Su Kinaunut'u manga Babay kanu Isa al-Masih sa kanu Kinapangusiat'in
8
Ulian nu entu na linapat'u Isa al-Masih su embala-bala a dalepa lu magidsan pan i masela atawa ka manaut a dalepa ka inipangusiat'in su Mapia a Tutuma pantag kanu kapendatu nu Kadenan a kaped'in su sapulu enggu dua a pinamili nin. 2 Na minunut bun sa lekanin su ped kanu manga babay a pinagkapia nin i sakit'in enggu inawan nin sa saitan. Na su manga babay a entu na si Mariam a binedtuan bun sa Magdalina a su inasukan pan nu pitu kataw a saitan, 3 si Yuhana a kaluma ni Kusa a 'gkasaligan kanu tulugan nu Hirud, apeg den ni Susana enggu su manga ped pan a babay. Na silan i tinemabang kanu manga nasisita nu Isa al-Masih enggu su 'bpamangunut lun.Su Pakenalan pantag kanu Embalangan nu Lupa a Sinaudan sa Uni
4 Na guna su pedtundug-tundug den i kapegkauma nu madakel a taw a 'bpelu sa lekanin a ebpun den kanu embala-bala a dalepa na nia nin pidtalu sa ukit a pakenalan na 5 “Aden mama a linemu sa dalem ka sinemaud sa uni. Na sia kanu kapedsaud'in na aden nangaulug sia kanu ligid'u lalan. Na nadakudak enggu kinan bu nu manga papanuk. 6 Aden menem nangaulug sia kanu manga watu a natangguban na paidu a lupa. Na sia kanu kabpagetu nin na nagangu kagina manipis i lupa nin. 7 Na aden menem naulug lu kanu lupa a aden manga utan nin a sudangen na migkasela su manga utan kaped'u pinamula taman sa natangguban nin su pamulan. 8 Na su ped menem na lu nangaulug kanu mapia a lupa. Na minetu mambu taman sa nakaunga sa nakamagatus takep.”
Na nia pan pidtalu nu Isa al-Masih sa matanug na “Apia entain i aden tangila nin a pakakineg na makikineg sa mapia.”
Su Maena nu Pakenalan
9 Na inidsa lun nu 'bpamangunut sa lekanin u ngin i maena nu pakenalan nin a entu. 10 Na nia inisumpat'u Isa al-Masih na “Inenggan kanu sa kasabut kanu nakapagena a makapantag kanu kapendatu nu Kadenan. Ugaid'a kanu ped a manga taw a di 'bpamaginugut na ibpamandu ku kanilan sa ukit a pakenalan. Na natuman sia ba su nakadalem kanu kitab a
‘Matag silan 'bpangingilay na dala 'gkailay nilan,
matag silan 'bpamakikineg na dala 'gkatuntayan nilan.’a
11 “Na nia maena nu pakenalan a entu na su manga uni na entu ba su kadtalu nu Kadenan. 12 Na su ligid'u lalan a naulugan nu manga uni na entu ba su manga taw a 'bpamakikineg kanu kadtalu nu Kadenan. Na guna lu su Datu na Giadsal na kinua nin su kadtalu nu Kadenan kanu pamusungan nilan ka enggu di silan makapaginugut enggu di malipuas. 13 Na su watu menem a natangguban na paidu a lupa a naulugan nu uni na entu ba menem su manga taw a 'bpamakikineg kanu kadtalu nu Kadenan. Na endaw i kinakineg'ilan kanu kadtalu nu Kadenan na tinalima nilan taman sa napia a benal i ginawa nilan. Ugaid'a dala gaid endalig su kadtalu nu Kadenan lu kanilan. Nangagan bu i kinapaginugut'ilan ka guna makatingguma su bataluan na tinaligkudan nilan su paginugut'ilan. 14 Na su naulugan menem'u uni a aden manga utan nin a sudangen na entu ba menem su manga taw a 'bpamakikineg kanu kadtalu nu Kadenan ugaid'a nabausan silan nu manga lidu na ginawa, kakawasan enggu kakiug sa mapia enggu mawag tembu nangalapas su unga nilan. 15 Ugaid'a su mapia a lupa a naulugan nu uni na entu ba menem su manga taw a 'bpamakikineg kanu kadtalu nu Kadenan, na pinakikineg'ilan sa mapia taman sa tinalima nilan sa senep sa atay. Na tinemigkel silan taman sa nakaunga sa mapia.”
Su Pakenalan pantag kanu Palitan
16 Na pidtalu pan nu Isa al-Masih i “Dala man temutud sa palitan a dapengan nin udi na ibetad'in kanu aung'u katri ka nia pan mula na ibetad'in lu kanu 'bpanaguan sa palitan ka enggu mailay nu 'bpeludep a taw su kaliwanag'in. 17 Na maitu bun ba su kapendatu nu Kadenan a nakapagena, na di bun mauget na makapayag bun. 18 Kagina ka maitu na itagu nu sa ginawa su langun nu kadtalu ku ka apia entain i makikineg kanu kadtalu nu Kadenan na kadsisinggumanan pan su katuntay nin ugaid'a su entain menem i dili makikineg na su paidu a katuntay a nia nin kataw ka lekanin den na kuan pamun su entu.”
