Su Tidtu-tidtu a Pakagkaledsik kanu Taw
15
Na aden manga taw a lusud kanu lumpukan a Parisiyu enggu manga gulu nu pangitaban a ebpun sa Awrusalim i linemu kanu Isa al-Masih ka pidtaluan nilan sa 2 “Nginan ka 'bpanalepasen nu 'bpamangunut sa leka su adat-betad'u manga kaapuan tanu? Ka di nilan pedsutin su lima nilan sa ukit a kapenggagas lun bagu silan pegkan.” 3 Ugaid'a nia inisumpat'u Isa al-Masih kanilan na “Sekanu, na nginan ka 'bpanalepasen nu bun su kasuguan nu Kadenan sabap bu sa kanu adat-betad'u? 4 Ka nia man kadtalu nu Kadenan na ‘Pagadati nu su ama nu enggu su ina nu’a enggu ‘Apia entain i edtalu-talu sa mawag kanu ama nin atawa ka kanu ina nin na dait a imatayan.’b 5 Ugaid'a sekanu na nia nu ibpamandu na mapakay a edtalun nu taw kanu ama nin enggu kanu ina nin i ‘Da den makadtabang ku sa lekanu ka su langun na ipedtabang ku sa lekanu na inenggay ku den kanu Kadenan.’c6 Nia nin maena na di den nasisita a tabangan nin pan su lukes'in. Na sabap kanu adat-betad'u na naawan nu sa kapantag su kadtalu nu Kadenan.
7 “Sekanu a dikena senep sa atay i kabpagagama nin, na benal man su naalung'u Nabi Isayas pantag sa lekanu a
8 ‘Su kabpagadat'u manga taw a nia sa laki na inandag bu sa ngali
ka nia nin kabantang na mawatan i atay nilan sa laki.
9 Su kapedsimba nilan sa laki na dala katagan nin.
Su panduan nu manusia na ibpamandu nilan sa nia nilan pedtalun na ebpun sa laki.’d”
10 Na pinasupeg'u Isa al-Masih su madakel a taw ka pidtalu nin i “Pakikineg kanu sa mapia enggu tuntayi nu su nia, 11 dikena nia pakagkaledsik kanu taw su ngin i 'bpeludep kanu ngali nin ka nia man pakagkaledsik kanu taw na su ngin i 'bpeliu kanu ngali nin.” 12 Daka sinemupeg sa lekanin su 'bpamangunut lun ka pidtalu nilan lun i “Mapulu, ngintu, katawan nengka i migkalat i ginawa nu manga taw a lusud kanu lumpukan a Parisiyu sabap kanu pidtalu nengka?” 13 Ugaid'a nia inisumpat'u Isa al-Masih kanilan na “Su langun na pamulan a dikena inipamula nu Ama ku a lu sa sulega na mapadtud bun. 14 Padtaday nu den silan. Mana man silan manga pisek a 'bpagagak sa pisek. Na amaika nia bun 'bpagagak kanu pisek i pisek bun na isa bu i kaulug'ilan kanu kalut.”
15 Na nia pidtalu ni Pitru kanu Isa al-Masih na “Edsinantal ka kun na sa lekami u ngin i maena nu kadtalu nengka a entu pantag kanu pakagkaledsik kanu taw.” 16 Daka nia nakasumpat'u Isa al-Masih na “Apia sekanu na di nu pamun 'gkatuntayan su entu? 17 Di nu 'gkaimamanan i apia ngin i makaludep kanu ngali nu taw na pedsagad bu kanu tian nin ka 'bpeliu bun? 18 Ugaid'a su 'bpeliu kanu ngali nu taw na ebpun kanu atay nin. Na entu ba i pakagkaledsik kanu taw. 19 Kagina sia pakabpun kanu pamusungan nu taw su manga mawag a itungan a mana su kapangimatay, kagkiuga, kapedsina, kapanegkaw, kadsaksi sa dikena benal enggu kapanila-tila. 20 Na nia ba i pakagkaledsik kanu taw, dikena su kapegkan a di penggagas sa lima.”
