Su Mama a 'Bpangulebaw i Lawas'in a Pinagkapia nu Isa al-Masih
14
Na aden isa a gay a Gay nu Kabpangintelenen a lu kineman su Isa al-Masih kanu walay nu isa a 'gkaunutan nu lumpukan a Parisiyu. Na pedsipatan sa mapia nu manga taw lu su Isa al-Masih. 2 Saleta na aden lu ba mama a 'bpangulebaw i lawas'in a sama bu di pebpatay. 3 Na inidsa nu Isa al-Masih kanu manga gulu nu pangitaban enggu kanu manga taw a lusud kanu lumpukan a Parisiyu i “Ngintu, inisugut kanu kitab i kapagkapia kanu sakit sa kanu Gay nu Kabpangintelenen atawa ka dala?” 4 Ugaid'a dala nilan sumpati su Isa al-Masih. Daka dinapenetan nu Isa al-Masih su mama ka pinagkapia nin, entu pan ka pinauli nin.5 Nia pidtalu nu Isa al-Masih kanilan na “U aden sa lekanu i maulug i wata nin atawa ka sapi nin lu kanu kalut kanu Gay nu Kabpangintelenen na ngintu, di nu kuan semambut?” 6 Na di nilan 'gkasumpatan su entu ba a idsa nu Isa al-Masih.
Su Ula-ula a Kababa na Muletad enggu su Kapangalimuan
7 Guna masipat'u Isa al-Masih kanu manga ana i 'bpamagagawan nilan 'bpagagayan su 'bpagagayanan nu manga mapulu na pidtalu nin su nia a pakenalan kanu langun nu taw a tinemalabuk lu sa 8 “Amaika patalabuken ka kanu pegkalilangan na da ka magagayan lu kanu 'bpagayanan nu manga mapulu ka basi aden mapulu pan sa leka a pinatalabuk 9 na supegan ka nu napatalabuk sa leka ka edtalun nin i ‘Awa ka pan san ka sekanin i pebpagagayanen san ba.’ Na sabap sa entu na kayan ka, enggu lu ka makaayan kanu mababa sa langun a 'bpagagayanan. 10 Ugaid'a sabap sa entu na amaika aden mapatalabuk sa leka na lu ka ayan kanu 'bpagagayanan nu mababa a taw. Na amaika makauma su napatalabuk sa leka na edtalun nin i ‘Pakat, sia ka ayan sa mapia a nia a 'bpagagayanan.’ Na amaika maitu, na malu naenggan ka sa kabalapantag kanu adapan nu manga taw lu. 11 Kagina apia entain man i taw a ipulu nin i ginawa nin na makababa enggu apia entain menem i ibaba nin i ginawa nin na makapulu.”
12 Na pidtalu bun nu Isa al-Masih kanu napatalabuk lun i “Amaika 'gkanduli ka na di ka menggat su pakat'engka, suled'engka atawa ka pagali nengka enggu su kawasa a pagubay nengka ka kanu temundug na silan menem i menggat sa leka, na amaika maitu na nabalasan ka den kanu kapianan nengka. 13 Ugaid'a u 'gkanduli ka na nia ka pangenggat na su manga miskinan, su manga di pamakalakaw, su manga tiud enggu su manga di pamakailay 14 ka amaika maitu na sangat i kapia nin su entu sa leka kagina di ka nilan magaga mamalas. Na su Kadenan i mamalas sa leka kanu gay a kambibiag'u manga taw a initimbang sa ikelas.”
