Su Kabpangeni sa Tanda kanu Isa al-Masih
16
Na aden manga taw a lusud kanu lumpukan a Parisiyu enggu Sadusiyu i namakauma lu kanu Isa al-Masih ka pembatalun nilan sekanin. Na pinangeni nilan i mapailay sekanin sa tanda a ebpun sa Kadenan.a 2 Ugaid'a nia pidtalu nu Isa al-Masih kanilan na “Sia kanu kagkagabi ka u maliga su kawang-kawangan na katawan nu i mapia su temundug a gay. 3 Na sia menem kanu kagkapita ka u maliga su kawang-kawangan na katawan nu i dikena mapia su gay. Katawan nu a benal 'bpilatas su ula-ula nu gay sia kanu kapegkailay nu kanu kawang-kawangan. Ugaid'a di nu katawan 'bpilatas su manga tanda kanu 'gkanganggula sa saguna a manga timpu. 4 Sekanu a manga taw sa saguna a timpu a manga baladusa enggu tinemaligkud kanu Kadenan na pakapangingalap kanu sa tanda ugaid'a dala man tanda a makapailay sa lekanu nia tabia na su tanda a sia nakanggulalan kanu Nabi Yunus.”b Daka tinagak'in silan.Su Pakembang'u manga Taw a Lusud kanu Lumpukan a Parisiyu enggu Sadusiyu
5 Na linemipag silan lu kanu lanaw nu Galili saleta mambu na nakalipat embalutu sa makan su 'bpamangunut lun. 6 Na pidtalu nu Isa al-Masih kanilan i “Pangingati nu a benal su pakembang'u manga taw a lusud kanu lumpukan a Parisiyu enggu Sadusiyu.” 7 Daka mimbibitialai su 'bpamangunut lun sa “Nia sabap a kinadtalu nin sa nia na da tanu makambalutu sa pan.” 8 Na 'gkatawan bun nu Isa al-Masih su pembibitialan nilan. Daka nia nin pidtalu kanilan na “Manaut a benal i salig'u, nginan ka nia nu 'gkambibitiala i dala nait'u a makan? 9 Nginan, di kanu pamun pakatuntay? Di nu 'gkatademan su kinadtebi-tebi ku kanu lima timan a pan a inipakan kanu lima ngibu i kadakel'in a taw? Pila kabukag i nangalimud'u a nasama a pan kanu entu ba? 10 Na su pitu timan menem a pan a inipakan kanu pat ngibu i kadakel'in a manga taw, na pila kabukag menem i nasama a nangalimud'u? 11 Nginan, di pamun 'gkasaut'a pamikilan nu i dikena nia ku pembitialan i pantag sa pan ka nia ku pembitialan sa lekanu na su pakembang'u manga taw a lusud kanu lumpukan a Parisiyu enggu Sadusiyu?” 12 Na entu pan ba ka natuntayan nu 'bpamangunut lun i dikena nia pedtalun nu Isa al-Masih su matakapala a pakembang'u manga taw a Parisiyu enggu Sadusiyu ka su panduan nilan.
Su Kinapayag'u Pitru u Entain su Isa al-Masih
13 Na guna silan makauma kanu inged a masupeg kanu siudad a Kaisaria-Pilipus na inidsa nu Isa al-Masih kanu 'bpamangunut lun i “Entain su Kaka nu Manusia kanu kapegkasabut'u manga taw?” 14 Na nia nilan lun inisumpat na “Sekanin kun su Yahiya a Nanalawat,c nia menem kadtalu nu ped na sekanin su Nabi Ilias,d su ped menem na sekanin su Nabi Yaramias enggu su ped menem na isa sekanin kanu manga ped pan a nabi paganay.” 15 Daka inidsa nu Isa al-Masih kanilan i “Ugaid'a sa lekanu na entain aku?” 16 Na nia inisumpat'i Simiun Pitru na “Seka su Masih a Tunggal'u kaisa-isa nin bu a tidtu a Kadenan!” 17 Na nia pidtalu nu Isa al-Masih sa lekanin na “Sangat i kapia nin i nia sa leka, Simiun a wata ni Yuhan, ka dikena man sia kanu kapegkagaga nu manusia i kinataw nengka sa nia ka su Ama ku a lu sa sulega i minayag lun sa leka. 18 Na pedtalun ku sa leka i seka si Pitru,e na kanu nia ba a masela a watuf i patindegan ku kanu umpungan nu 'bpamaginugut sa laki. Di silan tabanan nu bagel'u kanarakan. 19 Na inggay ku sa leka su gunsi nu kalusud kanu kapendatu nu Kadenan. Na u ngin i isugut'engka sia sa dunia na nakasugut den i entu lu sa sulega enggu u ngin i isapal'engka sia sa dunia na nakasapal den i entu lu sa sulega.” 20 Daka inibpaliugat'u Isa al-Masih kanilan i apia sakataw na dala muna edtaluan nilan lun sa sekanin su Masih.
Su Kinapayag'u Isa al-Masih pantag kanu Dait a Maukit'in a Kamalasayan enggu su Kapatay nin
21 Na iganat kanu entu ba a timpu na linudsuan nu Isa al-Masih edsinantal kanu 'bpamangunut lun i nasisita a lemu sekanin sa Awrusalim enggu dait a mukit sekanin sa madakel a kamalasayan sia kanu palad'u 'gkangaunutan nu manga Yahudi enggu su manga mapulu nu 'bpamangurban taman den kanu manga gulu nu pangitaban. Na imatayan sekanin ugaid'a kanu ikatelu nin gay na embibiag sekanin 'bpaluman. 22 Daka guna su maitu na inisibay ni Pitru su Isa al-Masih ka dinaway nin sa nia nin pidtalu na “Mapulu, di isugut'u Kadenan i nan! Di manggula i nan sa leka.” 23 Ugaid'a sinangulan nu Isa al-Masih si Pitru ka dinaway nin sa nia nin lun pidtalu na “Awa ka sia Saitan! Pakaungen ka sa laki. Su 'gkapagitung'engka a nan na dikena ebpun kanu Kadenan ka kanu manusia.” 24 Daka nia pidtalu nu Isa al-Masih kanu 'bpamangunut lun na “U entain i miug mabaluy a makaunut sa laki na dait a lipatanan nin su kiug'u ginawa nin enggu pamusayn nin su kayu nin a pinambalawagag ka munut sa laki. 25 Ka apia entain i kiugan nin lemipuas su umul'in na makin madala sa lekanin su entu. Ugaid'a apia entain menem i kadalan na umul sabap sa laki na makatalima sa uyag-uyag a da taman nin. 26 Ka ngin i katagan nin kanu taw amaika makua nin su langun nu kakawasan sa dunia ugaid'a di nin matalima su uyag-uyag a da taman nin?h Atawa ka aden ba makaenggay nu taw a makaaun nin kanu umul'in sa apuy sa naraka? Dala guna. 27 Na su Kaka nu Manusia na makatingguma man sia a linangkapan nu sigay nu Amai nin kaped'in su manga malaikatj ka balasan nin su taw sia luyud kanu ngin i pinggalebek'in. 28 Na saben-sabenal a pedtalun ku sa lekanu i di matag matay su ped sa lekanu sia taman sa di nilan mailay su katingguma nu Kaka nu Manusia ka enggu nin kandatuan su manusia.”