9
Na nia nin pan pidtalu kanilan na “Saben-sabenal a pedtalun ku sa lekanu i di matag matay su ped sa lekanu sia taman sa di nilan mailay su kapendatu nu Kadenan a aden kabarakat'in.”
Su Kinasigay nu Isa al-Masih
2 Na guna maipus su nakanem gay na pinaunut'u Isa al-Masih si Pitru, si Yakub enggu si Yuhan lu kanu malambeg a palaw, na natalipulu bu silan lu ba. Na nakatekaw demun midsalin su palas'u Isa al-Masih ka sinemigay sia demun kanu kaadapan nilan. 3 Sinemigay su balegkas'in taman sa migkaputi a benal sa da isa bu a makagaga lun miling sa kaputi sia sa liwawaw na dunia. 4 Na mibpapayag kanilan lu su Nabi Ilias a kaped'in su Nabi Musa ka inimbitiala nilan su Isa al-Masih. 5 Daka nia nadtalu ni Pitru kanu Isa al-Masih na “Gulu,a mapia ka sia tanu! Basi mapia u mumbal kami sa telu timan a balal: satiman i leka, satiman i kanu Nabi Musa enggu satiman menem i kanu Nabi Ilias.” 6 Nadtalu nin i entu sabap sa di nin den 'gkatawan u ngin i edtalun nin kagina nagilekan a benal silan. 7 Daka nakatekaw demun silan natangguban na gabun. Na aden suala a nakabpun lu kanu gabun sa maya ba, “Nia su Tunggal a watab ku a pinadtaya ku. Pakikineg'u sekanin.” 8 Na endaw demun i kinapangingilay nilan na dala den ped a nailay nilan ka su Isa al-Masih bun den ka nalangiap den su dua kataw.
9 Na gagalu nu kabpeludus'ilan kanu palaw na inibpaliugat'in kanilan i apia sakataw na dala edtaluan nilan kanu ngin i nailay nilan taman sa di pan matay enggu makambibiag 'bpaluman su Kaka nu Manusia. 10 Na initagu nilan mambu sa ginawa su entu ugaid'a 'gkambibitiala nilan u ngin i maena nu pidtalu nin a entu a kambibiag 'bpaluman. 11 Na inidsa nu telu kataw a entu sa lekanin i “Ngintu ka pedtalun nu manga gulu nu pangitaban i natatalanged kun a pambalinganen muna sia sa dunia su Ilias unan nu kauma nu Masih?” 12 Na nia inisawal'u Isa al-Masih kanilan na “Benal a pambalinganen muna su Ilias sia sa dunia ka enggu nin kaumbayan su langun nu dait a umbayan. Ugaid'a panun a entu ka nakasulat bun i su Kaka nu Manusia na dait a mukit sa madakel a kamalasayan enggu ikias sekanin? 13 Ugaid'a pedtalun ku sa lekanu i nakauma den man su Ilias.c Na pinggula nu ped a manga taw sa lekanin su apia ngin a pegkiugan nilan lun penggula a mana bun su nakasulat pantag sa lekanin.”
Su Dala Salig'in a manga Taw
14 Na guna su pakauma den su Isa al-Masih enggu su telu kataw a 'bpamangunut sa lekanin lu kanu ped pan a 'bpamangunut lun na nailay nilan i nabalibet'a madakel a taw su ped pan a entu a 'bpamangunut lun enggu ipebpalawa silan nu manga gulu nu pangitaban. 15 Na endaw i kinailay nu madakel a taw kanu Isa al-Masih na natekawan i ginawa nilan, daka pidtalaguyan nilan semalam su Isa al-Masih. 16 Na nia mambu inidsa nu Isa al-Masih kanu manga ped pan a entu a 'bpamangunut lun na “Ngin i pebpapalawan nu ba a nan kanu manga gulu nu pangitaban?” 17 Na isa kanu madakel a taw lu i sinemumpat sa “Gulu, pinananggit ku sa leka su wata ku a mama ka inasukan sekanin na saitan tembu di sekanin pakadtalu. 18 Na uman sekanin 'gkasampenan nu saitan na ibpelebpad'in pendadsang a pembula-bula su ngali nin enggu papegkigetan nin su manga ngipen nin taman sa pedtegas sekanin. Na pinangeni ku kanu 'bpamangunut sa leka i paawan nilan pan su saitan ugaid'a dala nilan magaga.”
