Su Pakenalan pantag kanu Mategel i Kapagitung'in a 'Gkasaligan
16
Na pidtalu pan nu Isa al-Masih kanu 'bpamangunut lun su nia a pakenalan sa “Aden kawasa a mama a aden 'gkasaligan nin kanu manga kaaden nin. Na nakauma kanu pakinegan nin i su 'gkasaligan nin a entu na pembinasan nin kun su manga kaaden nin a inisalig'in lun. 2 Daka inipatawag'u kawasa a entu su 'gkasaligan nin sa nia nin lun pidtalu na ‘Ngin i 'gkakineg ku a nia a makapantag sa leka? Itapenay nengka sa laki su listan nu manga kaaden ku taman kanu manga nakautang ka di ka den mapakay a kasaligan kanu manga kaaden ku.’ 3 Na nia natagu sa ginawa nu 'gkasaligan na ‘Ngin i enggulan ku amaika iawa aku den kanu galebekan ku a nia? Di aku makagaga enggalebek sa mapasang enggu di aku bun makatika mamangeni. 4 Di ka pan besen ka katawan ku den u ngin i enggulan ku asal'a matalima aku nu namakautang u maawa aku kanu galebekan ku.’5 “Daka inipatawag'in sa edsakataw su langun na namakautang kanu mapulu nin. Na nia nin inidsa kanu nauna na ‘Pila i utang'engka kanu mapulu ku?’ 6 Daka nia nin inisawal na ‘Magatus kabarilis a lana na ulibu.’ Na nia pidtalu nu 'gkasaligan na ‘Nia su listan na utang'engka. Kua ka, ka sambi ka mamagayas sa limapulu.’
7 “Na su nakatundug menem i inidsan nin sa ‘Seka, pila i utang'engka kanu mapulu ku?’ Nia nin inisawal na ‘Sangibu kasaku a bantad.’ Nia pidtalu nu 'gkasaligan na ‘Nia su listan nu utang'engka. Kua ka, ka sambi ka sa walu gatus.’
8 “Na pinugi nu mapulu nin a entu a kawasa su dikena a entu matidtu a 'gkasaligan sabap kanu kategel'u itungan nin. Kagina nia man mategel i kapagitung'in su manga taw a sia luyud kanu dunia kumin kanu manga taw a sia luyud kanu Kadenan. 9 Na nia ku madtalu sa lekanu na usal'u su kakawasan nu sia sa dunia sa kapangilay nu sa mabpakat'u. Ka apia maibped su kakawasan nu a entu na matalima kanu lu kanu pegkalebenan a da den tedtab'in.
10 “Apia entain i kasaligan sa manaut i alaga nin na kasaligan bun sa masela i alaga nin. Ugaid'a u entain menem i salimbuten sa manaut i alaga nin na salimbuten bun sa masela i alaga nin. 11 Na amaika di kanu kasaligan sa kakawasan sia sa dunia na panun ba i kasalig sa lekanu kanu tidtu a kakawasan? 12 Na maitu bun ba, amaika di kanu kasaligan kanu kakawasan nu ped a taw na entain pan a entu i menggay sa lekanu sa madtalu a lekanu demun a kakawasan?
13 “Na dala man ulipen a makapadsalengan nin enggalebek su dua kataw a mapulu nin ka apia ngin den na makadtalipenda nin su sakataw ka su sakataw bu i kanggalebekan nin sa mapia, sakataw bu i makakalimu nin ka makapadtaday nin su sakataw. Na di nu man makapadsalengan su kasimba nu kanu Kadenan enggu su kapangilay nu sa kakawasan sa dunia.”
14 Na guna makineg'u manga taw a malilini a benal sa kuleta a su manga taw a lusud kanu lumpukan a Parisiyu su entu a kadtalu nu Isa al-Masih na pinagumpak'ilan sekanin. 15 Ugaid'a nia pidtalu nu Isa al-Masih kanilan na “Nia nu ipebpagilay sia kanu kaadapan nu manga taw na matidtu kanu ugaid'a 'gkailay man nu Kadenan su pamusungan nu. Na apia ngin i 'bpagenggan sa alaga nu manga taw na mawag a benal i entu sia kanu Kadenan.
