Su Pantag kanu Gay nu Kabpangintelenen
12
Na kanu Gay nu Kabpangintelenen na minukit su Isa al-Masih lu kanu inawidan a bantad, saleta na 'gkangagutem su 'bpamangunut lun. Daka nangetes silan kanu tiugkayan nu bantad ka kinan nilan. 2 Na guna mailay i entu nu manga taw a lusud kanu lumpukan a Parisiyu na nia nilan pidtalu kanu Isa al-Masih na “Ilay ka ba! Penggalebeken nu 'bpamangunut sa leka su di a benal 'gkaalus kanu Gay nu Kabpangintelenen.”a 3 Na nia inisumpat'u Isa al-Masih kanilan na “Ngintu besen, da nu pamun mabatia kanu kitab u ngin i pinggula nu Daudb kanu timpu a 'gkagutem sekanin apeg'u manga tagapeda nin? 4 Linemudep sekanin lu kanu walay a pedsimban kanu Kadenanc ka kinan nin su pan a inigkurban kanu Kadenan. Na di a benal i entu 'gkaalus a kanen nin apeg'u manga tagapeda nin ka nia bu 'gkaalus a makakan sa entu na su 'bpamangurban. 5 Atawa ka da nu pamun mabatia kanu kasuguan nu Musa i su 'bpamangurban na minggalebek silan lu kanu Suti a 'Bpagagaman kanu Gay nu Kabpangintelenen? Na di a benal i entu 'gkaalus kanu Gay nu Kabpangintelenen, ugaid'a apia ka maitu na da bun silan sugata sa kawagib. 6 Na edtalun ku sa lekanu, aden sia labi pan i kabalapantag'in kumin kanu Suti a 'Bpagagaman.d 7 Na amaika kasabutan nu bu man u ngin i maena nu kadtalu a nia a‘Nia ku 'gkapangingalap na su limu nu, dikena su kurban nu,’e
na di nu wagiban su manga taw a dala bun penggalebeken nin a sungkang. 8 Kagina su Kaka nu Manusia na apia sia kanu Gay nu Kabpangintelenen na sekanin i Mapulu.”
Su Kinapagkapia nu Isa al-Masih kanu Mama a Migkipes i Sabala a Lima nin
9 Na ginemanat menem lu su Isa al-Masih ka linemu kanu walay a pedsambayangan nu manga Yahudi. 10 Na aden mama lu a migkipes i sabala a lima nin. Na inidsa nu manga taw a lusud kanu lumpukan a Parisiyu kanu Isa al-Masih i “Ngintu, 'gkaalus kanu Gay nu Kabpangintelenen su kapagkapia kanu taw a aden sakit'in?” Na inidsa nilan bu i entu asal'a aden makasendit'ilan lun. 11 Ugaid'a nia inisumpat'u Isa al-Masih kanilan na “U aden sa lekanu i maulug i bili-bili nin lu kanu kalut kanu Gay nu Kabpangintelenen na ngintu, di nu kuan semambut? Kuan nu guna. 12 Na amaika maitu, na nia pan basi a entu su taw? Ka labi paman a balapantag su taw kumin kanu bili-bili! Nia nin maena na 'gkaalus kanu Gay nu Kabpangintelenen su kanggalebek sa mapia.” 13 Daka nia pidtalu nu Isa al-Masih kanu mama a entu na “Betel ka i lima nengka a nan.” Na binetel'in mambu taman sa migkapia su lima nin sa mana bun su sabala a lima nin. 14 Guna su maitu na minawa su manga taw a lusud kanu lumpukan a Parisiyu ka mindidilimudan silan ka pinagitung'ilan u panun i kabinasa nilan kanu Isa al-Masih.
Su Isa al-Masih su Pinamili nu Kadenan a Makatuman kanu Kahanda nin
15 Na guna katawi nu Isa al-Masih su entu na ginemanat sekanin lu. Saleta mambu na madakel a taw i midtatanggunut lun. Na pinagkapia nin su langun nu aden sakit'in 16 enggu inibpaliugat'in kanilan i di nilan a benal edtalu-talun u entain sekanin. 17 Na kanu nia a nanggula na natuman su kadtalu nu Kadenan sia nakanggulalan kanu Nabi Isayas a
18 “Ilay nu! Nia su pinamili ku a panunugun ku,
su pinadtaya ku a benal enggu sangat a 'gkasuatan ku.