Su Kinakakap'u Ina nu Isa al-Masih sa lekanin
19 Na nakauma su ina nu Isa al-Masih apeg'u manga suled'in a mama lu kanu 'bpangusiatan nin. Ugaid'a sabap kanu madakel a taw na di silan pakasupeg sa lekanin. 20 Na aden midtalu sa lekanin sa “Gulu, nan sa liu su ina nengka enggu su manga suled'engka a mama, pegkakapen ka nilan.”
21 Ugaid'a nia nin pidtalu kanu manga taw na “Nia ku ina enggu manga suled na su apia entain i 'bpakikineg enggu penggalebek kanu kadtalu nu Kadenan.”
Su Kinapatelen nu Isa al-Masih kanu Sambel
22 Na aden isa a gay a nageda su Isa al-Masih kanu awang apeg'u 'bpamangunut lun na nia nin pidtalu kanilan na “Lemipag tanu kanu lanaw.” Na linemipag mambu silan. 23 Na kanu kabpelipag'ilan kanu lanaw na nakatulug su Isa al-Masih. Daka nakatingguma i mabandes a benal a sambel taman sa sama bu di pakageled su awang'ilan.
24 Daka pinukaw nilan su Isa al-Masih sa nia nilan lun pidtalu na “Mapulu! Mapulu, gedam ka! 'Gkaled tanu den!” Na mimbangun su Isa al-Masih ka sinapalan nin su sambel enggu su bagel. Na tinemelen mambu su sambel taman sa natekaw demun su kinalinaw nu lanaw. 25 Daka nia nin pidtalu kanu 'bpamangunut lun na “Endaw den nakasangul i salig'u?” Na nangagaip silan enggu nagilekan taman sa namakapamagidsaya silan sa “Entain a taw i nia ka apia su sambel enggu bagel na 'bpaginugut sa lekanin amaika pedsugun nin?”
Su Kinapagkapia kanu Mama a Inasukan na Saitan
26 Na nakadunggu silan kanu dalepa nu manga taw sa Girasa a nakadsalipag bun nu Galili. 27 Na kanu kinambaba nu Isa al-Masih kanu awang na inalaw sekanin nu mama a taw bun kanu entu a dalepa. Na su nia a mama na inasukan na manga saitan enggu nauget den di pembalegkas enggu di den 'bpaguli sa walay ka lu bu pegkakaleben kanu 'bpamelebengan. 28 Na kanu kinailay nin kanu Isa al-Masih na linemalis sekanin sa matanug enggu sinemugiud kanu ay nu Isa al-Masih sa nia nin pidtalu sa matanug na “Isa a Tunggal'u Kadenan a Mapulu sa Langun, di aku nengka den 'bpelusudi. 'Bpangenin ku sa leka i di aku nengka 'bpelasaya.” 29 Na nadtalu nin i entu sabap sa pidtaluan sekanin nu Isa al-Masih sa awan nin su mama a entu. Ka madakel den man i kinaasuk lun nu saitan. Na pegkandaduan sekanin nu manga taw lu enggu pedtamengan nilan pan ugaid'a penggetasen nu saitan su manga lantay-lantay a putaw enggu 'bpananggiten nin kanu tawan-tawan a dalepa.
30 Na inidsan sekanin nu Isa al-Masih sa “Ngin i ngala nengka?” Nia nin inisawal na “Sakian-kian,” kagina madakel den a saitan i minasuk lun. 31 Na inipamagayuk'u manga saitan kanu Isa al-Masih i di pan silan idtug kanu Kalut a Nangilem-kilem.
32 Na kanu entu ba mambu na aden madakel a benal a taw sa lupa lu kanu pipi nu bakulud. Na pinangeni nu manga saitan kanu Isa al-Masih i lu ba silan paasuken. Na sinugutan mambu silan nu Isa al-Masih. 33 Guna su maitu na linemiu su manga saitan kanu mama ka minasuk silan lu kanu manga taw sa lupa. Daka su langun nu taw sa lupa na namakadtatalaguy silan lu kanu matibeng a bakulud taman sa namakatibpu silan kanu lanaw enggu nangaled.
