aden makua nin lun a unga. Ugaid'a dala natun nin. 7 Na nia nin pidtalu kanu pedtuganul sa entu na ‘Nakatelu lagun den i kapembabalingan ku sia sa kabpangilay sa unga nu kayu a nia, ugaid'a dala pamun 'gkatun ku. Na makin ka tibpad ka pakasikut bu.’ 8 Ugaid'a nia inisumpat'u pedtuganul na ‘Mapulu, di ka pan pedtibpad, ilayn ta pan sa nia ba a lagun, kakalan ku muna i embala-bala lun ka taguan ku sa makapagkasebud lun. 9 Ka basi munga den sa temundug a lagun. Ugaid'a amaika di pamun munga na entu pan ba ka tibpad ka.’ ”
Su Babay a Nabekut
10 Aden isa a gay a nangusiat su Isa al-Masih lu kanu walay a pedsambayangan nu manga Yahudi kanu Gay nu Kabpangintelenen. 11 Na aden mambu babay lu ba a nakasapulu enggu walu lagun den i kapapedsakit lun nu saitan. Na di makambetel edtindeg ka nabekut den sekanin. 12 Na guna mailay nu Isa al-Masih na tinawag'in ka nia nin lun pidtalu na “Babu, 'gkapia ka den kanu sakit'engka a nan.” 13 Na dinapenetan nin su babay. Na midsambuta demun i kinagkapia nin ka nakadtindeg den sa matidtu. Daka pinugi mambu nu babay su Kadenan. 14 Ugaid'a nalipunget su 'gkaunutan nu walay a pedsambayangan ka napagkapia su Isa al-Masih kanu Gay nu Kabpangintelenen. Na nia pidtalu nu 'gkaunutan a entu kanu manga taw na “Aden nem gay a ipenggalebek, na entu ba i kasia nu ka enggu kanu makapagkapia, dikena kanu Gay nu Kabpangintelenen.” 15 Na nia inisumpat'u Mapulu a su Isa al-Masih na “Sekanu a manga dikena senep sa atay i kabpagagama nin, dikena ba pembekalan nu su sapi nu atawa ka su kimar'u kanu Gay nu Kabpangintelenen ka enggu nu pakapainem? 16 Na su tupu nu Nabi Ibrahim a nia a babay na nakasapulu enggu walu lagun na pinayuk bu nu Datu na Giadsal sa kinapadsakit'in lun, na dikena ba dait a kabutawanan bun sekanin apia Gay nu Kabpangintelenen?”
17 Na kanu kinadtalu nu Isa al-Masih sa entu na nayan su manga 'bpagatu lun. Saleta na sangat a napia i ginawa nu manga taw sabap kanu pinggula nin a kangagaipan.
Su Pakenalan pantag kanu Lagas'u Mustasa
18 Na daka inidsa nu Isa al-Masih i “Ngin basi i palas'in atawa ka kalagidan kanu kapendatu nu Kadenan? 19 Na mana bun i nia su lagas'u 'gkamun a mustasa a inisaud'u mama kanu pamumulanan nin. Na minetu enggu migkasela taman sa mimbaluy a mana kasela na kayu a 'gkadsalagan na manga papanuk su manga sapak'in.”
Su Pakenalan pantag kanu Pakembang
20 Inidsa nu Isa al-Masih 'bpaluman i “Ngin basi i kalagidan ku kanu kapendatu nu Kadenan? 21 Nia nin kalagidan na mana bun su paidu bu a pakembang a inisimbul'u babay kanu inadum'in a manga tenga sa saku i kadakel'in a arina. Na kinemembang su langun nu entu ba a inadum'in.”
Su Masimpit a Bengawan
22 Na gagalu nu sia sa lalan su Isa al-Masih 'bpawang sa Awrusalim na 'bpamandun nin su manga taw lu kanu 'gkangaukitan nin a manga dalepa enggu manga siudad. 23 Na aden minidsa lun sa “Mapulu, ngintu, paidu bu a taw i makalipuas?” Na nia inisumpat'u Isa al-Masih na 24 “Paginapas'u i kaludep'u kanu masimpit a bengawan kagina nia ku madtalu sa lekanu na madakel man i 'bpaginapas lun 'bpeludep ugaid'a di silan pakaludep. 25 Kagina amaika embuat den su kigkuan kanu walay ka pamintuan nin den su bengawan na matag kanu bu makadtindeg lu sa liu a mapanampak'u su pintu sa nia nu madtalu na ‘Mapulu, bukati kami pan.’ Na nia nin isumpat na ‘Di ku sekanu kangatawan, di ku katawan u endaw kanu ebpun.’ 26 Na nia nu menem makasumpat na ‘Sekitanu bun namegkan enggu namanginem taman sa nakapamandu ka pan lu sa lekami.’ 27 Ugaid'a 'bpalumanan nin edtalu i ‘Di ku sekanu kangatawan, di ku katawan u endaw kanu ebpun. Awa kanu sia langun, manga taw a daluaka.’
28 “Na makapaguguliang kanu den taman sa makapangingiteg kanu ka mailay nu su Nabi Ibrahim, su Nabi Iskak enggu su Nabi Yakub apeg den nu ped a manga nabi a lu silan sa sulega a pendatuan nu Kadenan na sekanu menem na paawan kanu. 29 Na aden pan ped a manga taw i mamakauma a ebpun sa sebangan enggu sedepan enggu ebpun sa ilud enggu laya a mamung keman kanu kanduli sia kanu kapendatu nu Kadenan. 30 Na saben-sabenal a pedtalun ku sa lekanu i aden kanu manga taw saguna a nakatagu sa ulian i makatagu silan sa unan enggu su manga nakatagu menem sa unan na makatagu menem sa ulian.”
Su Kinalidu na Ginawa nu Isa al-Masih kanu Awrusalim
31 Na kanu entu ba a kutika na aden namakauma a manga taw a lusud kanu lumpukan a Parisiyu. Na nia nilan pidtalu kanu Isa al-Masih na “Awa ka den sia, ka pegkiugan ka 'bpagimatay nu Datu Hirud.” 32 Na nia pidtalu nu Isa al-Masih kanilan na “Edtalu nu sa mana nipay a entu i palangay nin i ‘'Bpamugaw aku pan sa manga saitan enggu papegkapia aku pan sa aden sakit'in. Na maitu bun ba i enggulan ku namag na namisendaw ku pan mapasad i langun na penggalebeken ku a nia.’ 33 Ka nasisita a temalus aku kanu lakaw ku saguna, namag enggu namisendaw ka di mapakay a matay su nabi sa liu na Awrusalim.
34 “Manga taw sa Awrusalim! Sekanu man i 'bpangimatay kanu manga nabi enggu 'bpamengel sa watu kanu manga sinugu san sa lekanu a sabapan na kapatay nilan. Nakapila-pila ku den sekanu pegkiugan 'bpelimud sa katuludu ku sa lekanu a mana bun kanu ina nu manuk a 'bpelekepan nin su manga pipis'in ugaid'a di kanu pegkiug. 35 Ilay nu, tagaken den nu Kadenan su dalepa nu. Na pedtalun ku den ba a nia sa lekanu i di aku nu den mailay 'bpaluman nia tabia na mauma pan su gay a edtalun nu den i ‘Palihalan su pakauma a sinugu nu Kadenan.’ ”