Ipalangkap ku sa lekanin su Suti a Ruh ku
taman sa ipayag'in su ngin i wagib a enggulan nin kanu manga bangsa.
19 Di sekanin 'bpalawa atawa ka lemalis sa kadtalu nin
enggu di matanug i kadtalu nin sia kanu manga lalan.
20 Mananaw gaid sekanin kanu manga taw a malubay. Di nin lunsanan su manga taw a di nin magaga temindeg i ginawa nin.
Di sekanin temelen taman sa di makandatu su ngin i wagib.
21 Na madtalu nu langun nu bangsa i sekanin su inam'ilan.”f
Su Kabarakat'u Isa al-Masih na ebpun kanu Kadenan
22 Daka aden pinananggit kanu Isa al-Masih a mama a di pakailay enggu di pakadtalu ka inasukan na saitan. Na pinagkapia nin taman sa nakailay enggu nakadtalu su mama a entu. 23 Na nangagaip su madakel a taw lu taman sa nia nilan nadtalu na “Tabia bun ka nia den ba su tupu nu Daud?”g 24 Ugaid'a guna makineg'u manga taw a lusud kanu lumpukan a Parisiyu su entu na nia nilan pidtalu na “Su kabpamugaw nu nia a mama sa saitan na sia pakanggulalan kanu bagel'u Datu na Giadsalh a datu nu manga saitan.” 25 Ugaid'a 'gkatawan bun nu Isa al-Masih su 'gkapagitung'ilan tembu nia nin pidtalu kanilan na “Apia endaw a pendatuan ka mambad-bad su manga taw nin na su entu a pendatuan na dili makadtindeg sa mauget. Na maitu bun ba su apia endaw a siudad atawa ka sakambinabatan ka mambad-bad na di 'gkauget na magubal su entu a siudad atawa ka sakambinabatan. 26 Na maitu bun ba, amaika su Datu na Giadsal ka sekanin bun i pembugaw kanu ginawa nin na mambad-bad su pendatuan nin. Na panun ba i kadtindeg'u entu a pendatuan? 27 Nia nu pedtalun na su kabpamugaw ku sa saitan na sia pakanggulalan kanu kabarakat'u Datu na Giadsal. Na amaika maitu na endaw menem pakabpun su kabarakat'u 'bpamangunut sa lekanu sa kabpamugaw nilan sa saitan? Nia nin kabantang na silan mismu i mangimbenal sa lekanu sa dikena pakatidtu su 'gkapagitung'u a nan sa laki. 28 Ugaid'a amaika menem ka 'bpamugaw aku sa saitan sia pakanggulalan kanu kabarakat'u Ruh nu Kadenan, na nia nin maena na nakatingguma den sa lekanu su kapendatu nu Kadenan.
29 “Na su Saitan na mana bun man sekanin mabagel a mama a di kaludepan su walay nin asal'a agawn su manga kaaden nin, nia tabia na mapawik muna sekanin entu pan ka maagaw su manga kaaden nin.”
30 Na pidtalu pan nu Isa al-Masih i “Su di temampil sa laki na pedsungkang sa laki enggu su di temabang sa laki sa kapangenggat kanu manga taw na papedsibay kanu manga taw. 31 Kagina ka maitu na pedtalun ku sa lekanu i su langun na kadusan enggu kasakutu na maampun bun ugaid'a su kasakutu kanu Suti a Ruh nu Kadenan na da den kaampun lun. 32 Na apia entain menem i edtalu sa sungkang kanu Kaka nu Manusia na maampun bun ugaid'a su edtalu sa sungkang kanu Suti a Ruh na di den maampun iganat sa dunia taman sa akirat.
Katawan u Mapia atawa ka Mawag su Kayu sia kanu Kaunga nin
33 “Na mana bun man su kayu, na u mapia su kayu na mapia bun su unga nin, na u mawag su kayu na mawag bun i unga nin. Kagina su kayu na sia mailay kanu unga nin u mapia atawa ka mawag a kayu. 34 Sekanu a manga tupu nu nipay! Panun ba man i kadtalu nu sa mapia, ka su atay nu na mawag? Kagina u ngin i dalem'u atay nu taw na entu bun ba i lemiu kanu ngali nin. 35 Na su mapia a taw na mapia bun i madtalu nin kagina nia nakadalem kanu atay nin na mapia. Na maitu bun ba su mawag a taw, mawag i madtalu nin kagina nia nakadalem kanu atay nin na mawag. 36 Ugaid'a edtalun ku sa lekanu i apia ngin a kadtalu a kababalan na mauma nengka bun sia kanu Gay nu Harikiamat. 37 Kagina sia bun kanu kadtalu nu taw i kasugat lun sa kawagib atawa ka di lun kasugat sa kawagib.”
