Su Kinaenda nu Isa al-Masih kanu Adat-betad a Nakabpusaka kanu manga Taw
7
Na aden manga taw a lusud kanu lumpukan a Parisiyu enggu manga gulu nu pangitaban a ebpun sa Awrusalim i mindidilimudan lu kanu Isa al-Masih. 2 Na nadsusuliman nilan i 'bpamegkan sa pan su ped kanu 'bpamangunut kanu Isa al-Masih a dala pamuanaw sa lima, nia nin maena na dala nilan masuti su lima nilan. 3 (Kagina sia kanu manga taw a lusud kanu lumpukan a Parisiyu taman den kanu langun nu manga Yahudi na di silan matag keman nia tabia na makanggulalan nilan su adat-betad'u manga kaapuan nilan a kapedsuti sa lima. 4 Na maitu bun ba amaika pakabpun silan sa padian na di bun silan matag keman nia tabia na masuti nilan pan su ginawa nilan sia kanu adat-betad'ilan. Na madakel pan a manga adat-betad a nakabpusaka kanilan i ipenggulalan nilan a mana su kapedsuti sa manga sakedu, pitsar enggu kendi taman den kanu manga ayanan sa ukit a kapenggagas lun.)5 Daka inidsan nu manga taw a lusud kanu lumpukan a Parisiyu enggu su manga gulu nu pangitaban su Isa al-Masih sa “Nginan ka dili ipenggulalan nu 'bpamangunut sa leka su adat-betad'u manga kaapuan tanu? Ka pegkan silan a dala nilan masuti su lima nilan sa ukit a kapenggagas lun.” 6 Na nia inisumpat'u Isa al-Masih kanilan na “Benal man su naalung'u Nabi Isayas pantag sa lekanu a dikena senep sa atay i kabpagagama nin a
‘Su kabpagadat'u manga taw a nia sa laki na pinalay bu sa ngali
ka nia nin kabantang na mawatan i atay nilan sa laki.
7 Su kapedsimba nilan sa laki na dala katagan nin.
Su panduan nu manusia na ibpamandu nilan sa nia nilan pedtalun na ebpun sa laki.’a
8 Na tinagak'u man su kasuguan nu Kadenan ka nia nu inunutan na su panduan nu manusia.”
9 Na nia nin pan pidtalu kanilan na “Mapia a benal i ukit'u sa kakias'u kanu kasuguan nu Kadenan asal'a kaunutan nu bu su adat-betad'u a nakabpusaka sa lekanu! 10 Nia nin upaman na pidtalu nu Musa i ‘Pagadati nu su ama nu enggu su ina nu’b enggu ‘Apia entain i edtalu-talu sa mawag kanu ama nin atawa ka kanu ina nin na dait a imatayan.’c 11 Ugaid'a nia nu menem ibpamandu na mapakay a edtalun nu taw kanu ama nin enggu kanu ina nin i ‘Da den makadtabang ku sa lekanu ka su langun na ipedtabang ku sa lekanu na inenggay ku den a kurban’ (nia nin maena na inenggay a umun kanu Kadenan). 12 Na amaika maitu i ibpamandu nu na dikena nu den pedsugutan sa makadtabang su wata kanu ama nin enggu ina nin. 13 Na sabap kanu manga adat-betad'u a nia a nakabpusaka sa lekanu na 'gkaawan nu sa kapantag su kadtalu nu Kadenan. Na madakel pan i penggulan nu a manga maya ba.”
14 Na pinasupeg menem'u Isa al-Masih su madakel a taw ka pidtalu nin i “Pamakikineg kanu langun enggu tuntayi nu su pedtalun ku. 15 Dikena nia pakagkaledsik kanu atay nu taw su ngin i 'bpeludep kanu ngali nin ka nia man pakagkaledsik kanu atay nu taw na su ngin i 'bpeliu kanu ngali nin. 16 Na u entain i aden tangila nin a pakakineg saguna na pakikineg kanu sa mapia.”
