Su manga Gumagalebek kanu Pamumulanen a Ubas
20
“Kagina su kapendatu nu Kadenan na nia nin kalagidan na mana bun su kigkuan kanu walay a mibpanay lemiu ka 'bpangilay sa gumagalebek lu kanu pamumulanen nin a ubas. 2 Na guna silan makapasad magayun kanu manga gumagalebek sa sakadinariusa i isukay nin kanilan kanu kagagabian na pinanggalebek'in den silan kanu pamumulanen nin a ubas. 3 Na kanu uras a manga ikasiyaw sa mapita na linemiu menem sekanin, na aden menem nailay nin lu kanu padian a 'bpamedtindeg bu. 4 Na pidtalu nin kanilan i ‘Sekanu na amung kanu bun enggalebek lu kanu pamumulanen ku a ubas ka sukayan ku sekanu sa ngin i wagib.’ 5 Na linemu mambu silan. Na kanu kutika menem a manga maudtu na linemiu menem sekanin. Na maitu bun ba i pinggula nin kanu manga ikatelu sa malulem. 6 Na kanu uras a manga ikalima sa malulem na linemiu menem sekanin, na aden menem nailay nin a 'bpamedtindeg bu. Daka nia nin pidtalu kanilan na ‘Nginan ka kagagabian na 'bpamedtindeg kanu bu sia a dala penggalebeken nu?’ 7 Na nia nilan inisumpat sa lekanin na ‘Kagina dala papenggalebek sa lekami.’ Na nia nin menem inisumpat na ‘Angay kanu lu kanu pamumulanen ku ka enggalebek kanu lu.’8 “Na guna su pegkagabi den na nia pidtalu nu kigkuan kanu pamumulanen a ubas kanu 'gkasaligan nin na ‘Tawag ka su manga gumagalebek ka inggay nengka kanilan su sukay nilan, iganat'engka kanu nangauli a pinanggalebek taman den kanu nangauna.’ 9 Na sinemupeg su manga gumagalebek a nangauli a nia nin den kinabpun enggalebek na manga ikalima den sa malulem, na uman i isa kanilan na nakatalima sa sakadinarius. 10 Na sinemupeg menem su nangauna lemudsu enggalebek, na nia 'gkangadtalu na ginawa nilan na labi a masela i matalima nilan. Ugaid'a nia nilan bun natalima na sakadinarius bun i uman i isa kanilan. 11 Daka mimbuku silan kanu kigkuan, 12 sa nia nilan pidtalu na ‘Sakauras bu i kinanggalebek'u nia a manga taw na pinadtimbang'engka den sa lekami a nagagabian i kinanggalebek'in enggu tinemigkel kanu mayaw a senang.’ 13 Ugaid'a nia nin pidtalu kanu isa kanilan na ‘Pakat, dikena ku seka pedtalimbuten. Nia ta man napagayunan na sakadinarius bu kanu kagagabian. 14 Na kua ka den i sukay nengka ka uli ka den. Ugaid'a pegkiugan ku pedsukay su nangauli a nia sa mana bun sa leka. 15 Ka aden man kawagib ku sa kagkiug-kiug ku kanu kaaden ku. Basi 'bpangalikudan nengka bu i kabpangenggay ku a nia.’
16 “Na maya bun ba sia kanu kandatu nu Kadenan. Madakel kanu manga taw saguna a nakatagu sa ulian i makatagu silan sa unan enggu su manga nakatagu menem sa unan na makatagu menem silan sa ulian.”
Su Ikatelu a Kinapayag'u Isa al-Masih pantag kanu Kapatay nin
17 Na kanu kabpagangay nu Isa al-Masih sa Awrusalim na tinalipulu nin embitiala su sapulu enggu dua a 'bpamangunut lun ka pidtalu nin kanilan sia sa lalan i 18 “Ilay nu, nia tanu den sa lalan a ipebpawang sa Awrusalim, na su Kaka nu Manusia na ipalad kanu manga mapulu nu 'bpamangurban enggu kanu manga gulu nu pangitaban ka sugaten nilan sa kawagib sa dait a matay sekanin. 19 Na ipalad'ilan sekanin kanu manga dikena-Yahudi asal'a mapagumpak enggu mapametay taman sa itutuk kanu kayu a pinambalawaga ugaid'a kanu ikatelu nin gay na embibiag sekanin 'bpaluman.”
