Su Kinapakan nu Isa al-Masih kanu Pat Ngibu a manga Taw
8
Na kanu entu ba a manga timpu na aden menem madakel a taw a nangalimud lu kanu Isa al-Masih. Na kagina ka dala den 'gkakan nilan na tinawag'u Isa al-Masih su 'bpamangunut lun ka pidtalu nin kanilan i 2 “'Gkalat i nanam ku kanu manga taw a nia, ka nakatelu gay den saguna na kaped ku bu silan taman sa da den 'gkakan nilan. 3 Na amaika paulin ku silan a 'gkangagutem na lipedengan silan sia sa lalan ka mawatan pan i nangabpunan nu ped kanilan.” 4 Na nia nilan nakasumpat sa lekanin na “Panun i kapakan kanu manga taw a nia? Ka dala 'gkakuayan sa makan sia kanu tawan-tawan a nia a dalepa.” 5 Daka inidsa nu Isa al-Masih kanilan i “Ngin i kadakel a makan san?” Nia nilan nakasumpat na “Pitu timan a pan.” 6 Daka pinapagagayan nu Isa al-Masih su madakel a taw entu pan ka kinua nin su pitu timan a pan ka inidsukul-sukul'in kanu Kadenan. Entu pan ka pidtebi-tebi nin ka inenggay nin kanu 'bpamangunut lun ka enggu nilan makatalagad kanu madakel a taw. 7 Na aden bun pila timan a seda nilan. Na inidsukul-sukul'in bun i entu enggu pinugi nin su Kadenan entu pan ka pidtalu nin kanu manga sinugu nin i “Italagad'u bun i nia kanilan.” 8 Na su langun nu manga taw a entu na namakakan taman sa nangausug silan enggu aden pan nangasama nilan a pegken a nia nin nalimudan na pitu kabukag. 9 Na manga pat ngibu i kadakel'u taw a namakakan. Guna su maitu na pinauli nin den silan.Su di Kapegkatuntay nu 'Bpamangunut kanu Isa al-Masih u Entain Sekanin
10 Daka nageda su Isa al-Masih kanu awang apeg'u 'bpamangunut lun ka linemu silan kanu embala-bala a dalepa sa Dalmanuta.a
11 Na aden manga taw a lusud kanu lumpukan a Parisiyu i namakauma lu. Na inindalawana nilan su Isa al-Masih taman sa kiugan nilan sekanin matalu sa ukit a kapeges'ilan lun mangeni sa kapailay nin sa tanda a ebpun sa Kadenan. 12 Na nakaginawa sa masela su Isa al-Masih ka nia nin nadtalu na “Sekanu a manga taw sa saguna a timpu, ngintu ka 'bpangilay kanu pamun sa tanda? Saben-sabenal a pedtalun ku sa lekanu i dala tanda a makapailay sa lekanu a manga taw saguna.”
13 Na guna su maitu na tinagak'in silan ka nageda menem kanu awang ka linemipag lu kanu lanaw. 14 Saleta mambu na su 'bpamangunut lun na nakalipat mananggit sa makan. Na dala nambalutu nilan lu kanu awang nia tabia na sawalu bu a pan. 15 Na su Isa al-Masih mambu na pinaingat'in su 'bpamangunut lun sa nia nin pidtalu kanilan na “Pangingati nu a benal su pakembang'u manga taw a lusud kanu lumpukan a Parisiyu enggu su pakembang'i Datu Hirud.”b 16 Daka pimbibitiala nu 'bpamangunut lun su entu sa nia nilan pedtalun na “Pidtalu nin i nan kagina dala nambalutu tanu a makan.” 17 Na 'gkatawan bun nu Isa al-Masih su pembibitialan nilan. Daka nia nin pidtalu kanilan na “Nginan ka nia nu 'gkambibitiala i dala nait'u a makan? Nginan, di kanu pamun pakailay udi na pakatuntay? Ngintu, di nu pamun 'gkapamikil? 18 Nginan, matag aden mata nu na di kanu pakailay? Enggu matag aden tangila nu na di kanu pakakineg? Di nu 'gkatademan 19 su kinadtebi-tebi ku kanu lima timan a pan a inipakan kanu lima ngibu i kadakel'in a manga taw? Pila kabukag i nangalimud'u a nasama a pan kanu entu ba?” Nia nilan nakasumpat na “Sapulu enggu dua kabukag.” 20 “Na su pitu timan menem a pan a inipakan kanu pat ngibu i kadakel'in a manga taw, na pila kabukag menem i nasama a nangalimud'u?” Nia nilan menem nakasumpat na “Pitu kabukag.” 21 Na nia nadtalu nu Isa al-Masih kanilan na “Ngintu, di kanu pamun pakatuntay?”