17 Na guna su ginanatan nu Isa al-Masih su madakel a taw ka linemudep sekanin lu kanu walay na inidsan sekanin nu 'bpamangunut lun makapantag kanu pakenalan a entu. 18 Na nia nin nadtalu kanilan na “Apia sekanu na di nu bun 'gkatuntayan su entu? Di nu 'gkaimamanan i apia ngin i makaludep kanu ngali nu taw na di makagkaledsik kanu atay nin? 19 Kagina su pegken nin na dikena sia pakabpawang kanu atay nin ka sia kanu tian nin taman sa 'bpeliu bun su entu.” (Na kanu kinadtalu nu Isa al-Masih kanu nia na mana nin bun hinalal su langun nu pegken.) 20 Na nia nin pan pidtalu na “Nia man makagkaledsik kanu taw na u ngin i 'bpeliu ebpun kanu atay nin 21 kagina su manga mawag a itungan na sia pakaganat kanu pamusungan nu taw a mana su kapedsina, kapanegkaw, kapangimatay, 22 kagkiuga, kadengki, kadaluaka kanu ped a taw, kasalimbut, kanguda na ginawa, kasekel, kapanila-tila enggu kapulu na muletad taman den kanu manga kabunegan a galebek. 23 Na su langun nu nia ba na sia pakaganat kanu atay nu taw. Na nia ba i pakagkaledsik kanu atay nu taw.”
Su Salig'u Babay a Dikena-Yahudi
24 Daka ginemanat lu su Isa al-Masih ka linemu kanu embala-bala kanu dalepa a Tair. Na guna sekanin makauma lu na lu sekanin tinemumpa kanu isa a walay. Na di nin pegkiugan a katawan nu apia entain i lu sekanin ugaid'a di a benal magaga i di katawan na taw i lu sekanin. 25 Na aden lu babay a inasukan na saitan i wata nin a babay. Na endaw demun i kinakineg'in sa lu su Isa al-Masih na linemu sekanin ka sinemugiud kanu ay nu Isa al-Masih. 26 Na su babay a entu na dikena-Yahudi. Nia nin tupu na Pinisia lu kanu dalepa a Syria. Na pidsamikalan nin mangeni kanu Isa al-Masih i bugawan nin pan sa saitan su wata nin a babay. 27 Na nia pidtalu nu Isa al-Masih sa lekanin sa ukit a pakenalan na “Dait a pakausugan muna su manga wata kagina dikena mapia a kuan su pegken nilan asal'a inggay kanu manga ayam a asu.”d 28 Ugaid'a nia inisumpat'u babay na “Uway mambu Mapulu, ugaid'a apia man su manga ayam a asu sia sa aung'u lamisan na 'bpanimet bun kanu 'gkangaulug a pegken nu manga wata.” 29 Daka nia pidtalu nu Isa al-Masih kanu babay na “Sabap kanu pidtalu nengka a nan na uli ka den ka inawan den nu saitan su wata nengka.” 30 Na guna su minuli su babay na nauman nin su wata nin a 'bpagiga lu kanu katri a inawan den nu saitan.
Su Kinapagkapia nu Isa al-Masih kanu Mama a Bisu enggu Puntel
31 Na kanu kinambalingan nu Isa al-Masih ganat sa dalepa a Tair na lu sekanin minukit sa dalepa a Sidun semangul sa lanaw nu Galili enggu kanu manga dalepa sa Dikapulis. 32 Na aden pinananggit'u manga taw kanu Isa al-Masih a mama a bisu enggu puntel ka pinangeni nilan sa lekanin i dapenetan nin pan kanu lima nin. 33 Daka inisibay nu Isa al-Masih kanu madakel a taw su mama a entu. Entu pan ka iniludep'in su dua timan a kemel'u lima nin lu kanu dua embala a tangila nu mama entu pan ka tinemubpa ka inibetad'in su entu lu kanu dila nu mama. 34 Na tinemingada sekanin kanu langit a gineminawa sa masela ka pidtalu nin i “Ipata” a nia nin maena na “Embuka ka.” 35 Na entu demun ba na nakakineg su mama enggu naawa su kapuntel'in taman sa mapia den i kapedtalu nin. 36 Na inisugu nu Isa al-Masih kanilan i dala edtaluan nilan kanu entu ugaid'a makin nilan mambu pidtalu-talu. 37 Na dala idsan nin i kinagaip'u manga taw a nakakineg kanu entu taman sa nia nilan nadtalu na “Sangat i kapia nin i kinanggula nin kanu langun. Apia su bisu na nagaga nin sa nakakineg enggu nakapadtalu nin su maw.”