Su Pakenalan pantag kanu Embalangan na Lupa a Sinaudan sa Uni
13
Na kanu entu ba a gay na linemiu su Isa al-Masih kanu walay ka minangay kanu ligid'u lanaw taman sa nagagayan lu. 2 Na madakel a benal a taw i mindidilimudan lu kanu ubay nin tembu ba nageda sekanin kanu awang ka lu ba sekanin nagagayan. Saleta mambu na su madakel a taw na lu demun silan pedtindeg kanu ligid'u lanaw. 3 Na madakel i inipamandu nin kanilan sa ukit a pakenalan. Na sia kanu kabpamandu nin na pidtalu nin kanilan i “Pakikineg kanu, aden kun mama a linemu sa dalem ka sinemaud sa uni. 4 Na sia kanu kapedsaud'in na aden nangaulug sia kanu ligid'u lalan na guna mauma nu manga papanuk na tinuka nilan su entu ka kinan nilan. 5 Na aden menem nangaulug sia kanu manga watu a natangguban na paidu a lupa na nangagan a benal minetu kagina manipis bu i lupa nin. 6 Na guna makakayang-kayang su senang na nalanes taman sa nagangu kagina da gaid makandalid. 7 Aden menem nangaulug lu kanu lupa a aden manga utan nin a sudangen na guna su migkasela su manga utan na natangguban nin su pamulan. 8 Aden menem nangaulug lu kanu mapia a lupa. Na namakaunga su entu sa mapia, aden nakaunga sa telupulu takep, aden bun nakaunga sa nempulu takep taman sa aden nakaunga sa magatus takep.9 “Na su entain i aden tangila nin a pakakineg na makikineg sa mapia.”
Su Sabapan a Kabpamandu nu Isa al-Masih sa Ukit a Pakenalan
10 Na guna su nakasupeg sa lekanin su 'bpamangunut lun na inidsa nilan lun i “Ngintu ka nia nengka kabpamandu kanilan na sa ukit a pakenalan?” 11 Na nia inisumpat'u Isa al-Masih kanilan na “Kagina sekanu na inenggan kanu sa kasabut kanu inipagena a makapantag kanu kapendatu nu Kadenan ugaid'a silan na dala silan enggi sa kasabut sa entu. 12 Na apia entain i makikineg kanu kadtalu nu Kadenan na kadsisinggumanan pan su kasabut a aden den sa lekanin taman sa edsusubela pan ugaid'a su entain menem i dili makikineg na su paidu a aden den sa lekanin na kuan pamun su entu. 13 Ka nia ba i sabap'in i kabpamandu ku kanilan sa ukit a pakenalan ka matag silan 'bpagilay na di silan pakailay enggu matag silan 'bpakikineg na di silan pakakineg taman sa di silan pakatuntay. 14 Na natuman sia kanilan su kadtalu nu Nabi Isayas sia kanu kitab a
‘Matag silan 'bpamakikineg 'bpamikal na dala 'gkatuntayan nilan.
Matag silan 'bpangingilay 'bpamikal na dala 'gkailay nilan.
15 Kagina su nia a manga taw na malegen den makatuntay.
Malegen makakineg su manga tangila nilan
enggu di nilan pembelaten su mata nilan.
Ka u dikena bu man maitu na makailay su mata nilan,
makakineg su tangila nilan enggu makakenal su pamikilan nilan
taman sa edtaubat silan enggu pagkapian ku silan.’a
16 Ugaid'a sangat den i kapia nin sa lekanu ka pakailay su mata nu enggu pakakineg su tangila nu. 17 Saben-sabenal a pedtalun ku sa lekanu i madakel kanu manga nabi enggu kanu manga taw a ikelas i 'gkapaginagkay nilan i kailay nilan kanu ngin i 'gkailay nu ugaid'a dala nilan mailay, enggu kakineg'ilan kanu ngin i 'gkakineg'u ugaid'a dala nilan makineg.