16 “Na ibpangusiat den su kasuguan a inisulat'u Nabi Musa enggu su panduan nu manga ped pan a nabi taman kanu timpu nu Yahiya. Na iganat menem lu ba, na ibpangusiat den su Mapia a Tutuma pantag kanu kapendatu nu Kadenan. Na 'bpaginapasen den nu uman i isa su kalusud'ilan lu ba. 17 Na madala pan muna su langit enggu lupa bagu kaawan na katagan i apia satiman bu a batang kanu kasuguan.
18 “Na apia entain a mama i imbelag'in su kaluma nin enggu mangaluma sa ped na pakagkiuga sekanin enggu apia entain menem i mangaluma kanu babay a inimbelag na pakagkiuga bun.”
Su Pakenalan pantag kanu Kawasa a Mama enggu si Lasaru
19 Pidtalu nin pan su nia a pakenalan sa “Aden mama a kawasa a benal a pakambalegkas sa mapia i palas'in a lambayung enggu mapia gaid i kapegkan nin kanu uman gay. 20 Na aden bun mambu mama a sangat i kamiskin nin a bedtuan sa Lasaru a mimbakataw i lawas'in. Pinaiga lu kanu bengawan nu walay nu kawasa a entu a mama 21 ka 'gkapanganganay nin i makakan kanu mangaulug a pegken nu kawasa. Na pedsupegan nu manga asu sekanin ka pendilan nilan su bakataw nin.
22 “Na guna matay si Lasaru na pinananggit sekanin nu manga malaikat lu kanu Nabi Ibrahim. Na minatay bun mambu su kawasa a mama enggu inilebeng sekanin. 23 Na kanu kapedsiksa lun lu sa naraka na nakatengab sekanin na nasandeng'in su Nabi Ibrahim a kaped'in si Lasaru. 24 Na tinawag'in sa matanug su Ibrahim sa ‘Hu lukes ku a Ibrahim, ikalimu aku nengka pan, sugu ka pan si Lasaru sa isumbuk'in pan kanu ig su sawanay kanu tindulu nin ka denggawan nin pan i dila ku a nia, ka sangat a 'gkalasay aku kanu apuy a nia.’ 25 Na nia inisawal'u Nabi Ibrahim na ‘Manga dua na wata, 'gkagkalendem'engka pamun su timpu a bibiag ka pan? Nakua nengka langun su mapia sa ginawa nengka. Ugaid'a si Lasaru na dikena mapia i natalima nin. Na saguna na mapia i 'gkambebetad'in sia ugaid'a seka menem na pedtala sa malasay. 26 Liu pan sa entu na nabpageletan tanu na da taman nin i kadalem'in a baugan ka enggu su miug semia na di makasia enggu su miug seman na di makasan.’ 27 Nia nadtalu nu mama a kawasa na ‘Amaika maitu, na 'bpangenin ku sa leka i sugu ka pan si Lasaru lu kanu walay nu ama ku 28 ka aden pan lima kataw lu a tebped ku sa pused a manga mama. Na paingaten nin pan silan ka enggu di den makasia kanu nambetadan ku a nia a sangat i kalasay nin.’ 29 Ugaid'a nia pidtalu nu Nabi Ibrahim na ‘Lu pamun kanilan su Kitab a Inisulat'u Nabi Musa enggu su kitab a inisulat'u ped pan a manga nabi. Na entu ba i dait a pakikinegen nilan.’ 30 Na nia nakasumpat'u kawasa a mama na ‘Uway, lukes ku a Ibrahim, ugaid'a amaika aden pan embibiag a minatay a makalu kanilan na nasisigulu a edtaubat silan.’ 31 Ugaid'a nia pidtalu nu Nabi Ibrahim na ‘Amaika di silan makikineg kanu Kitab a Inisulat'u Nabi Musa enggu kanu ped pan a manga nabi na di bun silan maginugut apia aden pan embibiag 'bpaluman a minatay.’ ”