Entain i Badtug sa Langun sia kanu Kapendatu nu Kadenan?
18
Na kanu entu ba a kutika na sinemupeg kanu Isa al-Masih su 'bpamangunut lun ka inidsa nilan lun i “Entain i mabadtug sa langun sia kanu kapendatu nu Kadenan?” 2 Daka tinemawag su Isa al-Masih sa wata ka pinadtindeg'in kanu luk'ilan 3 ka nia nin pidtalu na “Saben-sabenal a pedtalun ku sa lekanu i taman a di kanu edsalin sa maya ba kanu manga wata na di kanu malusud kanu kapendatu nu Kadenan. 4 Kagina ka maitu na apia entain i ibaba nin i ginawa nin sa mana kanu manga wata ba a nia na entu ba i balapantag sa langun sia kanu kapendatu nu Kadenan. 5 Apia entain i temalima sa isa kanu maya ba a manga wata sabap sa 'bpaginugut silan sa laki na mana bun saki i tinalima nin. 6 Na apia entain menem a taw i makapandusaa nin su mababa a manga taw a maya ba kanu manga wata a aden salig'in sa laki na mapegkag pan a kasiksan nu taw a entu i iketan sa masela a gilingan a watu su lig'in ka igeled lu kanu luk'u lagat.”Su Sabapan nu Kandusa
7 Nia pan pidtalu nu Isa al-Masih na “Duan-duan nin den su sakadunia sabap sa madakel a sasat a pakapandusa kanilan. Na natalatantu man a makatingguma su sasat ugaid'a duan-duan nin den su taw a kadsabapan na kandusa nu ped'in.
8 “Na amaika su lima nengka atawa ka su ay nengka i kadsabapan na kandusa nengka na putuk ka, ka idtug'engka. Ka nia tinemu i sabala bu i lima nengka atawa ka ay nengka ugaid'a aden sa leka su uyag-uyag a da taman nin kumin sa dua embala i lima nengka atawa ka ay nengka ugaid'a lu ka makaidtug kanu apuy sa naraka taman sa taman. 9 Amaika ka su mata nengka menem i kadsabapan na kandusa nengka na suat ka su entu ka idtug'engka ka nia tinemu i sabala bu i mata nengka ugaid'a aden sa leka su uyag-uyag a da taman nin kumin sa aden sa leka su dua embala a mata nengka ugaid'a lu ka makaidtug kanu apuy sa naraka.”
Su Natadin a Bili-bili
10-11 Na pidtalu pan nu Isa al-Masih i “Pangingati nu a benal i makababa nu su mababa a manga taw a maya ba kanu manga wata a nia, ka nia ku madtalu sa lekanu na su malaikat'ilan a pedtiakap kanilanb na 'bpeludep 'bpeluakat kanu Ama ku a lu sa sulega.
12 “Ngin i kalangan nu amaika aden taw a pedtuganul sa ayam'in a magatus a bili-bili lu kanu palaw, na satiman na natadin? Ngintu, di nin tagaken su siyawpulu enggu siyaw timan a bili-bili nin ka enggu nin mapangilay su satiman a natadin? Tagaken nin guna. 13 Na u matun nin den su entu na saben-sabenal a sangat i kagalaw nin lun kumin kanu siyawpulu enggu siyaw a da matadin. 14 Na maitu bun ba i kahanda nu Ama nu a lu sa sulega. Di nin kiugan a matadin i apia sakataw bu kanu mababa a manga taw a maya ba kanu manga wata.”
