Su Kambelag'u Edtiwalay
10
Na ginemanat su Isa al-Masih kanu entu a dalepa ka linemu sa Yudia taman kanu dalepa a lu tampal sa sebangan nu lawas'a ig'u Jordan. Na nabuligan menem sekanin nu madakel a taw na pinamandu nin silan a mana bun su katatapan a penggulan nin. 2 Na aden sinemupeg a manga taw a lusud kanu lumpukan a Parisiyu kanu Isa al-Masih ka kiugan nilan sekanin demulat sia kanu kadtalu nin sa ukit a kinaidsa nilan lun sa “Ngintu, 'gkaalus a imbelag'u mama su kaluma nin?” 3 Ugaid'a nia inidsa nu Isa al-Masih kanilan na “Ngin i nakadalem kanu kasuguan nu Musa?”a 4 Na nia nilan inisumpat na “Su Musa na sinugutan nin su mama sa kaenggay sa kasulatan sa kambelag kanu babay entu pan ka imbelag'in.” 5 Ugaid'a nia pidtalu nu Isa al-Masih kanilan na “Inisulat'u Musa su entu a kasuguan sabap kanu kategas'u pamusungan nu. 6 Ugaid'a iganat pan kanu punan-punan nu kinapangaden na‘Pinangaden nu Kadenan silan a mama enggu babay.’b
7 ‘Na nia ba i sabapan nin ka pitasen na mama su ama nin enggu su ina nin ka enggu nin pakadtampung su kaluma nin 8 taman sa maisa den silan.’c
Na amaika maitu na dikena den silan dua kataw ka nabaluy den silan a sakabadan bu. 9 Tembu ba di dait a pabpitasen nu manusia su pinadtampung'u Kadenan.” 10 Na guna silan makaludep lu kanu walay na su 'bpamangunut sa lekanin menem i minidsa lun makapantag kanu entu. 11 Na nia nin pidtalu kanilan na “Apia entain a mama i imbelag'in su kaluma nin enggu mangaluma sa ped na pembaladusa kanu kaluma nin ka pakagkiuga sekanin. 12 Na amaika menem ka su babay i embelag kanu kaluma nin enggu 'gkaluma sa ped na pakagkiuga bun.”
Su Kinapamalihala nu Isa al-Masih kanu manga Wata
13 Na aden manga wata a 'bpamananggiten nu manga taw lu kanu Isa al-Masih asal'a kadapenetan nin ugaid'a sinapalan silan nu 'bpamangunut sa lekanin. 14 Na guna mailay nu Isa al-Masih su entu na nasakit i ginawa nin daka pidtaluan nin silan sa “Di nu pedsapali su manga wata a nan. Suguti nu a makasia silan sa laki ka maya ba kanu manga wata a nia i makalusud kanu kapendatu nu Kadenan. 15 Na saben-sabenal a pedtalun ku sa lekanu i apia entain i di temalima kanu kapendatu nu Kadenan a maya ba kanu kinatalima nu manga wata a nia na natalatantu i dili silan makalusud lu ba.” 16 Entu pan ka kinakep'in silan enggu dinapenetan nin ka pinalihalan nin.
