Su Isa al-Masih enggu su 'Bpamanginseda
5
Isa a gay a 'bpangusiat su Isa al-Masih lu kanu ligid'u lanaw nu Ginisarit na pedsaseka bu su madakel a taw ka enggu silan pakakineg kanu kadtalu nu Kadenan. 2 Na aden nailay nu Isa al-Masih a dua timan a awang sia kanu ligid'u lanaw ka iniligid'u manga 'bpamanginseda ka penggagasan nilan su manga ambit'ilan. 3 Na nageda sekanin kanu satiman a awang a nia lun kigkuan na si Simiun. Na inipakalud'in sa paidu ka lu ba sekanin nagagayan entu pan ka nangusiat kanu madakel a taw.4 Na guna den sekanin makapasad mangusiat na pidtalu nin kani Simiun i “Kalud ka, ka iulug'u su manga ambit'u ka enggu kanu makakua sa manga seda.” 5 Na nia inisumpat'i Simiun na “Mapulu, nalalamagan na nangambit kami bu na da nakua nami. Ugaid'a kagina ka pidtalu nengka i entu na iulug'ami menem su manga ambit'ami.”
6 Na guna su naulug den su manga ambit'ilan na madakel gaid a seda i nangakua nin ka 'gkakisi den su manga ambit'ilan sa kadakel'u seda. 7 Daka kinayap'ilan su manga kaped'ilan a 'bpamanginseda kanu ped a awang ka enggu silan makatabang kanilan. Na linemulud mambu silan ka binatun nilan su manga ambit'ilan taman sa napenu mambu na seda su dua timan a awang'ilan sa sama bu di pakageled su entu. 8 Na guna mailay ni Simiun Pitru su entu na nakasugiud sekanin sia kanu adapan nu Isa al-Masih sa nia nin nadtalu na “Hu Mapulu, ganati aku den ka baladusa aku a taw.” 9 Nadtalu nin i entu sabap sa sangat a nagaip sekanin enggu su manga kaped'in kanu madakel a entu a seda a nangakua nilan. 10 Maitu bun su manga tagapeda ni Simiun a si Yakub enggu si Yuhan a manga wata ni Zabidi na sangat bun a nangagaip silan. Saleta na nia pidtalu nu Isa al-Masih kani Simiun na “Da ka 'gkagilek, ka iganat saguna na nia ka den pangua na su manga taw a namakasibay.” 11 Na guna den makadunggu su manga awang'ilan kanu dedsan na tinagak'ilan su langun-taman nilan ka minunut silan kanu Isa al-Masih.
Su Kinapagkapia nu Isa al-Masih kanu Mama a Pedsakit sa Debpig
12 Na kanu timpu a lu su Isa al-Masih kanu isa a siudad na aden lu mama a pedsakit sa debpig. Na guna nin mailay su Isa al-Masih na sinemugiud sekanin kanu adapan nin ka pinagayukan nin sa nia nin pidtalu na “Hu Mapulu, amaika miug ka na makapagkapia aku nengka.”a 13 Na inami nu Isa al-Masih su mama sa nia nin lun pidtalu na “Pegkiug aku, 'gkapia ka den saguna.” Na midsambuta demun su kinagkapia nin. 14 Na inibpaliugat'in kanu mama a entu i di nin edtalun kanu apia entain su entu enggu pidtaluan nin sa “Ganat ka den, ka pailay ka kanu 'bpamangurban enggu 'gkurban ka a mana bun su inisugu nu Nabi Musa asal'a mailay nu manga taw i nasuti ka den.”
15 Pidsan ka maitu na pakalapat bun su tudtulan pantag kanu Isa al-Masih tembu madakel a benal a manga taw i pendidilimudan lu sa lekanin ka 'bpakikinegen nilan su manga usiatan nin enggu asal'a makapagkapia nin su manga sakit'ilan. 16 Ugaid'a nia katatapan na lu sekanin kanu nakadtawan-tawan a dalepa ka 'bpangeni-ngeni.
Su Mama a Di Pakanggagalebek i Lawas'in
17 Na aden isa a gay a 'bpangusiat su Isa al-Masih. Na aden lu 'bpamagagayan a lusud kanu lumpukan a Parisiyu enggu manga gulu nu pangitaban a lu nakabpun sa Galili, sa Yudia enggu sa Awrusalim. Na su kabarakat'u Kadenan na linemangkap den sa lekanin sa makapagkapia nin su aden sakit'in. 18 Daka aden manga taw lu a 'bpananggiten nilan kanu Isa al-Masih su mama a pinaiga bu kanu 'bpagigan nin ka di nin den pakanggagalebek su lawas'in. Na pegkiugan nilan 'bpananggit lu kanu adapan nu Isa al-Masih lu kanu ludep'u walay 19 ugaid'a di silan pakaludep sabap sa madakel a taw. Guna su maitu na linekat'ilan su atep'u walayb ka lu nilan ba initudtun su mama a entu lu kanu adapan nu Isa al-Masih. 20 Na guna mailay nu Isa al-Masih su salig'ilan na nia nin pidtalu kanu mama a di nin den pakanggagalebek su lawas'in na “Pakat, su kabaladusan nengka na inampun den.”