Su Maena nu Pakenalan pantag kanu Inisaud a Uni
18 “Kagina ka maitu na pakikineg'u su maena nu pakenalan pantag kanu sinemaud sa uni. 19 Su ligid'u lalan a naulugan nu uni na entu ba su manga taw a 'bpamakikineg kanu kadtalu pantag kanu kapendatu nu Kadenan ugaid'a da nilan tuntayi su entu. Daka linemu su Datu na Giadsal ka kinua nin su kadtalu a inisaud kanu pamusungan nilan. 20 Na su manga watu a natangguban na paidu a lupa a naulugan nu uni na entu ba menem su manga taw a 'bpamakikineg kanu kadtalu nu Kadenan. Na endaw i kinakineg'ilan lun na tinalima nilan taman sa napia a benal i ginawa nilan. 21 Ugaid'a da gaid endalid su kadtalu nu Kadenan a lu kanilan, tembu dala silan 'gkauget kanu kabpaginugut'ilan ka guna makatingguma su kamalasayan atawa ka kapamungkaid sabap kanu kadtalu nu Kadenan na entu bun ba na taligkudanan nilan su paginugut'ilan. 22 Na su naulugan menem'u uni a aden manga utan nin a sudangen na entu ba menem su manga taw a 'bpamakikineg kanu kadtalu nu Kadenan ugaid'a sabap kanu kamutuan kanu sagugunay a timpu enggu su kasimpang sabap kanu kakawasan na nabausan su kadtalu nu Kadenan taman sa dala makaunga. 23 Ugaid'a su mapia a lupa a naulugan nu uni na entu ba menem su manga taw a 'bpamakikineg kanu kadtalu nu Kadenan enggu pedtuntayan nilan su entu sa mapia taman sa namakaunga silan. Na aden nakaunga sa telupulu takep, aden bun nakaunga sa nempulu takep taman sa aden nakaunga sa magatus takep.”
Su manga Pakenalan pantag kanu Kapendatu nu Kadenan
24 Nia pan pidtalu nu Isa al-Masih kanu madakel a taw sa ukit a pakenalan na “Su kapendatu nu Kadenan na mana bun su pinggula nu mama a sinemaud sa mapia a lagas lu kanu 'bpangangawidan nin. 25 Na gagalu na kapedtulug'u manga taw na nakauma su kuntela ka sinemaud bun sa lagas'a sagiket lu kanu manga inisaud a lagas'a bantad, entu pan ka minawa. 26 Na guna su linemeteb den su lagas a mapia taman sa 'bpagunga den na nailay bun mambu su manga sagiket. 27 Daka sinupegan nu manga ulipen su kigkuan ka pidtalu nilan lun i ‘Datu, dikena ba mapia a lagas su inisaud'engka? Endaw basi nakabpun su manga sagiket a entu lu?’ 28 Na nia nin inisumpat kanilan na ‘Su kuntela i sinemaud sa entu.’ Daka nia pidtalu sa lekanin nu manga ulipen nin na ‘Kiugan nengka a 'bpawangan nami mamadtud?’ 29 Ugaid'a nia nin pidtalu na ‘Di nu den, ka gagalu na kapamadtud'u lun na malalagit'u bun su manga bantad. 30 Padtaday nu den a pegkasela kaped'u manga bantad taman sa kasabpet ka sa kapagagani lun na edtalun ku bu kanu 'bpamagagani i kuan nilan muna su manga sagiket ka uyunen nilan entu pan ka tutungen. Ugaid'a su manga bantad na limuden nilan ka iten nilan lu kanu kamalig ku.’ ”
31 Nia pan ped a pakenalan a inipamandu nin kanilan na “Su kapendatu nu Kadenan na mana bun su lagas'u 'gkamun a mustasab a inisaud'u mama kanu 'bpangangawidan nin. 32 Na matag i nia manaut a benal a lagas kanu langun nu lagas na u pegkasela den na 'gkabaluy a masela kanu langun na 'gkamun taman sa 'gkabaluy a mana kayu tembu ba pedsalagan nu manga papanuk su manga sapak'in.”
33 Na aden pamun pakenalan a inipamandu nin kanilan pantag kanu kapendatu nu Kadenan sa nia nin pidtalu na “Su kapendatu nu Kadenan na mana bun su paidu bu a pakembang a inisimbul'u babay kanu inadum'in a manga tenga sa saku i kadakel'in a arina. Na kinemembang su langun nu entu ba a inadum'in.”
