Su Kinapagkapia nu Isa al-Masih kanu Taw a aden Sakit'in a Debpig
8
Na guna den makambaba su Isa al-Masih kanu bakulud na madakel a benal a taw i midtatanggunut sa lekanin. 2 Daka aden mama a pedsakit sa debpiga i sinemupeg kanu Isa al-Masih ka sinemugiud kanu kaadapan nin ka nia nin lun pidtalu na “Hu Mapulu, amaika miug ka na makapagkapiab aku nengka.” 3 Na inami nu Isa al-Masih su mama sa nia nin lun pidtalu na “Pegkiug aku, 'gkapia ka den saguna.” Na midsambuta demun i kinagkapia nu mama a entu. 4 Na nia pidtalu lun nu Isa al-Masih na “Ingati ka a benal i madtalu nengka i nia kanu apia entain ugaid'a ganat ka, ka pailay ka kanu 'bpangurban enggu 'gkurban ka a mana bun su inisugu nu Nabi Musa asal'a mailay nu manga taw i nasuti ka den.”Su Salig'u Kapitan nu Sundalu a Dikena-Yahudi
5 Guna su nakauma su Isa al-Masih sa Kapurnaum na aden kapitan na sundalu a sinemupeg lun ka inipamagayuk'in lun i 6 “Mapulu, su 'bpanunugun ku na pendeket bu sa ikam ka di pakalakaw enggu 'gkasakitan a benal sekanin.” 7 Nia pidtalu nu Isa al-Masih sa lekanin na “Uway, lemu aku ka pagkapian ku sekanin.” 8 Na nia inisawal'u kapitan nu sundalu na “Mapulu, di aku a benal makadait a 'bpawangan nengka pan i walay ku. Ugaid'a edtalun nengka bu man i 'gkapia su panunugun ku na 'gkapia den sekanin. 9 Na katawan ku i entu ka apia saki na aden pan mapulu ku a pedsugu sa laki enggu aden bun manga sundalu ku a saki i pegkakataw lun, na amaika edtalun ku kanu isa kanilan i ‘Lu ka’ na lemu sekanin, u edtalun ku menem kanu ped i ‘Sia ka’ na semia sekanin. Na u edtalun ku menem kanu ulipen ku i ‘Enggalebek ka i nia’ na enggalebeken nin.”
10 Guna makineg'u Isa al-Masih su nia na nagaip sekanin. Na nia nin nadtalu kanu manga taw a pedtatanggunut lun na “Saben-sabenal a dala aku pamun makailay sa taw sia sa dalepa a Israil a maya ba i kasela na salig'in. 11 Edtalun ku sa lekanu na madakel a taw i mamakauma ebpun sa sebangan enggu sedepanc i mamung keman kanu kandulid kaped'u Nabi Ibrahim, Iskak enggu Nabi Yakub sia kanu kandatu nu Kadenan. 12 Ugaid'a madakel kanu manga taw a dait a malusud kanu kandatu nu Kadenane i makaidtug lu kanu kalibutengan a 'bpamanguliang sa matanug i taw nin enggu 'bpamegkiget i ngipen nin.”
13 Na nia pidtalu nu Isa al-Masih kanu kapitan nu sundalu na “Uli ka den, ka manggula su 'bpangenin nengka sabap kanu salig'engka.” Saleta mambu na migkapia den su panunugun kanu entu demun ba a kutika.
Su Kinapagkapia nu Isa al-Masih kanu 'Bpamedsakit enggu su manga Inasukan na Saitan
14 Na guna lu su Isa al-Masih kanu walay ni Pitru na nailay nin su panugangan ni Pitru a babay a 'bpagiga ka pegkayaw a benal. 15 Daka inami nin su lima nu panugangan ni Pitru na kanu entu demun ba na naawa su mayaw nin taman sa nakambangun sekanin ka tinalagadan nin pan su Isa al-Masih. 16 Na kanu kapegkagabi na madakel i pinananggit lu sa lekanin a inasukan na saitan. Na pidtaluan nin bu su manga saitan na minawa den silan taman sa pinagkapia nin bun su langun nu 'bpamedsakit lu.
