Su manga Kadsabapan na Kandusa
17
Na pidtalu nu Isa al-Masih kanu 'bpamangunut lun i “Natalatantu a makatingguma su manga sasat ugaid'a duan-duan nin den su taw a kadsabapan na kandusa nu ped'in. 2 Mapegkag pan a kasiksan sa lekanin i iketan sa masela a gilingan a watu su lig'in ka idtug lu kanu lagat amaika makapandusa nin su manga mababa a manga taw a aden salig'in sa laki.3 “Kagina ka maitu na pangingati nu i ginawa nu. Amaika mindusa sa leka su suled'engka na pangindaw ka enggu ampun ka u mangeni sekanin sa ampun. 4 Na apia makapitu pan sekanin makandusa sa leka kanu kagagabian enggu makapitu bun mangeni sa leka sa ampun sa nia nin edtalun na ‘Ampun aku bu,’ na ampun ka bun sekanin.”
Su Pantag kanu Salig
5 Na nia pidtalu nu 'bpamangunut kanu Isa al-Masih na “Embageli ka su salig'ami.” 6 Na nia inisawal'u Isa al-Masih kanilan na “U mana bu man ka aden salig'u a mana bu kanaut'a lagas'a 'gkamun a mustasa na madtalu nu kanu masela a nia a kayu i ‘Sapuat ka i ginawa nengka ka ialat'engka lu kanu lagat,’ na manggula su entu.
Su Galebekan nu Panunugun
7 “Upama ka aden isa sa lekanu i aden ulipen nin a pendadu lu sa dalem udi na pedtameng sa bili-bili na su kauli nin na di nu basi edtalun sa lekanin i ‘Talus ka, ayan ka sia ka enggu ka pakakan.’ 8 Ka nia pan mula na nia nu edtalun na ‘Pagadil ka sa ipenggabi ku enggu 'bpakut ka sa mapia ka talagadi aku taman sa kapasad ku keman enggu minem, entu pan ka kan ka, enggu inem ka.’ 9 Na ngintu, edsukulan nu mapulu nin su ulipen nin a entu kanu kinanggula nin kanu langun na inisugu lun? Dili guna. 10 Na maitu kanu bun ba, na amaika nanggalebek'u den su langun nu manga inisugu sa lekanu nu Kadenan na nia nu bu madtalu na ‘Ulipen kami bu nu Kadenan, dikena pakapangingalap sa pugi ka penggulan nami bu su ngin i nakasangan sa lekami.’ ”
Su Sapulu Kataw a aden Sakit'in a Debpig
11 Na kanu kabpelu nu Isa al-Masih sa Awrusalim na lu minukit kanu dulunan nu prubinsia a Samaria enggu Galili. 12 Guna su 'bpeludep den sekanin kanu isa kanu dalepa lu na sinumbak sekanin nu sapulu kataw a aden sakit'in a debpig ugaid'a di nilan 'bpagubayn su Isa al-Masih. 13 Na tinawag'ilan sekanin sa matanug sa “Hu Isa, a Mapulu, ikalimu kami nengka pan.” 14 Na guna silan mailay nu Isa al-Masih na nia nin pidtalu kanilan na “Lu kanu kanu manga 'bpangurban ka ipaamad'u i nasuti kanu den.” Na linemu den mambu silan. Na sia pan silan sa lalan na naawa den su sakit'ilan. 15 Na guna nilan madsima i naawa den su sakit'ilan na mimbalingan su sakataw ka pinugi nin sa matanug su Kadenan 16 taman sa sinemugiud kanu adapan nu Isa al-Masih ka midsukul-sukul. Na su mama a entu na taw sa Samaria.a 17 Daka nia pidtalu nu Isa al-Masih na “Dikena ba sapulu kataw su naawan na sakit? Endaw den su siyaw kataw? 18 Ngin i nia ka su sakataw bu a nia a lapu i mimbalingan sia mugi kanu Kadenan?” 19 Daka nia pidtalu nu Isa al-Masih kanu mimbalingan a entu na “Edtindeg ka, ka ganat ka den, ka su salig'engka i napagkapia sa leka.”