19 Na nia nadtalu nu Isa al-Masih kanilan na “Ngin den a kada na salig i nia a manga taw saguna! Ngin ba i kauget'a kadtangen ku sa lekanu? Endaw ba taman i katigkel ku sa lekanu? Isia nu sekanin sa laki.” 20 Daka inilu nilan den mambu su wata sa lekanin. Na guna mailay nu saitan su Isa al-Masih, na kanu entu demun ba na sinaing'in su wata. Na naudtang kanu lupa su wata taman sa nakambabagkelid a pembula-bula su ngali nin. 21 Daka inidsa nu Isa al-Masih kanu ama nu wata i “Ngin den i kinauget a maya ba i 'gkanggula nin?” Na nia inisawal'u ama nu wata na “Iganat pan sa wata sekanin. 22 Na malibpes bun i kabpagidtug'u saitan sa lekanin lu kanu apuy enggu lu kanu ig asal bu na mabinasa nin su wata. Ugaid'a amaika aden magaga nengka na lati kami nengka sa nanam enggu tabangi kami pan.” 23 Na nia inisumpat'u Isa al-Masih sa lekanin na “Ngintu ka nadtalu nengka i amaika magaga ku? Dala man di magaga kanu taw a aden salig'in.” 24 Na nakasambut semumpat'u ama nu wata sa matanug i “Aden salig ku ugaid'a tabangi aku sa matalutup su entu.”
25 Na guna mailay nu Isa al-Masih i pegkadakel bun su madakel a taw na pidtaluan nin mamagayas su saitan sa “Seka saitan a di papedtalu enggu di pabpakikineg na pedsugun ku seka sa awai ka su wata a nan enggu di ka den a benal sekanin masuki 'bpaluman.” 26 Na nakalalis su saitan taman sa pibpapalumanan nin semaing su wata entu pan ka inawan nin. Na nakailing sa minatay su wata tembu madakel kanu taw lu i midtalu sa “Minatay sekanin.” 27 Ugaid'a kinawa nu Isa al-Masih su lima nu wata ka binatun nin taman sa nakadtindeg mambu su wata.
28 Na guna ludep su Isa al-Masih lu kanu walay na tinalipulu sekanin midsa nu 'bpamangunut lun sa “Ngintu ka di nami pakapaawa su saitan a entu?” 29 Na nia nin inisawal kanilan na “Su maya ba a saitan na da ped a makapaawa lun nia tabia na su kapangeni-ngeni bu.”
Su Kinapayag'u Isa al-Masih 'Bpaluman pantag kanu Kapatay nin
30 Na ginemanat silan kanu dalepa a entu a lu silan minukit sa Galili. Na di pegkiugan nu Isa al-Masih a katawan nu apia entain su lakaw nilan a entu, 31 kagina 'bpamandun nin su 'bpamangunut sa lekanin. Nia nin ibpamandu kanilan na “Su Kaka nu Manusia na ipalad kanu manga kuntela nin taman sa imatayan nilan sekanin. Na kanu ikatelu gay nu kinaimatay lun na embibiag sekanin 'bpaluman.” 32 Ugaid'a di nilan 'gkasabutan su pedtalun a entu nu Isa al-Masih. Na 'gkagilekan menem silan 'bpagidsa lun.
Entain su Badtug sa Langun kanu Adapan nu Kadenan?