Su Kinailay nu Mama a Di Pakailay
22 Na nakauma su Isa al-Masih apeg'u 'bpamangunut sa lekanin lu sa Bitsaida. Na aden lu mama a di pakailay a pinananggit'u manga taw lu kanu Isa al-Masih ka inipamagayuk'ilan sa lekanin sa amin nin pan. 23 Daka sinegedan nin su lima nu mama a di pakailay ka inagak'in lu kanu liu nu inged. Na guna nin katubpai su mata nu mama taman sa dinapenetanc nin kanu dua embala a lima nin na inidsan nin sa “Pakailay ka den?” 24 Na tinemengab su mama enggu nia nin pidtalu na “Pakailay aku den sa manga taw ugaid'a mana silan 'bpelakaw a manga kayu.” 25 Na dinapenetan menem 'bpaluman nu Isa al-Masih su mata nu mama. Daka guna pembelata nu mama su mata nin na pakailay den sekanin. Mapia den i kapegkailay nin kanu langun-langun. 26 Guna su maitu na pinauli den sekanin nu Isa al-Masih sa nia nin lun pidtalu na “Da ka den 'bpagaut kanu inged a entu.”
Su Isa na su Masih
27 Na linemu su Isa al-Masih enggu su 'bpamangunut sa lekanin kanu manga inged a masupeg sa Kaisaria-Pilipus.d Na gay nilan 'bpelalakaw na inidsan nin silan sa “Entain aku kanu kapegkasabut'u manga taw?” 28 Daka nia nilan lun inisawal na “Seka kun su Yahiya a Nanalawat,e na nia menem kadtalu nu ped na seka kun su Nabi Ilias,f su ped menem na isa ka kun kanu manga ped pan a nabi paganay.” 29 Na silan menem i inidsan nu Isa al-Masih sa “Ugaid'a sa lekanu na entain aku?” Na nia inisumpat'i Pitru na “Seka su Masih!” 30 Na inibpaliugat'u Isa al-Masih kanilan i apia sakataw na dala muna edtaluan nilan lun su makapantag sa lekanin.
Su Kinapayag'u Isa al-Masih pantag kanu Kapatay nin
31 Na linudsuan nu Isa al-Masih mapakataw kanu 'bpamangunut sa lekanin i su Kaka nu Manusia na dait a mukit sa madakel a kamalasayan enggu dait a ikias sekanin nu 'gkangaunutan nu manga Yahudi enggu su manga mapulu nu 'bpamangurban taman den kanu manga gulu nu pangitaban. Na imatayan sekanin ugaid'a kanu ikatelu nin gay na embibiag sekanin 'bpaluman. 32 Pidtalu nin i nia kanilan sa mapayag. Daka guna su maitu na inisibay ni Pitru su Isa al-Masih ka dinaway nin. 33 Ugaid'a sinangulan nu Isa al-Masih su 'bpamangunut sa lekanin ka dinaway nin si Pitru sa nia nin pidtalu na “Saitang ka! Iseg ka san ka sia ka sa taligkudan ku a nia ka su 'gkapagitung'engka na dikena ebpun kanu Kadenan ka kanu manusia.”
34 Daka tinawag'in su madakel a taw apeg'u 'bpamangunut sa lekanin ka nia nin pidtalu kanilan na “U entain i miug mabaluy a makaunut sa laki na dait a lipatanan nin su kiug'u ginawa nin enggu pamusayn nin su kayu nin a pinambalawagah ka munut sa laki. 35 Ka apia entain i kadalan na umul sabap sa laki enggu kanu Mapia a Tutumai na makatalima sa uyag-uyag a da taman nin. Ugaid'a apia entain menem i kiugan nin lemipuas su umul'in na di nin matalima su uyag-uyag a da taman nin. 36 Ka ngin i katagan nin kanu taw amaika makua nin su langun nu kakawasan sa dunia ugaid'a di nin matalima su uyag-uyag a da taman nin? 37 Na aden ba makaenggay nu taw a makaaun nin kanu umul'in sa apuy sa naraka? Dala guna. 38 Ka apia entain a taw i ikaya nin i 'bpaginugut sekanin sa laki enggu kanu kadtalu ku lu kanu manga taw a nia saguna a baladusa enggu tinemaligkud kanu Kadenan na ikaya bun sekanin nu Kaka nu Manusia kanu katingguma nin a linangkapan nu sigay nu Ama nin a kaped'in su manga malaikat a suti.”