Su Kawasa a Mama
17 Na kanu kapengganat'in 'bpelalakaw na aden isa a mama a pidtalaguyan nin semupeg su Isa al-Masih ka midtinggaleb kanu adapan nin ka inidsa nin i “Matidtu a Gulu, ngin i dait a enggulan ku asal'a matalima ku su uyag-uyag a da taman nin?” 18 Ugaid'a nia menem inidsa nu Isa al-Masih sa lekanin na “Ngintu ka pedtawagen aku nengka sa matidtu? Na dala man ped a matidtu ka su Kadenan bu. 19 Na katawan nengka bun man su manga kasuguan nu Kadenan a ‘Da ka mimatay, da ka 'gkiuga, da ka manegkaw, da ka edsaksi sa dikena benal, da ka edsalimbut, pagadati ka su ama nengka enggu su ina nengka.’d” 20 Na nia pidtalu nu mama na “Gulu, langun nu nia na ipenggulalan ku den iganat pan sa wata aku.” 21 Na kanu kapedtulik'u Isa al-Masih lun na naadenan sekanin na limu kanu mama a entu taman sa nia nin pidtalu sa lekanin na “Aden pamun satiman a kulang'engka, uli ka, ka 'bpasa ka su langun nu kaaden nengka. Na ipangenggay nengka su pasa nin kanu manga miskinan ka enggu maaden sa leka su kakawasan lu sa sulega,e entu pan ka unut ka sa laki.” 22 Na guna makineg'u mama su entu na nakabpatumeng sekanin taman sa ginemanat a 'gkalidu a benal i ginawa nin sabap sa madakel a benal su kaaden nin. 23 Daka nangingilay su Isa al-Masih ka pidtalu nin kanu 'bpamangunut sa lekanin i “Lawan i kapasang'in kanu manga kawasa i kalusud'ilan kanu kapendatu nu Kadenan!” 24 Na nagaip su 'bpamangunut sa lekanin kanu pidtalu nin a entu. Ugaid'a pidtalu nin pamun 'bpaluman i “Manga dua na suled, mapasang a benal i kaludep kanu kapendatu nu Kadenan. 25 Nia pan malemu kanu unta i kaludep'in kanu pesu nu lagum kumin kanu kalusud'u kawasa kanu kapendatu nu Kadenan.” 26 Na makin naisegan i kinagaip'u 'bpamangunut sa lekanin taman sa nia nilan nakapamagidsaya na “Amaika maitu na entain pan besen i malipuas?” 27 Na pidtulikan silan nu Isa al-Masih ka nia nin pidtalu na “Di man magaga nu manusia su entu ugaid'a su Kadenan i makagaga lun kagina dala man di magaga nu Kadenan.”
28 Na linemudsu edtalu si Pitru sa “Panun menem i maya ba sa lekami a nia a initabun nin su langun-langun ka enggu makadtatanggunut sa leka?” 29 Na nia inisumpat'u Isa al-Masih na “Saben-sabenal a pedtalun ku sa lekanu i apia entain i itabun nin su walay nin udi na manga suled'in a mama enggu babay, ina nin, ama nin, manga wata nin enggu manga kalupan nin sabap sa laki enggu kanu Mapia a Tutumaf 30 na makatalima sa lawan pan i kadakel'in a manga walay, manga suled a mama enggu babay, manga ina, manga wata enggu manga kalupan sia sa dunia. Ugaid'a unut bun kanu entu na temala bun silan sa kapamungkaid. Ugaid'a sia kanu mangauma a timpu na makatalima bun silan sa uyag-uyag a da taman nin. 31 Ka nia nin man kabantang na kanu mangauma ba a entu a timpu na madakel kanu manga taw saguna a nakatagu sa unan i makatagu silan sa ulian enggu su manga nakatagu menem sa ulian a taw saguna na makatagu menem silan sa unan.”
Su Nauli den a Kinapayag'u Isa al-Masih pantag kanu Kapatay nin
32 Na kanu sia silan sa lalan 'bpawang sa Awrusalim na 'bpangunanan su Isa al-Masih kanilan a 'gkangagaip su 'bpamangunut sa lekanin enggu 'gkangagilekan su manga taw a pedtundug kanilan. Na inisenggay nu Isa al-Masih su sapulu enggu dua a pinamili nin ka linudsuan nin menem edtalu kanilan su ngin i natatalanged a manggula nin lu sa Awrusalim 33 sa nia nin pidtalu na “Ilay nu, nia tanu den sa lalan a ipebpawang sa Awrusalim na su Kaka nu Manusia na ipalad lu kanu manga mapulu nu 'bpamangurban enggu lu kanu manga gulu nu pangitaban ka sugaten nilan sa kawagib sa dait a matay sekanin. Na ipalad'ilan sekanin kanu manga dikena-Yahudi. 34 Na pagumpaken nilan enggu panudan nilan enggu pamadasan nilan taman sa imatayan nilan sekanin. Ugaid'a kanu ikatelu nin gay na embibiag sekanin 'bpaluman.”