Su Kanggihad kanu Ginawa
20 Daka sinemupeg kanu Isa al-Masih su kaluma ni Zabidi a ped'in su dua kataw a wata nin a si Yakub enggu si Yuhan ka sinemugiud sekanin kanu Isa al-Masih ka aden 'bpangenin nin lun. 21 Na nia inidsa nu Isa al-Masih sa lekanin na “Ngin i kahanda nengka?” Na nia inisumpat'u babay sa lekanin na “'Bpangenin ku i sia kanu kandatu nengka na paayan ka su dua kataw a wata ku a nia, sia sa kawanan nengka i sakataw, sia sa biwang'engka menem i sakataw.” 22 Na nia pidtalu nu Isa al-Masih na “Di nu 'gkatuntayan u ngin i 'bpangenin nu a nan. Ngintu, makagaga kanu kanu kamalasayan a matala ku?b” Na nia nilan inisumpat na “Uway, makagaga kami.” 23 Na nia nin pidtalu kanilan na “Uway, makagaga kanu kanu kamalasayan a matala ku ugaid'a su kaayan kanu tampal sa kawanan ku enggu kanu biwang ku na dikena saki i pegkakataw sa entu ugaid'a inadil i entu nu Ama ku kanu manga taw a inadilan nin lun.”
24 Na guna makineg'u sapulu kataw pan a 'bpamangunut lun na nasakit i ginawa nilan kanu dua kataw a entu a edtebped sa pused. 25 Daka tinawag silan nu Isa al-Masih ka nia nin pidtalu kanilan na “Katawan nu na su manga mapulu nu manga bangsa na sangat a pendatuan nilan su manga taw nilan enggu sangat a ipebpagilay nilan su kabagel'ilan kanilan. 26 Ugaid'a nia dait na dikena maitu sia sa lekanu ka nia pan mula na apia entain sa lekanu i miug mabaluy a balapantag a taw na dait a mabaluy a panunugun. 27 Na apia entain menem i miug mangunanan na dait a mabaluy a ulipen, 28 ka mana bun man su Kaka nu Manusia a dikena nia nin kinasia i pedtalagadan sekanin ka nia nin kinasia na sekanin i pedtalagad taman sa inggihad'in i umul'in asal'a maaun su madakel a taw.”
Su Kinapagkapia nu Isa al-Masih kanu Dua Kataw a Di Pakailay
29 Na kanu kinaganat'u Isa al-Masih sa Yariku na madakel a benal a taw i minunut lun. 30 Daka aden dua kataw a di pamakailay lu kanu ligid'u lalan a 'bpagagayan, na endaw i kinakineg'ilan sa 'bpagukit su Isa al-Masih na inilalis'ilan edtalu i “Mapulu a tupu nu Daud, ikalimu kami nengka pan!” 31 Ugaid'a sinapalan silan nu madakel a taw sa temelen silan ugaid'a makin nilan pan inisegan i kinalalis'ilan sa “Mapulu a tupu nu Daud, ikalimu kami nengka pan!” 32 Daka mibpalen su Isa al-Masih ka tinawag'in silan ka nia nin pidtalu kanilan na “Ngin i pegkiugan nu a enggulan ku sa lekanu?” 33 Na nia nilan inisumpat kanu Isa al-Masih na “Mapulu, ukai ka pan su mata nami.” 34 Na nalat i nanam'u Isa al-Masih kanilan. Daka dinapenetan nin su mata nilan, na kanu entu demun ba na nakailay silan taman sa pidtatanggunutan nilan su Isa al-Masih.