17 Kagina ka maitu na natuman su pidtalu nu Nabi Isayas sia kanu kitab a “Iniawa nin su manga sakit tanu enggu inaku nin su penggedamen tanu.”f
Su Dua Kataw a Pegkiug 'Bpagunut kanu Isa al-Masih
18 Guna mailay nu Isa al-Masih i namakalibet sa lekanin su madakel a manga taw na inisugu nin kanu manga tagapeda nin i lemipag silan kanu lanaw. 19 Saleta mambu na sinemupeg sa lekanin su gulu nu pangitaban sa nia nin pidtalu kanu Isa al-Masih na “Gulu, munut aku sa leka sa apia endaw ka 'bpawang.” 20 Na nia pidtalu nu Isa al-Masih sa lekanin na “Su manga asu sa damakayu na aden manga pesu nilan a kapangintelenan enggu su manga papanuk sa kawang-kawangan na aden manga salag'ilan a kapangintelenan ugaid'a su Kaka nu Manusia na dala dalepa nin a kapangintelenan nin.” 21 Nia menem pidtalu nu ped kanu 'bpamangunut lun na “Mapulu, pauli aku pan muna ka apasen ku pan lemebeng su ama ku.” 22 Ugaid'a nia inisumpat'u Isa al-Masih sa lekanin na “Isalig'engka den kanu namamatay i kalebeng'ilan kanu namamatay,g unut ka den sa laki.”
Su Kinapatelen nu Isa al-Masih kanu Sambel enggu Bagel
23 Na nageda su Isa al-Masih enggu su 'bpamangunut lun kanu awang. 24 Da ka pan ba ka nakatingguma lu kanu lanaw su sangat i kabagel'in a sambel taman sa sama bu di pakageled'u bagel su awang'ilan ugaid'a su Isa al-Masih na pedtulug bun. 25 Daka pinukaw nilan su Isa al-Masih ka pidtalu nilan lun i “Mapulu, ilipuas kami nengka, 'gkaled tanu den!” 26 Na nia pidtalu nu Isa al-Masih kanilan na “Nginan ka 'gkagilekan kanu? Malubay a benal i salig'u!” Daka midtindeg su Isa al-Masih ka sinapalan nin su sambel enggu su bagel taman sa lineminaw sa mapia su lanaw. 27 Na nangagaip silan langun taman sa nakapamagidsaya nilan i “Entain a taw i nia? Apia su sambel enggu bagel na 'bpaginugut lun.”
Su Kinapagkapia nu Isa al-Masih kanu Dua Kataw a Mama a Inasukan na manga Saitan
28 Na guna den makalipag su Isa al-Masih enggu su 'bpamangunut lun kanu dalepa nu manga taw a Gadarah na sinumbak sekanin nu dua kataw a inasukan na saitan a lu nakabpun kanu 'bpamelebengan. Na su dua kataw a nia na pakagkaid a benal tembu dala pakatika lu 'bpagukit. 29 Daka nia nilan pidtalu sa matanug kanu Isa al-Masih na “Hu Tunggal'u Kadenan na di kami nengka den 'bpelusudi. Ngintu, sinemia ka asal'a lasayn kami nengka sa apia da pan mauma su timpu?” 30 Saleta na aden madakel a benal a taw sa lupai a papegkanen lu kanu dikena bun gaid mawatan kanilan. 31 Na inipamagayuk'ilan kanu Isa al-Masih i “Amaika bugawn kami nengka na lu kami nengka den paasuk kanu entu a manga taw sa lupa.” 32 Na nia inisumpat'u Isa al-Masih kanilan na “Lu kanu den!” Daka minawa mambu su manga saitan ka lu den silan minasuk kanu manga taw sa lupa. Na da ka pan ba ka su madakel a taw sa lupa na namakadtatalaguy silan lu kanu matibeng a bakulud taman sa namakatibpu silan kanu lanaw enggu nangaled. 33 Guna su maitu na midtatalaguy mamagayas su manga pedtuganul kanu manga taw sa lupa ka linemu silan kanu siudad ka inipanudtul'ilan kanu manga taw su langun na nanggula apeg den nu nanggula nu dua kataw a entu a inasukan na manga saitan. 34 Daka nameliu kanu siudad su langun na manga taw asal'a mailay nilan su Isa al-Masih. Na guna nilan mailay sekanin na inipamagayuk'ilan lun i ganatan nin den su inged'ilan.