Su Pakenalan kanu Masela a Kanduli
15 Guna makineg'u isa kanu manga mama a 'bpamagagayan lu kanu lamisan su entu na nia nin pidtalu kanu Isa al-Masih na “Ngin den i kapia nin kanu taw amaika makakan sa kanduli sia kanu kapendatu nu Kadenan.” 16 Ugaid'a nia inisumpat'u Isa al-Masih sa lekanin sa ukit a pakenalan na “Aden mama a 'bpagadil sa masela gaid a kanduli taman sa nagakat sa madakel a taw. 17 Na guna mauma su gay a kapegkanduli na pinaangayan nin kanu panunugun nin su langun nu pinangenggat'in sa nia nin edtalun na ‘Sia kanu den ka naadil den su kanduli.’ 18 Ugaid'a nangumbal den sa dalinan su uman i isa. Su nauna a napangenggat na nia nin pidtalu na ‘Samaya na nakapamasa aku sa lupa na nasisita a mailay ku su entu. Idtud-tud aku nengka lun bu.’ 19 Su sakataw menem na nia nin pidtalu na ‘Aden napamasa ku a sawati a sapi a kapun. Na saguna ba a nia i kabpagilay ku lun. Idtud-tud aku nengka lun bu.’ 20 Na su ikatelu menem na nia nin pidtalu na ‘Bagu aku pamun kinawing tembu di aku pan makatalabuk.’
21 “Na minuli su panunugun ka pinanudtul'in su langun na entu kanu mapulu nin. Na sangat a nalipunget su mapulu nin sa nia nin pidtalu na ‘Pamagayas ka, lu ka kanu manga lalan enggu manga kalsada nu siudad ka pangenggat ka su langun nu manga miskinan, su manga di pamakalakaw, su manga di pamakailay enggu su manga tiud.’ 22 Daka pinggula den mambu nu panunugun su inisugu lun sa nia nin pidtalu na ‘Mapulu, nanggula ku den su inisugu nengka ugaid'a maluwag pamun lu sa ludep.’
23 “Nia pidtalu nu mapulu na ‘Lu ka menem kanu manga lalan kanu liu nu siudad ka pamagayuki ka su apia entain a mailay nengka sa kasia nin ka enggu mapenu su walay ku. 24 Ka nia ku madtalu sa lekanu na apia sakataw kanu nauna a entu a manga pinangenggat na di makatekaw kanu kanduli ku.’ ”
Su Dait a Mabaluy a Makaunut kanu Isa al-Masih
25 Na madakel a benal i midtatanggunut kanu Isa al-Masih. Na linemengi sekanin ka nia nin pidtalu kanilan na 26 “Apia entain i miug munut sa laki na di madtalu a 'bpagunut sa laki amaika nia nin lamigen na su ama nin, su ina nin, su kaluma nin enggu su manga wata nin, su manga tebped'in sa pused a babay-mama apeg den nu ginawa nin. 27 Na maitu bun ba su apia entain a di nin pamusayn su kayu nin a pinambalawaga sa kaunut'in sa laki na di madtalu a 'bpagunut sa laki. 28 Ka apia entain sa lekanu i pegkiug pembalay sa malambeg a panandengan na nia nin enggulan na magagayan muna ka pagitungen nin u makadtun su kuleta nin taman sa kapasad'in lun. 29 Ka tabia bun ka nia taman a mapasad na su udsadan nu palaus'in ka naibped den su kuleta nin na edsudian nu apia entain i makailay lun 30 sa nia nilan edtalun na ‘Su nia a mama na matag mimbalay na di nin 'gkapasad.’ ”
31 Nia pan pidtalu nu Isa al-Masih na “Entain i datu a embunua sa pagidsan nin bun a datu a di nin muna pagitungen u ngintu, su sapulu ngibu a sundalu nin na makagaga embunua kanu duapulu ngibu a sundalu nu pakambunua nin a datu? 32 Na amaika nia nin kalangan lun i di sekanin makaatu na mawatan pan silan na mapasugu sekanin lu kanu datu sa panun i kapagayun nilan.
33 “Kagina ka maitu na pagitung'u muna i kaunut'u sa laki ka dala isa bu sa lekanu i mabaluy a makaunut sa laki amaika nia masela sa ginawa nin na su kaaden nin.
Su Timus a da Katagan nin