Su Kinasigay nu Isa al-Masih
17
Na guna maipus su nakanem gay na pinaunut'u Isa al-Masih si Pitru enggu su edsuled a si Yakub enggu si Yuhan lu kanu malambeg a palaw, na natalipulu bu silan lu ba. 2 Na gagalu na kapedtulik'ilan kanu Isa al-Masih na nakatekaw demun edsalin su palas'in. Sinemigay su beneng'in sa mana kasigay na senang enggu pakaipeng-ipeng i kinagkaputi nu balegkas'in. 3 Na nakatekaw menem 'bpapapayag kanilan su Nabi Musa enggu su Nabi Ilias a inimbitiala nilan su Isa al-Masih. 4 Daka nia nadtalu ni Pitru kanu Isa al-Masih na “Mapulu, mapia ka sia tanu! U miug ka na mumbal aku sia sa telu timan a balal: satiman i leka, satiman i kanu Nabi Musa enggu satiman menem i kanu Nabi Ilias.” 5 Na gagalu nu kapedtalu ni Pitru na nakatekaw demun silan natangguban na gabun a sangat a pakaipeng-ipeng. Daka nakatekaw i aden suala a nakabpun kanu gabun sa nia nin pidtalu na “Nia ba su Tunggal a wataa ku a pinadtaya enggu sangat a 'gkasuatan ku. Pakikineg'u sekanin.” 6 Na guna nilan i nia makineg na nakasugiud silan ka sangat a nagilekan silan. 7 Ugaid'a linulud silan nu Isa al-Masih ka inami nin silan sa nia nin pidtalu na “Edtindeg kanu, da kanu 'gkagilek.” 8 Na guna silan tengab na da den nailay nilan a ped ka su Isa al-Masih bun den.9 Na gagalu nu kabpeludus'ilan kanu palaw na inisugu nu Isa al-Masih kanilan i apia sakataw na dala edtaluan nilan kanu entu a nailay nilan taman sa di pan matay enggu makambibiag 'bpaluman su Kaka nu Manusia. 10 Daka inidsa sa lekanin nu telu kataw a 'bpamangunut lun i “Ngintu ka pedtalun nu manga gulu nu pangitaban i natatalanged kun a pambalinganen muna sia sa dunia su Ilias unan nu kauma nu Masih?” 11 Na nia inisawal'u Isa al-Masih kanilan na “Benal a pambalinganen muna su Ilias sia sa dunia ka enggu nin kaumbayan su langun nu dait a umbayan. 12 Ugaid'a pedtalun ku sa lekanu i nakauma den man sia su Iliasb ugaid'a da sekanin makilala taman sa pinggula nilan sa lekanin i apia ngin i pegkiugan nilan lun penggula. Na maitu bun ba i manggula nu Kaka nu Manusia, di den mauget na mukit den sekanin sa kamalasayan sia kanu palad'ilan.” 13 Na entu pan ba ka natuntayan nu 'bpamangunut lun i su Nabi Yahiya besen a Nanalawat su pedtalun nin a entu.
Su Kinapagkapia nu Isa al-Masih kanu Wata a Inasukan na Saitan
14 Na guna silan makauma kanu madakel a taw na aden mama a sinemupeg kanu Isa al-Masih ka midtinggaleb kanu kasangulan nin ka nia nin pidtalu na 15 “Mapulu, ikalimu nengka pan su wata ku a mama a pedsaingen. Na sangat a 'gkapasangan sekanin. Tatap sekanin 'gkaudtang kanu apuy enggu kanu ig. 16 Na pinananggit ku sekanin kanu 'bpamangunut sa leka ugaid'a dala nilan sekanin magaga mapagkapia.” 17 Na nia nadtalu nu Isa al-Masih na “Ngin den a kada na salig i nia a manga taw saguna! Sangat a namakasibay kanu den! Ngin ba i kauget'a kadtangen ku sa lekanu? Endaw ba taman i katigkel ku sa lekanu? It'u sia sekanin sa laki.” 18 Na pidtaluan nu Isa al-Masih su saitan sa awan nin su wata na minawa mambu su saitan taman sa midsambuta demun su kinagkapia nu wata.
19 Daka sinupegan nu 'bpamangunut lun su Isa al-Masih ka tinalipulu nilan midsa sa “Ngintu ka di nami pakapaawa su saitan a entu?” 20-21 Na nia nin pidtalu kanilan na “Kagina manaut a benal i salig'u. Ugaid'a saben-sabenal a pedtalun ku sa lekanu i, u aden bu man salig'u a apia mana bu kanaut'a lagas'a 'gkamun a mustasa na makapaalat'u i palaw ba a nia u sugun nu sa malat. Ka da man di nu magaga amaika semalig kanu.”
Su Kinapayag'u Isa al-Masih 'Bpaluman pantag kanu Kapatay nin
22 Na guna mangalimud su Isa al-Masih enggu su 'bpamangunut lun lu sa Galili na pidtalu nu Isa al-Masih kanilan i “Su Kaka nu Manusia na mangagan den ipalad kanu manga kuntela nin. 23 Na imatayan nilan sekanin ugaid'a kanu ikatelu nin gay na embibiag.” Na sangat a nalidu i ginawa nu 'bpamangunut lun.
Su Kinabayad'u Isa al-Masih sa Buwis
24 Na guna makauma silan sa Kapurnaum na aden linemulud kani Pitru a 'bpamangubela sa buwis sa nia nilan lun inidsa na “Pembayad bun sa buwis kanu Suti a 'Bpagagaman su gulu nu?” 25 Nia inisumpat'i Pitru na “Uway mambu.”
Na guna makaludep si Pitru lu kanu walay, na inunanan sekanin midsa nu Isa al-Masih sa “Pitru, sa leka lun a kalangan, entain i pembayad sa buwis kanu manga sultan sia sa dunia? Su manga wata nilan atawa ka su ped a taw?” 26 Nia inisumpat'i Pitru na “Su ped a taw.” Daka nia menem pidtalu nu Isa al-Masih sa lekanin na “Amaika maitu na di den nasisita a mayad pan sa buwis su manga wata. 27 Ugaid'a asal'a di ta makagkalat sa ginawa kanilan na mayad ta bun sa buwis, na lu ka sa lanaw ka pangawat ka. Na endaw i muna-muna a makua nengka a seda na ukai ka i ngali nin ka mailay nengka lu ba i kuleta a pilakc na kua ka i entu ka entu ba i ibayad ta dua.”