Su Dait a Enggulan amaika Endusa su Suled'engka sa Paginugut
15 Na pidtalu bun nu Isa al-Masih i “Amaika endusa sa leka su suled'engka sa paginugut na 'bpawangi ka, imbitiala nengka sekanin sa dua kanu bu, patuntayi ka lun su pinggula nin a di mapia. Amaika pakikinegen ka nin taman sa mangeni sa ampun na nakambalingan su mapia a kadsuled'u. 16 Ugaid'a amaika di sekanin makikineg na pangenggat ka sa sakataw atawa ka dua kataw kanu suled'engka sa paginugut ka enggu aden dua kataw atawa ka telu kataw a makadsaksi kanu apia ngin a mambitiala. 17 Ugaid'a u di pamun sekanin makikineg kanilan na ipanudtul'engka den kanu umpungan nu 'bpamaginugut ugaid'a amaika di pamun sekanin makikineg kanu umpungan nu 'bpamaginugut na itimbang'u den sekanin sa dikena-Yahudic atawa ka 'bpangubela sa buwis.d 18 Na saben-sabenal a pedtalun ku sa lekanu i, u ngin i isugut'u sia sa dunia na nakasugut den i entu lu sa sulega enggu u ngin i isapal'u sia sa dunia na nakasapal den i entu lu sa sulega.e 19 Na saben-sabenal a pedtalun ku bun sa lekanu i, u aden dua kataw a nagayun mangeni-ngeni sa apia ngin a 'bpangenin nilan na inggay nu Ama ku su entu kanilan a lu sa sulega. 20 Kagina u aden dua kataw atawa ka telu kataw a endilimudan mangeni-ngeni sia kanu ingala ku na lu aku bun kanilan.”
Endaw Taman i Kaampun nu Taw kanu Ped'in
21 Daka sinemupeg si Pitru kanu Isa al-Masih ka inidsa nin lun i “Mapulu, endaw taman i kaampun ku kanu suled ku a tatap pendusa sa laki? Ngintu, taman sa makapitu?” 22 Na nia pidtalu nu Isa al-Masih sa lekanin na “Dikena taman bu sa makapitu i kaampun nengka lun ka taman sa makapitupulu enggu pitu takep.f 23 Kagina sia kanu kapendatu nu Kadenan na nia nin kalagidan na mana su isa a Sultan a pegkiugan nin papembayad su manga panunugun nin a nakautang sa lekanin. 24 Na linudsuan nin mangetuk su namakautang lun. Na aden isa a nakautang sa lekanin sa miliun-miliun i kadakel'in. 25 Na di den 'gkagaga nu mama pembayad su entu. Guna su maitu na inisugu nu Sultan sa lekanin i 'bpasan nin su langun nu kaaden nin apeg den nu kaluma nin enggu su manga wata nin taman kanu ginawa nin ka enggu nin pakabayad lun. 26 Daka sinemugiud kanu Sultan su panunugun ka pinangeni nin lun i ‘Enggi aku pan sa kutika ka bayadan ku langun su entu sa leka.’ 27 Na nalat i nanam'u Sultan sa lekanin taman sa da nin den pabayadi su utang'in. 28 Na guna su nakaganat su panunugun lu na nailay nin su sakataw a ped'in bun a panunugun a aden utang'in sa lekanin a nia nin kadakel na manga pat ulan a sukay nu gumagalebek.g Na sinigkem'in taman sa pinekel'in ka pidtalu nin lun i mayad sekanin sa utang'in sa lekanin. 29 Daka sinemugiud su panunugun kanu ped'in bun ba a entu a panunugun ka pinangeni nin lun i ‘Enggi aku pan sa kutika sa kabayad ku sa leka.’ 30 Ugaid'a dala sekanin kiug ka makin nin pan inipabilanggu taman a di nin kabayadan su utang'in sa lekanin. 31 Na guna mailay i entu nu ped'ilan menem a panunugun na sangat a nasakit i ginawa nilan sa lekanin. Tembu inipanudtul'ilan kanu Sultan su entu a nanggula. 32 Na inipatawag'u Sultan su panunugun a entu ka nia nin lun pidtalu na ‘Sangat i kadaluaka nengka a panunugun. Da ku den pabayada seka kanu langun na utang'engka kagina napakalimu-limu ka sa laki. 33 Na dikena ba nia dait na malat i nanam'engka bun kanu ped'engka a panunugun a mana bun su kinalat a nanam ku sa leka?’ 34 Na nasakit a benal i ginawa nu Sultan sa lekanin, na pinakapasangan nin taman sa di nin kabayadan su langun nu utang'in sa lekanin. 35 Na maya bun ba i enggulan nu Ama ku a lu sa sulega sa lekanu amaika di nu ampunen sa senep sa atay su suled'u.”