Su Kinauma nu Isa al-Masih sa Awrusalim
11
Na guna su pakasupeg den silan sa Awrusalim na nakauma silan masupeg lu kanu dalepa a Bitpaig enggu Bitani lu kanu Palaw nu Ulibus.a Na sinemugu su Isa al-Masih sa dua kataw kanu 'bpamangunut lun 2 sa nia nin pidtalu kanu dua kataw a entu na “Lu kanu kanu dalepa a nan sa 'gkasangulan nu ka endaw i kaludep'u lu ba na mailay nu i manguda a kimar a iniketan a dala pamun kagkudai. Na bekali nu ka tundan nu sia. 3 Na amaika aden midsa sa lekanu sa ‘Nginan ka penggulan nu i nan?’ na nia nu isumpat na ‘Nasisita nu Mapulu su nia, ipambalingan nin bun sia mangagan.’ ”4 Daka ginemanat den su dua kataw a sinugu nu Isa al-Masih. Na natun nilan mambu su manguda a entu a kimar a lu iniketan kanu sumangan nu dalepa lu tampal kanu lalan. Na binekalan nilan. 5 Na su ped kanu manga taw a pedtindeg lu na minidsa kanilan sa “Ngin i penggulan nu a nan ka pembekalan nu i manguda a nan a kimar?” 6 Daka pidtalu nilan kanilan su ngin i pidtalu nu Isa al-Masih na sinugutan mambu silan nu manga taw sa makaganat. 7 Na tinundan nilan den mambu su manguda a entu a kimar lu kanu Isa al-Masih. Na inampisan nilan kanu manga lambung'ilan entu pan ka pigkudan nu Isa al-Masih. 8 Na madakel kanu taw i minelat sa manga lambung'ilan lu kanu lalan enggu su ped menem na nia nilan inibetad kanu lalan na manga laun na kayub a lu nilan bun ba pinangua kanu ligid'u lalan. 9 Na su 'gkangauna enggu su manga pedtundug kanu Isa al-Masih na ibpamelalis'ilan i
“Pugin su Kadenan!c Palihalan su pakauma a sinugu nu Kadenan!
10 Palihalan su pakauma a kandatu nu tupu nu kaapuan tanu a su Daud!
Pugin su Kadenan a lu sa sulega!”d
11 Na guna su nakauma den su Isa al-Masih sa Awrusalim na linemudep sekanin lu kanu Suti a 'Bpagagaman. Na guna nin den mapangingilay su langun nu lu ba na mimbalingan su Isa al-Masih lu sa Bitani a kaped'in su sapulu enggu dua a pinamili nin kagina pedsukilep den.
Su Kinasinta nu Isa al-Masih kanu Kayu a Igus
12 Na kanu temundug a gay kanu kinaganat'ilan sa Bitani embalingan sa Awrusalim na 'gkagutem su Isa al-Masih. 13 Na aden nasandeng'in a launen a kayu a iguse na linemu sekanin ka inilay nin u aden matun nin a unga. Ugaid'a guna su linemu sekanin na dala natun nin ka laun bu sabap sa dikena timpu na igus. 14 Na nia nin pidtalu kanu kayu a igus na “Iganat saguna na di ka den munga taman sa taman.” Na nakineg'u 'bpamangunut lun su entu.
Su Kinapamugaw nu Isa al-Masih kanu manga Padagang lu kanu Suti a 'Bpagagaman
15 Na guna silan makauma sa Awrusalim na namagayas sekanin lemudep lu kanu lama-lama nu Suti a 'Bpagagaman ka pinamugaw nin su manga padagangf enggu su manga 'bpamamasa lu. Na pinamangkulat'in bun su manga lamisan nu 'bpamanambi sa kuleta enggu su manga ayanan nu manga pendagang sa manga malapati. 16 Na apia entain na da nin den suguti sa makaukit'ilan pan su manga dagangan nilan lu kanu lama-lama nu Suti a 'Bpagagaman. 17 Na namandu sekanin kanilan sa nia nin pidtalu na “Dikena ba nia nakadalem kanu kitab na ‘Su walay ku na bedtuan sa walay a kapangeni-ngenian nu langun nu bangsa’g? Ugaid'a inumbal'u a salag'u manga tanegkawn.”h 18 Na guna makineg'u manga mapulu nu 'bpamangurban enggu su manga gulu nu pangitaban su pantag kanu entu na 'bpapangilayn nilan i ukit a kaimatay nilan kanu Isa al-Masih kagina 'gkagilekan silan sa lekanin ka sangat a 'gkagaipan nu madakel a taw su panduan nin. 19 Na guna su pedsukilep den na ginanatan menem'u Isa al-Masih apeg'u 'bpamangunut lun su siudad a entu.
