Su manga Pakenalan makapantag kanu Kadtalu nu Kadenan
4
Na linemudsu menem mamandu su Isa al-Masih lu kanu ligid'u lanaw nu Galili. Na madakel a benal a taw i mindidilimudan lu kanu ubay nin tembu ba nageda sekanin kanu awang ka lu ba sekanin nagagayan. Na saleta mambu na su madakel a taw na lu bu silan kanu ligid'u lanaw. 2 Na madakel i inipamandu nin kanilan sa ukit a pakenalan. Na kanu kabpamandu nin na nia nin pidtalu kanilan na 3 “Pakikineg kanu sa mapia! Aden kun mama a linemu sa dalem ka sinemaud sa uni. 4 Na sia kanu kapedsaud'in na aden naulug sia kanu ligid'u lalan na guna mauma nu manga papanuk na kinan nilan. 5 Na aden menem naulug sia kanu manga watu a natangguban na paidu a lupa na nangagan a benal minetu kagina manipis bu i lupa nin. 6 Na guna makakayang-kayang su senang na nalanes taman sa nagangu kagina da gaid makandalid. 7 Na aden menem naulug lu kanu lupa a aden utan nin a sudangen na guna su migkasela su manga utan na natangguban nu manga utan su pamulan taman sa dala makaunga. 8 Na su ped menem na lu naulug kanu mapia a lupa na minetu, migkasela taman sa minunga sa mapia. Na aden minunga sa telupulu takep, aden menem minunga sa nempulu takep enggu aden bun minunga sa magatus takep.” 9 Na nia nin pan pidtalu kanilan na “Apia entain i aden tangila nin a pakakineg na makikineg sa mapia.”10 Na guna su natalipulu den su Isa al-Masih enggu su sapulu enggu dua a pinamili nin apeg den nu manga ped pan a 'bpamakikineg lun na inidsa nilan sa lekanin u ngin i maena nu manga pakenalan a entu a inipamandu nin. 11 Nia nin pidtalu kanilan na “Inipayag den sa lekanu su nakapagena a makapantag kanu kapendatu nu Kadenan. Ugaid'a kanu ped a manga taw a di 'bpamaginugut na ibpamandu ku kanilan su langun sa ukit a pakenalan. 12 Na natuman sia ba su nakadalem kanu kitab a
‘Matag silan 'bpangingilay 'bpamikal
na dala 'gkailay nilan,
matag silan 'bpamakikineg 'bpamikal
na dala 'gkatuntayan nilan
ka u dikena maitu
na basi edtaubat bun silan
taman sa maampun bun.’a”
13 Na nia nin pan pidtalu kanilan na “Amaika di nu 'gkatuntayan su nia a pakenalan na panun pan i katuntay nu kanu ped pan a manga pakenalan? 14 Na su inisaud'u mama na su kadtalu nu Kadenan. 15 Na su ligid'u lalan a naulugan nu uni na mana bun su manga taw a sinaudan kanu kadtalu nu Kadenan. Na kanu kinakineg'ilan kanu kadtalu nu Kadenan na namagayas su Datu na Giadsal lemu ka kinua nin su kadtalu nu Kadenan a inisaud lu kanilan. 16 Su ped menem na mana bun su watu a natangguban na paidu a lupa a naulugan nu uni. Na endaw i kinakineg'ilan kanu kadtalu nu Kadenan na tinalima nilan taman sa napia a benal i ginawa nilan. 17 Ugaid'a dala gaid endalid su kadtalu nu Kadenan lu kanilan tembu dala silan 'gkauget kanu kabpaginugut'ilan ka endaw i katingguma nu kamalasayan atawa ka kapamungkaid sabap kanu kadtalu nu Kadenan na entu bun ba na taligkudanan nilan su paginugut'ilan. 18 Na su ped menem a taw na mana su lupa a aden utan nin a sudangen a naulugan nu uni. Nakikineg silan kanu kadtalu nu Kadenan 19 ugaid'a guna makatingguma su kamutuan kanu sagugunay a timpu, su kasimpang sabap kanu kakawasan enggu su kalilini kanu kaduduniay na nabausan su kadtalu nu Kadenan taman sa dala makaunga. 20 Ugaid'a su ped menem a taw na mana su mapia a lupa a naulugan nu uni. Nakikineg silan enggu tinalima nilan su kadtalu nu Kadenan taman sa nakaunga sa mapia, aden minunga sa telupulu takep, aden menem minunga sa nempulu takep enggu aden bun menem minunga sa magatus takep.”
