Su Kinapatay nu Yahiya a Nanalawat
14
Na kanu entu ba a timpu na nakauma sa pakinegan nu Datu Hirud su makapantag kanu Isa al-Masih. 2 Daka nia nin pidtalu kanu 'gkangasaligan nin na “Su entu a mama na sekanin su Yahiya a Nanalawat, mimbibiag 'bpaluman tembu ba pakanggalebek sekanin sa manga kabarakatan.” 3 Kagina si Hirud man i napasigkem enggu napapawik kanu Yahiya ka inipabilanggu nin sabap kani Hirudias a danden a kaluma nu suled'in a mama a si Pilipus. 4 Kagina tatap sekanin pedtaluan nu Yahiya sa “Dikena wagib a pinangaluma nengka su kaluma nu suled'engka.” 5 Na pegkiugan sekanin 'bpagimatay nu Hirud ugaid'a di nin 'gkanggula ka 'gkagilekan sekanin kanu madakel a taw sabap sa 'bpalitialan nilan i saben-sabenal a nabi su Yahiya. 6 Daka kanu gay nu kapedsela-sela kanu kinambata kanu Hirud na midsagayan kanu kasangulan nilan su laga a wata ni Hirudias, na sangat a nasuatan nu Hirud su entu 7 taman sa inidsapa nin i inggay nin kanu laga su apia ngin a kalinian nin. 8 Na guna makambitiala nu laga su ina nin, na nia pidtalu nu laga kanu Datu Hirud na “Inggay nengka sa laki su ulu nu Yahiya a 'Bpanalawat, sia nengka ibetad sa lampay.” 9 Na malegen sa ginawa nu Datu Hirud su entu ugaid'a sabap sa nakadsapa nin sia kanu adapan nu manga ana nin na inisugu nin i inggay kanu laga su entu. 10 Daka pinaputukan nin sa ulu su Yahiya lu sa bilangguan. 11 Na inibetad kanu lampay su ulu nu Yahiya ka init lu kanu laga entu pan ka inenggay nin kanu ina nin. 12 Daka linemu kanu bilangguan su 'bpamangunut kanu Yahiya ka kinua nilan su bangkay nin ka inilebeng'ilan. Entu pan ka linemu silan kanu Isa al-Masih ka pinanudtul'ilan su entu sa lekanin.Su Kinapakan kanu Madakel a Taw
13 Na guna makineg'u Isa al-Masih su entu na nageda sekanin sa awang ka linemu sekanin kanu nakadtawan-tawan a dalepa. Na nakineg'u madakel a taw ebpun sa embala-bala a inged su entu daka tinundug'ilan sekanin a linemalag bu silan. 14 Na endaw i kinatepad'u Isa al-Masih na nailay nin su madakel a benal a taw taman sa nalat i ginawa nin kanilan. Daka pinagkapia nin su 'bpamedsakit kanilan. 15 Na guna su pedsukilep den na sinupegan sekanin nu 'bpamangunut lun ka pidtalu nilan sa lekanin i “Pedsukilep den na nakadtawan-tawan i nia a dalepa. Paganat ka den i manga taw a nia asal'a makalu silan kanu manga inged ka enggu silan makapamasa sa makan nilan.” 16 Ugaid'a nia pidtalu nu Isa al-Masih kanilan na “Di den nasisita a lemu pan silan, ka sekanu i enggay kanilan sa makan.” 17 Na nia nilan nakasumpat sa lekanin na “Da pegken tanu sia, nia tabia na lima timan bu a nia a pan enggu dua timan a seda.” 18 Daka nia nin pidtalu kanilan na “It'u sia sa laki i namba.” 19 Na inisugu nin i mayan kanu damautan su madakel a taw. Na guna nin makua su lima timan a pan enggu dua timan a seda na tinemingada sekanin kanu langit ka midsukul-sukul enggu pinugi nin su Kadenan. Entu pan ka pidtebi-tebi nin ka inipatalagad'in kanu 'bpamangunut lun lu kanu madakel a taw. 20 Na nakakan su langun nu taw taman sa nangausug silan. Na aden pan nangasama nu manga taw keman a nia kadakel a nalimudan lun na sapulu enggu dua kabukag. 21 Na su namakakan bu a manga mama na manga lima ngibu den i kadakel'in liu pan i manga babay enggu manga wata.
Su Kinalakaw nu Isa al-Masih kanu Liwawaw nu Ig
22 Na pinapageda mamagayas'u Isa al-Masih su 'bpamangunut lun lu kanu awang ka pinauna nin silan lemipag kanu lanaw. Saleta mambu na pinauli nin den su madakel a taw. 23 Na guna su nakapaganat'in den su madakel a taw na tinemakedeg sekanin kanu palaw ka nangeni-ngeni taman sa nauma sekanin na edsukilep lu a isa nin bu. 24 Saleta na su awang a pinagedan nu 'bpamangunut lun na nakakalud den sa mawatan. Na 'gkasugat silan na mabagel a bagel ka 'gkasulang'ilan su sambel. 25 Na guna su mangagan den mapita na tinundug silan nu Isa al-Masih a linemakaw bu lu kanu liwawaw nu lanaw. 26 Daka guna sekanin mailay nu 'bpamangunut lun na sangat a nangagilekan silan taman sa nakalalis'ilan i “Manginggilek!” 27 Na midtalu mamagayas su Isa al-Masih sa “Da kanu 'gkagilek, ka saki bun i nia. Pagkabagel'u i manggiginawa nu.” 28 Na nia nakasumpat'i Pitru na “Mapulu, u benal a seka i nan na pasan aku a lemakaw kanu liwawaw nu ig.” 29 Nia pidtalu nu Isa al-Masih na “Sia ka den.” Daka linemutad kanu ig si Pitru ka linemakaw kanu liwawaw nu ig 'bpawang kanu Isa al-Masih. 30 Na guna kasipati ni Pitru su mabagel a sambel na nagilekan, daka pakageled sekanin, na nakalalis'in edtalu i “Mapulu, ilipuas aku nengka!” 31 Na pinamagayasan sekanin kemawa nu Isa al-Masih ka pidtalu nin sa lekanin i “Ngin den a kalubay na salig i leka. Ngintu ka mindua-dua ka?”
32 Na endaw i kinapageda nilan kanu awang na napenek su sambel. 33 Daka su 'bpamangunut lun a lu kanu awang na sinugiudan nilan sekanin sa nia nilan nadtalu na “Saben-sabenal a seka su Tunggal'u Kadenan.”
Su Kinapagkapia nu Isa al-Masih kanu 'Bpamedsakit
34 Na guna silan lipag kanu lanaw nu Galili na lu silan dinemunggu kanu dalepa a Ginisarit. 35 Na endaw i kinakilala sa lekanin nu manga taw lu na inipatawag'ilan lu kanu embala-bala a dalepa su aden sakit'in ka inipait'ilan langun lu kanu Isa al-Masih, 36 ka inipamagayuk'ilan bu sa lekanin i ipaami nin pan kanilan su bibil'u lambung'in. Na su langun nu namakaami na migkapia.