Su Kasalig sa Kadenan sa dala Kandua-dua nin
20 Na kanu kapembalingan nilan sa Awrusalim kanu temundug a gay na nailay nilan su kayu a igus a nagangu den taman kanu dalid'in. 21 Na nagkalendem'i Pitru su pidtalu nu Isa al-Masih kanu kayu a entu, na daka pidtalu nin kanu Isa al-Masih i “Gulu, ilay ka! Su kayu a igus a inidsinta nengka na nalanes.”
22 Na nia pidtalu nu Isa al-Masih kanilan na “Salig kanu kanu Kadenan. 23 Na saben-sabenal a pedtalun ku sa lekanu i apia entain i edtalun nin kanu palaw a nia i ‘Sapuat ka su ginawa nengka ka idtug'engka lu kanu lagat’ sa dala kandua-dua nu atay nu taw a entu ugaid'a nia pan mula na palitialan nin i tumanen nu Kadenan su entu na matuman man. 24 Kagina ka maitu na pedtalun ku sa lekanu i langun na ipangeni-ngeni nu na salig kanu sa matalima nu den su entu ka saben-sabenal a matuman man. 25 Na uman kanu mangeni-ngeni na amaika aden nakasakit sa ginawa nu na ampun nu muna ka enggu ampunen bun nu Ama nu a lu sa sulega su manga dusa nu. 26 Ugaid'a amaika di kanu mampun na di kanu bun ampunen nu Ama nu a lu sa sulega.”i
Su Kinabatalu kanu Kawagib'u Isa al-Masih
27 Na mimbalingan menem silan sa Awrusalim. Na kanu kapendadalakaw nu Isa al-Masih lu kanu lama-lama nu Suti a 'Bpagagaman na sinupegan sekanin nu manga mapulu nu 'bpamangurban enggu su manga gulu nu pangitaban taman den kanu 'gkangaunutan nu manga Yahudi. 28 Na nia nilan inidsa sa lekanin na “Ngin i kawagib'engka sa kapenggula nengka sa langun nu nia? Entain i minenggay sa leka sa kawagib sa kapenggula nengka sa langun nu nia?” 29 Ugaid'a nia inisumpat'u Isa al-Masih kanilan na “Satiman mambu i idsa ku sa lekanu. Na sawal'u, entu pan ka edtalun ku sa lekanu u endaw nakabpun su kawagib ku sa kapenggula ku kanu langun nu nia. 30 Na edtalu nu sa laki, ngintu, su kinapanalawat'u Yahiya na ebpun sa Kadenan atawa ka kanu manusia bu?” 31 Na mimbibitialai silan sa nia pidtalu nu uman i isa na “Amaika nia tanu edtalun i ebpun sa Kadenan na idsa nin sa lekitanu u ngintu ka da tanu palitiayi su Yahiya. 32 Ugaid'a di tanu bun madtalu i ebpun bu sa manusia.”
Na 'gkagilekan silan kanu manga taw sabap sa 'bpalitialan nilan i saben-sabenal a nabi su Yahiya. 33 Daka nia nilan bu nakasumpat kanu Isa al-Masih na “Di nami katawan.” Na nia mambu pidtalu nu Isa al-Masih kanilan na “Amaika maitu na di ku bun edtalun sa lekanu u endaw nakabpun su kawagib ku sa kapenggula ku sa langun nu nia.”