21 Na nia nakaidsa na ginawa nu manga taw a lusud kanu lumpukan a Parisiyu enggu su manga gulu nu pangitaban na “Ngin i kataw nu mama a nia kanu ginawa nin? Sakutu i nan kanu Kadenan! Entain besen i makapangampun sa kabaladusan u dikena su Kadenan bu?” 22 Ugaid'a 'gkatawan bun nu Isa al-Masih su 'gkapagitung nilan. Daka nia nin pidtalu kanilan na “Nginan ka man i pakaidsa nu kanu ginawa nu? 23 Ngin besen i malemu a edtalun ku, ‘Su kabaladusan nengka na inampun den’? Udi na ‘Embangun ka, ka lakaw ka’? 24 Ugaid'a ipaamad ku sa lekanu i su Kaka nu Manusiac na aden kawagib'in sia sa dunia sa kapangampun nin sa kabaladusan.” Daka nia nin pidtalu kanu mama a di nin pakanggagalebek i lawas'in na “Pedsugun ku seka sa embangun ka, kua ka i ikam'engka a nan ka uli ka den.” 25 Na kanu entu demun ba na mimbangun su mama sia demun kanu adapan nu manga taw enggu kinua nin su igan nin ka minuli a pebpugi kanu Kadenan. 26 Daka sangat a nangagaip enggu nangagilekan su madakel a taw taman sa napugi nilan su Kadenan. Na nia nilan nadtalu na “Sangat a pakagaip-gaip su nailay tanu a nia.”
Su Kinabaluy kanu Libi a Makadtatanggunut kanu Isa al-Masih
27 Na ulian nu entu na linemiu su Isa al-Masih na nailay nin su 'bpangubela sa buwis a bedtuan sa Libid a 'bpagagayan lu kanu 'bpangubelan nin sa buwis. Na nia nin lun pidtalu na “Unut ka sa laki.” 28 Daka midtindeg mambu sekanin ka tinagak'in su langun-taman nin ka minunut kanu Isa al-Masih.
29 Na inidsela-sela ni Libi su Isa al-Masih lu kanu walay nin. Na madakel a 'bpangubela sa buwis apeg den nu ped pan a manga taw i kaped'ilan kineman lu. 30 Guna su maitu na mimbuku kanu 'bpamangunut kanu Isa al-Masih su manga taw a lusud kanu lumpukan a Parisiyu enggu su manga gulu nu pangitaban sa nia nilan pidtalu na “Ngintu ka ibpamagatuang'u su 'bpamangubela sa buwis enggu su manga taw a dikena balaagama?”
31 Na nia inisumpat'u Isa al-Masih sa kanilan na “Dikena man nia pakanasisita sa taligamut su manga taw a dala sakit'in ka su manga taw a aden sakit'in. 32 Na dikena nia ku kinasia i nia ku pedtawagen na su manga ikelas a taw ka su manga taw a baladusa ka enggu silan makadtaubat.”
Su Kinadtalu nu Isa al-Masih pantag kanu Bagu a Ukit sa Kapaginugut kanu Kadenan
33 Na nia nilan pidtalu kanu Isa al-Masih na “Su 'bpamangunut kanu Yahiya na mategel silan 'bpuasa enggu mangeni-ngeni, na maitu bun su 'bpamangunut kanu lumpukan a Parisiyu. Ugaid'a su 'bpamangunut sa leka na 'bpamegkan enggu 'bpamanginem pan silan.” 34 Nia pidtalu nu Isa al-Masih kanilan na “Ngintu, wagib a 'bpuasa su manga ana nu pegkawingen amaika kaped'ilan pamun su mama a pegkawingen? 35 Ugaid'a mauma su kutika a kuan den su mama a pegkawingen na entu ba su kutika a kabpuasa nilan.”
36 Na pidtalu nin pan kanilan su nia a pakenalan sa “Da taw a kemisi sa bagu a balegkas ka itapi nin kanu labing a balegkas ka kanugun nin su bagu a balegkas enggu di bun i entu makadait kanu labing a balegkas. 37 Da bun taw a demiken kanu bagu a ig'a ubas kanu labing a taguan a upis'a binatang kagina makapambetu nu bagu a ig'a ubas su labing a taguan a upis'a binatange na amaika maitu na maudud su ig'a ubas enggu 'gkalat su taguan a upis'a binatang. 38 Ugaid'a nia man dait na su bagu a ig'a ubas na sia ipembetad kanu bagu a taguan a upis'a binatang. 39 Dala bun malilini sa bagu a ig'a ubas amaika makainem den silan kanu danden a ig'a ubas ka nia nilan bun edtalun na ‘Nia mapia su danden.’ ”