Su Bili-bili a Natadin
15
Na nia katatapan na su manga 'bpangubela sa buwis enggu su manga dikena balaagamaa na pedsupeg kanu Isa al-Masih ka 'bpamakikinegen nilan su kabpamandu nin. 2 Ugaid'a su manga taw a lusud kanu lumpukan a Parisiyu enggu su manga gulu nu pangitaban na ibpamagedunga nilan su Isa al-Masih sa nia nilan pedtalun na “Ngin basi i mama a nia a pedsakaw-sakawn nin su manga dikena balaagama enggu 'bpagamung pegkan kanilan?” 3 Guna su maitu na pidtalu nu Isa al-Masih kanilan su nia a pakenalan a 4 “Entain ba sa lekanu i aden ayam'in a magatus a bili-bili, na su satiman na natadin? Na ngintu, di nu tagaken su siyawpulu enggu siyaw timan a bili-bili nu lu kanu tawan-tawan ka pangilayn nu su natadin a entu taman sa di nu matun? 5 Na amaika matun nu den na sangat a mapia i ginawa nu taman sa pamusayn nu muli. 6 Na u makauli kanu den na pangenggaten nu su manga pakat'u enggu su manga pagubay nu ka nia nu edtalun sa kanilan na ‘Enggalaw-galaw tanu ka natun ku den su natadin a bili-bili ku.’ 7 Na maitu bun ba, nia ku madtalu sa lekanu na sangat i kagalaw lu sa sulega amaika edtaubat i sakataw bu a baladusa kumin kanu siyawpulu enggu siyaw kataw a ikelas a di den nasisita i kadtaubat'in.”Su Kuleta a Pilak a Natadin
8 Na pidtalu pan kanilan nu Isa al-Masih su nia a pakenalan sa “Aden babay a aden sapulu timan a kuleta nin a pilak. Na guna matadin su satiman na kinemua sa palitan ka nanapu, na taman sa da nin matun na pinangilay nin bu. 9 Na guna nin matun na pinangenggat'in su manga pakat'in enggu su manga pagubay nin sa nia nin pidtalu na ‘Enggalaw-galaw tanu ka natun ku den su natadin a kuleta ku.’ 10 Na maitu bun ba, nia ku madtalu sa lekanu na labi i kagalaw nu manga malaikat'u Kadenan kanu apia sakataw bu a baladusa a edtaubat.”
Su Wata a Natadin
11 Na pidtalu pamun nu Isa al-Masih su nia a pakenalan sa “Aden mama a dua kataw i wata nin. 12 Na nia pidtalu nu ali a wata na ‘Ama, inggay nengka den sa laki su kakawasan a ibpagumun nengka sa laki.’ Daka pimbad den mambu nu ama nin kanilan su kaaden nin. 13 Na namakapila gay na pibpasa nu ali su nakaumun lun ka mindadalaug kanu mawatan a dalepa. Na pindalatan nin su kaaden nin. 14 Na guna nin maibped su kaaden nin na nasugat'a gutem su dalepa a entu a pidtangenan nin. Na lu ba linemudsu i kinapasang lun. 15 Daka nangunguli sekanin kanu isa a mama a talianged lu. Na pinalu sekanin nu mama kanu dalem ka pinatuganul'in sa manga taw sa lupa. 16 Na sabap kanu kapegkagutem'in na kiugan nin den keman su ipapegkan kanu manga taw sa lupa. Kagina dala 'bpagenggay lun sa makan. 17 Daka lu ba sekanin nakaimaman sa nia natagu sa ginawa nin na ‘Su langun na pedsukayan ni ama a penggalebek na subela-subela i kapegkan nin. Na saki a nia na 'bpelunusan aku den. 18 Na makin muli aku ka edtalun ku kani ama i “Ama, nakandusa aku kanu Kadenan taman sa leka. 19 Na di den 'gkaalus a tawagen aku nengka pan a wata nengka. Na itimbang aku nengka den a isa kanu 'bpanukayan nengka a penggalebek.” ’ 20 Na ginemanat mambu sekanin ka minuli lu kani ama nin. Na mawatan pan sekanin na nasandeng den nu ama nin, na sangat a ginagawan su ama nin taman sa napalalaguy nin malaw enggu nakakep'in ka pinanium'in. 21 Na nia nadtalu nu wata nin na ‘Ama, nakandusa aku kanu Kadenan taman sa leka. Na di den 'gkaalus a tawagen aku nengka pan a wata nengka.’ 22 Ugaid'a makin tinawag'u ama nin su manga ulipen nin ka sinugu nin sa ‘Enggagan kanu! Kua nu su mapia sa langun a lambung lu sa walay ka embalegkasi nu sekanin enggu edsisingi nu taman sa edtalumpai nu. 23 Na sumbali nu su pinagkasebud a sapi ka 'gkanduli tanu sa masela. 24 Ka mana man minatay su nia a wata ku a mimbibiag 'bpaluman. Natadin sekanin na saguna na natun den.’ Na linemudsu den mambu silan kanu kapegkanduli nilan.
25 “Saleta na su kaka a wata nin a mama na lu pan sa dalem. Na guna sekanin uli na sia pan sa lalan na 'gkakineg'in su manga palabuni-bunian. 26 Daka tinawag'in su isa kanu panunugun ka inidsa nin u ngin i 'gkanggula. 27 Na nia inisumpat'u panunugun sa lekanin na ‘Su ali nengka na minuli den. Na sabap sa nakauli sekanin sa da bun baya-baya nin na napasumbali su ama nengka sa pinagkasebud a sapi.’ 28 Na nasakit i ginawa nu kaka taman sa da den sekanin talus lu kanu ludep'u walay. Na liniuwan nu ama nin ka pinamagayukan nin sa kaludep'in. 29 Na nia nin inisumpat kanu ama nin na ‘Ngin den mambu i nia ka lagunan den na penggalebek aku bu sa leka sa manabia ka pan i ulipen aku enggu da ku seka masungkang. Ugaid'a apia su pipis a kambing na da nengka makaenggay sa laki a makanggalaw-galaw ku kanu manga pakat ku. 30 Ugaid'a guna a nia embalingan su wata nengka a minibped kanu kaaden nengka ka pidsamundala nin kanu manga sundal na pinasumbalian nengka pan sa pinagkasebud a sapi.’ 31 Na nia nadtalu nu ama nin sa lekanin na ‘Datu, lalayun ka sia sa laki na su langun na kaaden ku na leka bun man. 32 Ugaid'a dait man a 'gkanduli tanu enggu enggalaw-galaw tanu ka su ali nengka a timbang a minatay na mimbibiag 'bpaluman. Natadin sekanin, na saguna na natun den.’ ”