Su Pantag kanu Kauma nu Kapendatu nu Kadenan
20 Na aden isa a gay a inidsan nu ped a manga taw a lusud kanu lumpukan a Parisiyu su Isa al-Masih u kanu i kauma nu kapendatu nu Kadenan. Na nia nin inisawal kanilan na “Su kapendatu nu Kadenan na dala tusan lun i kauma nin. 21 Dala edtalu sa ‘Ilay ka, nia den!’ atawa ka ‘Entu den!’ Ka nia nin kabantang na su kapendatu nu Kadenan na sia den sa lekanu.”
22 Na nia nin pidtalu kanu 'bpamangunut lun na “Aden mauma a kutika a mapangingalap'u i mailay nu su Kaka nu Manusia sa apia mangagan bu ugaid'a di nu mailay. 23 Na aden edtalu sa lekanu sa ‘Entu den sekanin!’ atawa ka ‘Nia den sekanin!’ Na da kanu 'bpelu enggu di nu maginuguti i entu. 24 Ka mana bun su kapedtalas'u kilat a pegkaliwanag'in su kawang-kawangan, na maitu bun ba su kapegkauma nu Kaka nu Manusia. 25 Ugaid'a temala muna sekanin sa madakel a kamalasayan enggu ikias sekanin nu manga taw sa saguna a timpu.
26 “Na nia kalagidan nu gay a kauma nu Kaka nu Manusia na su timpu nu Nabi Nuh, 27 ka kanu entu a timpu na su manga taw na mana bun dala 'gkanggula ka 'bpamegkan bun silan, 'bpamanginem enggu 'bpapangalumaya pamun silan taman kanu gay a nageda den su Nabi Nuh kanu kapal. Guna su nakauma su kinagkadalem na langun nilan na namamatay.
28 “Na maitu bun ba i nanggula kanu timpu nu Lut, na langun nu taw na 'bpamegkan, 'bpamanginem, pebpapasay, 'bpamamula enggu pembabalay. 29 Ugaid'a kanu gay a kinaganat'i Lut kanu dalepa a Sudum na minulan sa apuy enggu sandawa taman sa namamatay su langun-langun. 30 Na maitu bun ba i manggula kanu gay a kabpapayag'u Kaka nu Manusia. 31 Na kanu entu ba a gay na su taw a lu sa liu na walay nin na di den lemudep kanu walay nin asal'a mangua pan sa langun-taman nin. Na maitu bun ba su lu kanu 'bpangangawidan na di den dait a muli pan kanu walay nin. 32 Na nia nu 'gkakalendem na su nanggula nu kaluma ni Lut.b 33 Na apia entain man i 'bpaginapasen nin i kalipuas'in kanu umul'in na makin madala sa lekanin su entu. Ugaid'a apia entain menem i kadalan na umul na makatalima sa uyag-uyag a da taman nin. 34 Na nia ku madtalu sa lekanu na su kauma nu Kaka nu Manusia na su dua kataw a pedtulug sa magabi kanu sawalu bu a igan na kuan su sakataw enggu su sakataw menem na itabun. 35 Na su dua kataw menem a babay a penggiling, na maitu bun ba, kuan su sakataw enggu su sakataw na itabun. 36 Na maitu bun ba su dua kataw a mama lu kanu 'bpangangawidan na kuan su sakataw enggu su sakataw na itabun.”c
37 Na inidsa nu 'bpamangunut kanu Isa al-Masih i “Mapulu, endaw i entu ba?” Nia nin inisumpat na “Amaika endaw mabulig su manga masela a papanuk a 'bpangan sa minatay na katawan nu i aden lu ba bangkay.”