34 Na su langun nu nia na inipamandu nu Isa al-Masih kanu madakel a taw sa ukit bu na pakenalan, na di sekanin 'bpamandu u dikena sa ukit a pakenalan. 35 Na natuman sia ba su kadtalu nu nabi sia kanu kitab a
“Nia ukit a kapamandu ku kanilan na sa ukit a pakenalan. Ipayag ku kanilan su da makapayag iganat pan kanu kinapangaden.”c
Su Maena nu Pakenalan pantag kanu Bantad enggu Sagiket
36 Daka ginanatan nu Isa al-Masih su madakel a taw ka linemudep kanu walay. Na sinupegan sekanin nu 'bpamangunut lun ka pidtalu nilan lun i “Edsinantal ka pan sa lekami su maena nu pakenalan pantag kanu bantad enggu sagiket lu kanu 'bpangangawidan.” 37 Na pidsinantal mambu nu Isa al-Masih kanilan sa nia nin pidtalu na “Su sinemaud kanu mapia a lagas na su Kaka nu Manusia. 38 Su 'bpangangawidan na su dunia. Su mapia a lagas na silan su manga taw a pendatuan nu Kadenan.d Ugaid'a su manga sagiket na silan su manga taw a pendatuan nu Saitan.e 39 Su kuntela a sinemaud kanu lagas'u sagiket na su Saitan enggu su kasabpet na su Mauli a Gay. Su 'bpamagagani menem na silan su manga malaikat. 40 Na mana bun su kabpelimud kanu manga sagiket asal'a 'gkatutung kanu apuy, na maitu bun ba i manggula sia kanu Mauli a Gay. 41 Su Kaka nu Manusia na sugun nin su manga malaikat'in sa limuden nilan su langun nu kadsabapan nu kapendusa enggu su manga taw a penggalebek sa kabaladusan sia kanu pendatuan nin 42 ka ipaidtug'in lu kanu pegkalaw-kalaw a apuy a 'bpamanguliang sa matanug i taw nin enggu 'bpamegkiget i ngipen nin. 43 Na su manga ikelas menem a taw na pamedsigay a mana den silan kasigay nu senang lu kanu pendatuan nu Ama nilan a su Kadenan. Na su entain i aden tangila nin a pakakineg na makikineg sa mapia.
Su Ped a manga Pakenalan pantag kanu Kapendatu nu Kadenan
44 “Su kapendatu nu Kadenan na mana bun su nakatagu a kakawasan lu kanu 'bpangangawidan a natun nu mama ugaid'a initagu nin 'bpaluman. Na sangat a napia i ginawa nin taman sa minuli ka pibpasa nin su langun nu kaaden nin ka pinamasa nin su entu a 'bpangangawidan. 45-46 Nia pan ped a ibaratan kanu kapendatu nu Kadenan na mana bun su balaalaga a muntia a 'bpanuntulen nu padagang. Na guna nin matun su balaalaga sa langun a muntia na minuli ka pibpasa nin su langun nu kaaden nin ka pinamasa nin su entu a muntia.”
47 Na pidtalu pan nu Isa al-Masih i “Su kapendatu nu Kadenan na mana su biala a inibiala nu 'bpanginseda kanu ig a nakakua sa langun na embalangan na seda. 48 Na ginuyud'ilan lu sa tepad su biala guna su napenu den na seda ka pinamili nilan su langun nu mapia nu seda ka inibetad'ilan kanu bukag, na su langun na mawag'u seda menem na inidtug'ilan. 49 Na maitu bun i manggula sia kanu Mauli a Gay. Su manga malaikat na makatingguma sia ka isenggay nilan kanu manga taw a luyud kanu Kadenan su manga taw a luyud kanu Saitan 50 ka idtug'ilan lu kanu pegkalaw-kalaw a apuy a 'bpamanguliang sa matanug i taw nin enggu 'bpamegkiget i ngipen nin.”
51 Na inidsa nu Isa al-Masih kanu 'bpamangunut lun i “Ngintu, 'gkatuntayan nu bun su langun nu pedtalun ku a nia?” Na nia nilan inisumpat na “Uway, 'gkatuntayan nami bun.” 52 Daka nia pidtalu nu Isa al-Masih kanilan na “Kagina ka maitu na u aden gulu na pangitaban a mapamandu taman sa malusud kanu kapendatu nu Kadenan na nia nin kailing-ilingan sia kanu kabpamandu nin na mana bun su kigkuan kanu walay a katawan nin mapaliu kanu 'bpanaguan nin su bagu a kaaden nin enggu su labing a kaaden nin.”
Su Isa al-Masih na dala Talima lu kanu Dalepa nin demun
53 Guna mapasad'u Isa al-Masih mamandu su manga pakenalan a entu na ginemanat sekanin lu. 54 Na linemu sekanin kanu dalepa nin demunf ka namamandu lu kanu walay a pedsambayangan nilan. Na sangat a nangagaip su manga taw lu taman sa nia nilan 'gkangadtalu na “Endaw nakua nu mama a nia su kataw nin enggu su kapegkagaga nin penggalebek sa kangagaipan? 55 Dikena ba sekanin su wata nu panday enggu nia nin ina na si Mariam? Su manga suled'in a manga mama na si Yakub, Yusup, Simiun enggu Yahuda? 56 Su manga suled'in menem a babay na kaped tanu bun sia? Amaika maitu na endaw basi nakua nu nia a mama su langun nu nia a kataw nin?” 57 Guna su maitu na nasakit i ginawa nilan lun. Daka nia pidtalu nu Isa al-Masih kanilan na “Apia endaw na 'bpagadatan su nabi nia tabia na kanu dalepa nin demun enggu kanu pamilia nin.” 58 Kagina ka maitu na da gaid enggula lu sa kabarakatan su Isa al-Masih sabap sa kada na salig'ilan.