Su Kanggihad kanu Ginawa
35 Na sinemupeg kanu Isa al-Masih si Yakub enggu si Yuhan a manga wata ni Zabidi ka nia nilan pidtalu lun na “Gulu, aden 'gkapangeni nami sa leka, u mapakay bu na inggay nengka sa lekami su apia ngin a pangenin nami sa leka.” 36 Na nia mambu inidsa nu Isa al-Masih kanilan na “Ngin i 'gkalinian nu ba a entu a inggay ku sa lekanu?” 37 Na nia nilan inisawal sa lekanin na “Endaw i kandatu nengka na papagagayan kami lu kanu ubay nengka, sakataw i tampal sa kawanan, sakataw menem i tampal sa biwang'engka.” 38 Ugaid'a nia pidtalu nu Isa al-Masih kanilan na “Di nu 'gkatuntayan u ngin i 'bpangenin nu a nan! Ngintu, makatika kanu minem kanu tagayang a 'bpangineman ku udi na makagaga kanu mapasalawat kanu salawath a ipedsalawat sa laki?” 39 Daka nia nilan inisawal sa lekanin na “Uway, magaga nami.” Na nia menem pidtalu nu Isa al-Masih kanilan na “Kaineman nu su tagayan a 'bpangineman ku enggu kasalawatan kanu sa salawat a inisalawat sa laki 40 ugaid'a atag menem sa u entain i makapagagayan kanu tampal sa kawanan ku enggu kanu biwang ku na dikena saki i pegkakataw sa entu ugaid'a inadil den i entu kanu manga taw a inadilan lun.”
41 Na guna makineg'u sapulu kataw pan a 'bpamangunut lun su entu na nasakit i ginawa nilan kani Yakub enggu Yuhan. 42 Daka tinawag'u Isa al-Masih su sapulu enggu dua a 'bpamangunut lun ka nia nin pidtalu kanilan na “Katawan nu na su manga taw a ipedtimbang a datu kanu manga bangsa na sangat a pendatuan nilan su manga taw nilan enggu sangat a ipebpagilay nilan su kabagel'ilan kanilan. 43 Ugaid'a nia dait na dikena maitu sia sa lekanu ka nia pan mula na apia entain sa lekanu i miug mabaluy a balapantag a taw na dait a mabaluy a panunugun. 44 Na apia entain menem i kiugan nin a mabaluy a mapulu na dait a mabaluy bun a ulipen nu langun nu taw. 45 Kagina apia man su Kaka nu Manusia na dikena nia nin kinasia i pedtalagadan sekanin ka nia nin kinasia na sekanin i pedtalagad taman sa inggihad'in i umul'in asal'a maaun su madakel a taw.”
Su Kinailay nu Mama a Di Pakailay a Bedtuan sa Bartimayus
46 Na nakauma su Isa al-Masih enggu su 'bpamangunut sa lekanin sa dalepa a Yariku. Na guna den silan pengganat lu kaped'u madakel a taw na aden mama a di pakailay a bedtuan sa Bartimayus a wata nu bedtuan sa Timayus. 'Bpagagayan sekanin lu kanu ligid'u lalan a 'bpamangeni. 47 Na guna nin makineg i 'bpagukit su taw sa Nasarit a su Isa na inilalis'in mamikal edtalu i “Tupu nu Daudi a su Isa, ikalimu aku nengka pan!” 48 Na madakel i sinemapal sa lekanin sa temelen sekanin sa kabpelalis'in ugaid'a makin nin pinakatanug su kinalalis'in sa “Tupu nu Daud, ikalimu aku nengka pan!” 49 Daka mibpalen su Isa al-Masih ka nia nin pidtalu na “Tawag'u sekanin.” Na tinawag'ilan mambu su mama a di pakailay sa nia nilan pidtalu lun na “Pedtawagen ka nin, tindeg ka enggu embageli ka i manggiginawa nengka.” 50 Na inidtug'in mamagayas su lambung'in ka mibpakulut edtindeg ka linemulud kanu Isa al-Masih. 51 Daka inidsan sekanin nu Isa al-Masih sa “Ngin i 'gkalinian nengka a enggulan ku sa leka?” Na nia nin inisawal sa lekanin na “Gulu, nia ku 'gkalinian na makailay aku.” 52 Na nia mambu pidtalu nu Isa al-Masih sa lekanin na “Ganat ka den ka su salig'engka i napagkapia sa leka.” Na kanu entu demun ba na nakailay su mama taman sa pidtatanggunutan nin su Isa al-Masih kanu kabpelalakaw nin.