21 Na pidtalu bun nu Isa al-Masih kanilan i “Ngintu, su palitan a tinutudan na sia ibetad kanu aung'u katri udi na dapengan? Dikena basi maitu ka su palitan a tinutudan na sia dait a ibetad kanu 'bpanaguan lun. 22 Na maitu bun ba su kandatu nu Kadenan a nakapagena, na di bun mauget na makapayag bun. 23 Na apia entain i aden tangila nin a pakakineg na makikineg sa mapia.”
24 Na nia pan pidtalu nu Isa al-Masih kanilan na “Itagu nu sa ginawa su ngin i 'gkakineg'u. Na u ngin i kadakel a inggay nengka na maitu bun ba i kadakel a matalima nengka enggu kaumanan pan su ngin i natalima nengka den. 25 Nia nin maena na apia entain i makikineg kanu panduan ku na edsisinggumanan pan su inenggay lun a katuntay. Ugaid'a apia entain menem i di makikineg kanu panduan ku na su paidu a katuntay nin na kuan pamun su entu.”
Su manga Pakenalan makapantag kanu Kapendatu nu Kadenan
26 Na nia pidtalu nu Isa al-Masih na “Su kandatu nu Kadenan na mana bun su 'bpanudtulen nu nia a pakenalan a ‘Aden kun mama a pedsaud sa uni kanu lupa. 27 Na guna su nakasaud'in den su uni na magabi sa malamag na miniga embangun bu sekanin taman sa da nin katawi u panun i kinaetu nin taman sa kinagkasela nin. 28 Na su lupa den mismu i napagkasela enggu napaunga kanu uni a inisaud'in. Pagan-paganay na linemeteb taman sa migkasela entu pan ka minunga taman sa migkalutu su unga nin. 29 Na guna su mapakay den a pagaganin na namagayas sekanin lemu a minit sa kumpay ka kinumpay nin sabap sa nauma den su timpu nu kabpagagani.’ ”
30 Na nia nin pan pidtalu kanilan na “Ngin basi i kalagidan tanu kanu kapendatu nu Kadenan? Atawa ka ngin basi i pakenalan a dait a usalen ku sa kapatuntay ku lun sa lekanu? 31 Na mana bun man i nia kanu lagas'u 'gkamun a mustasa a inipamula kanu lupa. Na matag i nia isa kanu langun nu manganaut a lagas sia sa dunia 32 na u makapamula den kanu lupa na 'bpagetu taman sa pegkasela enggu 'gkabaluy a masela sa langun na 'gkakamun. Na pedsapak i nia sa mangasela taman sa mapakay a kadsalagan enggu kasilungan na manga papanuk.” 33 Na ibpamandu nin bun kanilan su kandatu nu Kadenan sa ukit a madakel pan a manga pakenalan a maya ba kanu manga pakenalan a nia sa endaw taman i kapakikineg'ilan lun. 34 Na nia ukit a kabpamandu nin kanilan na sa ukit bu na pakenalan ugaid'a amaika 'gkatalipulu bun den silan kanu 'bpamangunut lun na pedsinantalen nin kanilan su langun-langun.
Su Kinasapal'u Isa al-Masih kanu Mabandes a Sambel
35 Na kanu kinasedep'u senang kanu entu bun ba a gay na pidtalu nu Isa al-Masih kanu 'bpamangunut sa lekanin i “Lemipag tanu.” 36 Daka ginanatan nilan su madakel a taw ka nageda silan kanu awang a 'bpagagayanan nu Isa al-Masih ka linemipag silan kanu lanaw kaped'u Isa al-Masih. Na aden bun manga ped a awang a pinagedan nu manga taw a kaped'ilan. 37 Daka nakatingguma i mabandes a benal a sambel. Na 'gkalumpak'u mangasela a bagel su awang taman sa sama bun den di 'gkapenu na ig su awang. 38 Saleta mambu na pedtulug su Isa al-Masih lu kanu ulinan nu awang a minulun den 'bpia. Daka pinukaw nilan sekanin ka pidtalu nilan sa lekanin i “Gulu, nginan, da demun sa leka i 'gkanggula tanu a nia? 'Gkaled tanu den.” 39 Na mimbangun sekanin ka sinapalan nin su sambel enggu nia nin pidtalu kanu lanaw na “Lenek ka san! Patana ka.” Na tinemelen mambu su sambel enggu lineminaw mambu sa mapia su lanaw. 40 Na nia nin pidtalu kanu 'bpamangunut lun na “Nginan ka 'gkangagilekan kanu? Dala pamun salig'u?” 41 Daka kinukuk silan na gilek taman sa nia nilan nakapamagidsaya na “Entain besen i taw a nia, apia su sambel enggu lanaw na 'bpaginugut sa lekanin?”