38 Daka nia pidtalu nu ped a manga gulu nu pangitabani enggu manga taw a lusud kanu lumpukan a Parisiyu na “Gulu! 'Gkapaginagkay nami sa leka i makapailay kami nengka pan sa tanda a kagaipan.” 39 Ugaid'a nia inisawal'u Isa al-Masih kanilan na “Su sekanu a manga taw sa saguna a timpu a manga baladusa enggu tinemaligkud kanu Kadenan na pakapangingalap kanu sa tanda ugaid'a dala man tanda a makapailay sa lekanu nia tabia na su tanda a sia nakanggulalan kanu Nabi Yunus. 40 Ka mana bun man su Nabi Yunus a nakatelu gay enggu nakatelu kamagabi sia kanu didalem'u tian nu masela a seda,j na maitu bun ba su Kaka nu Manusia na makatelu gay bun enggu makatelu kamagabi bun sia kanu didalem'u pakubulan. 41 Na sia kanu Gay nu Harikiamat na embuat su manga taw sa Ninibah ka sugaten nilan sa kawagib su manga taw ba a nia sa saguna a timpu kagina su manga taw sa Ninibah na midtaubat silan guna nilan makineg su usiatan nu Nabi Yunus. Ugaid'a sekanu, na apia san den sa lekanu su labi lawan pan kumin kanu Nabi Yunus na da kanu bun edtataubat. 42 Na embuat bun su puteli nu dalepa a Sibak amaika mauma den su Gay nu Harikiamat ka sugaten nin sa kawagib su manga taw ba a nia sa saguna a timpu a da pakikineg kagina sekanin na apia lu pan ebpun sa tedtab'a dunia na nagapas bun sa kapakikineg'in kanu manga mapia a ilemu nu Nabi Sulaiman. Ugaid'a sekanu, na apia san den sa lekanu su labi lawan pan kumin kanu Nabi Sulaimanl na da nu bun sekanin pakikinega.”
Su Pakenalan pantag kanu Manggula nu manga Taw sa Saguna a Timpu
43 Na pidtalu pan nu Isa al-Masih i “Amaika mawa su saitan sia kanu lawas'u taw na edsugud-sugud den temegel kanu tawan-tawan a dalepa ka mangilay menem sa kagkalebenan nin. Na amaika di sekanin makatun 44 na nia nin mapagitung na ‘Embalingan aku lu kanu lawas'u taw a andang a inasukan ku.’ Na sia kanu kambalingan nin ka nia nin lun kailay i dala pamun pegkaleben lun enggu napamayupasan den taman sa pibpia-pianan a benal 45 na lemiu sekanin ka magakat pan sa pitu timan a manga saitan a lawan pan sa lekanin i kawag'a palangay nin ka masuk silan kanu entu ba a taw taman sa lu den ba silan 'gkaleben. Na nia manggula nu entu ba a taw na labi pan i kapasang'a magedam'in kumin kanu nauna a entu a nagedam'in. Na maitu ba i manggula nu manga taw sa saguna a timpu a manga baladusa den a benal.”
Su Tidtu-tidtu a Pamilia nu Isa al-Masih
46 Na pedtalu-talu pamun su Isa al-Masih lu kanu madakel a taw na nakauma su ina nin apeg'u manga suled'in a mama. Lu silan pedtindeg kanu liu nu walay ka pegkiugan nilan pembitiala su Isa al-Masih. 47 Na aden napasabpet kanu entu lu kanu Isa al-Masih, sa nia nin pidtalu na “Gulu, nan sa liu su ina nengka enggu su manga suled'engka a mama, 'bpangilayn ka nilan.” 48 Daka nia inisumpat'u Isa al-Masih kanu midtalu lun a entu na “Entain besen i ina ku enggu manga suled ku a mama?” 49 Na tinendu nu Isa al-Masih su 'bpamangunut lun ka nia nin pidtalu na “Ilay nu, silan ba a nia su ina ku enggu manga suled ku a mama! 50 Ka apia entain man i penggalebek kanu kahanda nu Ama ku a lu sa sulega na entu ba i suled ku a mama enggu babay enggu ina ku.”