34 Na guna mailay nu manga pedtuganul kanu manga taw sa lupa su entu a nanggula nu ayam'ilan na midtatalaguy silan mamagayas lu kanu siudad taman den kanu manga embala-bala pan a manga dalepa ka pinanudtul'ilan su entu lu kanu manga taw. 35 Na madakel a taw i namelu ka inilay nilan u ngin i nanggula. Na guna silan makauma kanu Isa al-Masih na nailay nilan kanu adapan nu Isa al-Masih a 'bpagagayan den su mama a inasukan na manga saitan enggu nakambalegkas den taman sa nakatidtu den i itungan nin. Daka nangagilekan su manga taw. 36 Na su namakailay kanu entu a nanggula na inilakit'ilan kanu madakel a taw u panun i kinapagkapia nin kanu mama a inasukan na manga saitan. 37 Daka su langun nu taw lu kanu embala-bala a dalepa sa Girasa na pinangeni nilan kanu Isa al-Masih i ganatan nin den silan kagina sangat a nagilekan silan. Daka nageda den mambu su Isa al-Masih kanu awang ka gemanat den. 38 Na su mama a naawan na manga saitan na inipamagayuk'in kanu Isa al-Masih sa paunuten nin sekanin. Ugaid'a pinauli sekanin nu Isa al-Masih sa nia nin pidtalu na 39 “Uli ka, ka panudtul ka u ngin i pinggula nu Kadenan sa leka.” Daka ginemanat den su mama ka inipayapat'in manudtul kanu siudad su pinakaidan lun nu Isa al-Masih.
Su Wata a Babay a Minatay enggu su Babay a Pebpulugu kanu Dalem'u Sapulu enggu Dua Lagun
40 Na linemipag menem su Isa al-Masih kanu lanaw. Na inalaw sekanin nu madakel a taw kagina 'gkapagangapan nilan a benal sekanin. 41 Na aden mama a bedtuan sa Yairus i nakauma. Sekanin i pegkamal kanu pedsambayangan nu manga Yahudi. Na sinemugiud sekanin kanu Isa al-Masih ka pinangeni nin kanu Isa al-Masih i munut pan sekanin lu kanu walay nin 42 kagina su tunggal a wata nin a babay a namakasapulu enggu dua lagun i umul'in na pebpaya. Na minunut mambu sekanin kani Yairus a pidtalikupan silan nu makapal a benal a taw. 43 Na isa kanu madakel ba a entu i babay a pebpulugu bu sa nakasapulu enggu dua lagun den. Na naibped'in den i pantialian nin sa kapapenggamut'in ugaid'a da isa bu i nakapagkapia kanu sakit'in. 44 Guna sekanin makaubay kanu taligkudan nu Isa al-Masih na inami nin su sanggayad'u lambung'u Isa al-Masih. Daka midsambuta demun i kinatelen nu kapebpulugu nin. 45 Na inidsa nu Isa al-Masih i “Entain i minami a nan sa laki?” Na uman i isa na midtalu sa dikena silan. Daka nia pidtalu ni Pitru na “Mapulu, nalibet ka na madakel a nia a taw enggu pedsasaseka silan.” 46 Ugaid'a nia pidtalu nu Isa al-Masih na “Aden minami sa laki ka nagedam ku i aden linemiu kanu kabarakat ku.” 47 Na guna katawi nu babay i da i entu makapagena kanu Isa al-Masih na sinemupeg sa lekanin a pegkegkel'a gilek ka sinemugiud kanu adapan nin ka pidtalu nin sa lekanin lu kanu madakel a taw u ngin i sabapan na kinaami nin lun enggu kinadsambuta nu kinagkapia nu dalu nin. 48 Na nia pidtalu nu Isa al-Masih sa lekanin na “Manga dua na suled, su salig'engka i napagkapia sa leka. Uli ka den sa malilintad.”
49 Na gagalu nu kapedtalu nu Isa al-Masih na aden nakauma lu a nakabpun kanu walay ni Yairus. Nia nin pidtalu kani Yairus na “Su wata nengka na minatay den, di ka den 'bpagangga su Gulu.” 50 Ugaid'a nakineg'u Isa al-Masih su pidtalu nu mama a entu. Daka nia pidtalu nu Isa al-Masih kani Yairus na “Da ka 'gkagilek, pakabagel ka i salig'engka ka 'gkapia pamun sekanin.”
51 Guna su nakauma silan lu kanu walay ni Yairus na dala pinaunut'u Isa al-Masih lemudep lu kanu walay nia tabia na si Pitru, si Yuhan enggu si Yakub enggu su ama enggu ina nu wata. 52 Na su manga taw lu na 'bpamanguliang sa matanug enggu 'gkangalidu i ginawa nilan ka minatay den su wata a entu. Ugaid'a nia pidtalu nu Isa al-Masih na “Da kanu 'bpamanguliang ka dikena minatay i wata a nan, pedtulug bu sekanin.” 53 Na nadtatawan nilan sekanin kagina natawan nilan i minatay den su entu a wata. 54 Daka inami nu Isa al-Masih su wata sia sa lima ka pidtaluan nin sa “Bai, embangun ka.” 55 Na mimbalingan su ngiawa nu wata taman sa midtagad-tagad embangun. Na inisugu nu Isa al-Masih i pakanen su wata. 56 Na sangat a nagaip su lukes'u wata ugaid'a inibpaliugat'u Isa al-Masih kanilan i di nilan edtalu-talun su entu ba kanu apia entain.