33 Na nakauma su Isa al-Masih enggu su 'bpamangunut sa lekanin lu sa Kapurnaum. Na guna silan makaludep kanu walay na inidsa nu Isa al-Masih kanilan i “Ngin i pembibitialan nu ba a entu sia sa lalan?” 34 Ugaid'a da silan makasumpat kagina nia nilan ba a entu pebpapalawan lu kanu lalan na pantag sa u entain kanilan a 'bpamangunut kanu Isa al-Masih i badtug sa langun. 35 Na guna makaayan su Isa al-Masih na tinawag'in su sapulu enggu dua a entu a 'bpamangunut lun ka nia nin pidtalu kanilan na “U entain i miug a mabaluy a mapulu na dait a ipangalimbaba nin su ginawa nin sa mababa den sa langun, taman sa panunugun nu langun nu taw.” 36 Daka kinemua sa wata su Isa al-Masih ka pinadtindeg'in lu kanu luk'ilan entu pan ka kinakep'in su wata ka nia nin pidtalu kanilan na 37 “Apia entain i temalima sa isa kanu maya ba a manga wata sabap sa 'bpaginugut sekanin sa laki na mana bun saki i tinalima nin. Na apia entain menem i temalima sa laki na dikena saki bu i tinalima nin ka apeg'u sinemugu sa laki.”
38 Na pidtalu ni Yuhan kanu Isa al-Masih i “Gulu, aden nailay nami a 'bpamugaw sa saitan a sia nin ipenggulalan kanu ingala nengka na sinapalan nami kagina dikena tanu sekanin kaped.” 39 Ugaid'a nia pidtalu nu Isa al-Masih na “Di nu sekanin pedsapali ka dala man enggula sa kabarakatan sia makanggulalan kanu ingala ku a nia nin kapasad na edtalu sa mawag makapantag sa laki. 40 Ka apia entain man i dikena sungkang sa lekitanu na tampil tanu. 41 Na saben-sabenal a pedtalun ku sa lekanu i apia entain i mapainem sa lekanu sa apia sakabasu bu a ig sabap sa nakalusud kanu kanu Masih na natalatantu a balasan sekanin.
42 “Ugaid'a apia entain menem a taw i makapandusa nin su mababa a manga taw a maya ba kanu manga wata a aden salig'in sa laki na mapegkag pan a kasiksan nu taw a entu i iketan sa masela a gilingan a watu su lig'in ka idtug lu kanu lagat. 43-44 Na putuk ka su lima nengka amaika nia bu kadsabapan nu kandusa nengka. Nia tinemu i sabala bu su lima nengka ugaid'a matalima nengka menem su uyag-uyag a da taman nin kumin sa aden sa leka su dua embala a lima nengka ugaid'a lu ka makabpawang kanu apuy sa naraka a di den pebpatay. 45-46 Na putuk ka bun su ay nengka amaika nia bu kadsabapan nu kandusa nengka. Nia tinemu i tiud ka ugaid'a matalima nengka menem su uyag-uyag a da taman nin kumin sa aden sa leka su dua embala a ay nengka ugaid'a lu ka makaidtug kanu naraka. 47-48 Na suat ka bun su mata nengka amaika nia bu kadsabapan nu kandusa nengka. Nia tinemu i sabala bu i mata nengka ugaid'a makalusud ka kanu kapendatu nu Kadenan kumin sa aden sa leka su dua embala a mata nengka ugaid'a lu ka makaidtug kanu apuy sa naraka a di den pebpatay enggu lu kanu di pebpatay a manga uled sa naraka.”
49 Na nia pan pidtalu nu Isa al-Masih na “Uman i isa a 'bpaginugut sa laki na dait a mukit sa kamalasayan a mana pedtimusan sa apuy.d 50 Mapia su timuse ugaid'a amaika madala su katimus'in na panun pan i kapagkatimus'u lun 'bpaluman? Kagina ka maitu na aden nu su timus kanu ginawa nu enggu paguyag-uyag kanu sa aden kalilintad'in kanu uman i isa.”