Su Babay a Dikena-Yahudi a Mabagel i Salig'in
21 Na ginemanat lu su Isa al-Masih ka linemu kanu embala-bala kanu dalepa a Tair enggu Sidun. 22 Daka nakatekaw demun i aden babay a taw sa Kanaan a lu bun ba pegkaleben kanu entu a inged na linemu kanu Isa al-Masih ka inilalis'in edtalu i “Hu Mapulu a tupu nu Daud, ikalimu aku nengka pan. Su wata ku a babay na inasukan na saitan. Na sangat a 'gkapasangan sekanin.” 23 Ugaid'a da a benal sumpati nu Isa al-Masih su babay. Na linulud sekanin nu 'bpamangunut lun ka pinangeni nilan lun i “Edtalu ka lun den na i awan tanu nin den ka pedtundug-tundug den 'bpamikal sa lekitanu a 'bpelalis.” 24 Na nia pidtalu nu Isa al-Masih na “Nia bu sinuguan sa laki na sia bu kanu manga tupu nu Israil a mana nangatadin a bili-bili.” 25 Ugaid'a sinemupeg bun kanu Isa al-Masih su babay ka sinugiudan nin sa nia nin pidtalu na “Mapulu, tabangi aku den.” 26 Ugaid'a nia nin inisumpat na “Dikena mapia a kuan su pegken nu manga wata ka inggay kanu manga ayam a asu.”e 27 Na nia nakasumpat'u babay na “Uway mambu Mapulu, ugaid'a apia man su manga ayam a asu na 'bpanimet bun kanu 'gkangaulug a pegken nu manga mapulu nilan.” 28 Daka nia nadtalu nu Isa al-Masih kanu babay na “Bai, masela a benal i salig'engka! Sigi, manggula su 'bpangenin nengka a nan.” Na naulian mambu su wata nu babay kanu entu demun ba a kutika.
Su Kinapagkapia nu Isa al-Masih kanu manga Taw a aden Sakit'in enggu su Kinapakan nin menem kanu Madakel a Taw
29 Na minawa menem lu su Isa al-Masih ka linemu kanu ligid'u lanaw nu Galili. Entu pan ka tinemakedeg kanu palaw ka nagagayan lu. 30 Na pibpawangan sekanin nu madakel a taw a namananggit silan sa di pamakalakaw, di pamakailay, manga sadil, di pamakadtalu enggu madakel pan a ped ka inibetad'ilan kanu kasangulan nin. Na pinagkapia langun nu Isa al-Masih su entu. 31 Na guna mailay nu madakel a taw i nakadtalu su di pamakadtalu, naulian su manga sadil, nakalakaw su di pamakalakaw enggu nakailay su di pamakailay na nagaip silan taman sa napugi nilan su Kadenan nu manga taw a Israil.f
32 Na pinasupeg'u Isa al-Masih su 'bpamangunut lun ka pidtalu nin kanilan i “'Gkalat i nanam ku kanu manga taw a nia, ka nakatelu gay den saguna na kaped ku bu silan taman sa da den 'gkakan nilan. Na di aku miug sa paulin ku silan a 'gkangagutem ka basi lipedengan silan sia sa lalan.” 33 Na nia nadtalu nu 'bpamangunut lun na “Endaw tanu makakua sa makapakan kanu madakel a nia a taw sia sa tawan-tawan a nia a dalepa?” 34 Na nia pidtalu nu Isa al-Masih kanilan na “Ngin i kadakel a makan san?” Nia nilan nakasumpat na “Pitu timan a pan enggu pila timan bu a seda.” 35 Na pinapagagayan nu Isa al-Masih su madakel a taw, 36 entu pan ka kinua nin su pitu timan a pan enggu su seda ka inidsukul-sukul'in kanu Kadenan. Entu pan ka pidtebi-tebi nin ka inenggay nin kanu 'bpamangunut lun ka enggu nilan makatalagad kanu madakel a taw. 37 Na su langun nu manga taw a entu na namakakan taman sa nangausug silan enggu aden pan nangasama nilan a pegken a nia nin nalimudan na pitu kabukag. 38 Na pat ngibu i kadakel'u manga mama a namakakan, liu su manga babay enggu su manga wata. 39 Na guna makapauli nu Isa al-Masih su madakel a taw na nageda sekanin kanu awang ka linemu kanu embala-bala a dalepa sa Magadan.g