Su Kinasasat'u Datu na Giadsal kanu Isa al-Masih
4
Daka pinananggit'u Ruh nu Kadenan su Isa al-Masih kanu tawan-tawan a dalepa ka enggu masasat'u Datu na Giadsal.a 2 Na mibpuasa su Isa al-Masih lu sa dalem'a nakapatpulu gay enggu nakapatpulu kamagabi, na nagutem a benal sekanin kanu kinaipus'u entu. 3 Daka sinemupeg sa lekanin su 'Bpanasat sa nia nin lun pidtalu na “Amaika seka su Tunggal'u Kadenan, na edtalu ka sa manga watu a nan i embaluy silan a pan.” 4 Ugaid'a nia inisumpat'u Isa al-Masih na “Nia man nakadalem kanu kitab na ‘Dikena bu man sia mauyag i taw kanu kakan nin sa pegken ka sia man kanu uman i kadtalu a ebpun kanu Kadenan.’b” 5 Daka pinananggit'u Datu na Giadsal su Isa al-Masih lu kanu puntiuk'u Suti a 'Bpagagaman lu sa Awrusalim 6 ka nia nin lun pidtalu na “Amaika seka su Tunggal'u Kadenan na tibpu ka kun na! Kagina nia man nakasulat kanu kitab na ‘Sugun nu Kadenan su manga malaikat'in sa katiakap'ilan sa leka taman sa sapipin ka nilan ka enggu di kagkaidan su manga ay nengka lu kanu manga watu.’c” 7 Nia menem pidtalu nu Isa al-Masih na “Nia pan nakasulat kanu kitab na ‘Di ka man pembatalua su Kadenan a Mapulu.’d” 8 Na pinananggit menem sekanin nu Datu na Giadsal lu kanu malambeg a benal a palaw ka inipailay nin lun su langun nu pendatuan sia sa liwawaw na dunia enggu su bagel enggu kakawasan nu langun nu entu a pendatuan. 9 Na nia nin pidtalu kanu Isa al-Masih na “Langun nu nia ba na inggay ku sa leka amaika semugiud ka sa laki ka simban aku nengka.” 10 Daka nia inisumpat'u Isa al-Masih sa lekanin na “Saitan! Awa ka sia. Kagina nia man nakadalem kanu kitab na ‘Simba ka su Kadenan a Mapulu sa sekanin bu i paginugutan nengka.’e” 11 Guna su maitu na tinagak sekanin nu Saitan, saleta mambu na nakauma su manga malaikat ka tiniakapan nilan sekanin.Su Kinaludsu Mangusiat'u Isa al-Masih
12-13 Na guna makineg'u Isa al-Masih i nabilanggu su Yahiya na minuli sekanin sa Nasarit a sakup'u Galili. Ugaid'a tinemalus sekanin kanu dalepa a Kapurnaum ka lu den ba sekanin migkakaleben. Na su Kapurnaum na masiken kanu ligid'u lanaw nu Galili a sakup'u kalupan na Sibulun enggu Naptali. 14 Na kanu nia a nanggula na natuman su inisulat'u Nabi Isayas sia kanu kitab a
15 “Su kalupan na Sibulun enggu su kalupan na Naptali
a su lalan a 'bpawang sa lanaw, su dalepa lu kanu lipag'u lawas'a ig'u Jordan,
su Galili a pendalepan nu manga dikena-Yahudi,
16 na su manga taw lu a sia 'bpaguyag-uyag kanu malibuteng na nakailay silan sa maliwanag a sangat i katayaw nin.f
Na sinemebang den su maliwanag kanu inged a sia 'bpaguyag-uyag su taw nin kanu malibutengg a 'bpagalung-alung su kapatay.”h
17 Iganat kanu entu a kutika na minebpun mangusiat su Isa al-Masih sa “Edtataubat kanu! Ka masupeg den a benal su kandatu nu Kadenan.”
Su Kinapaunut'u Isa al-Masih kanu Pat Kataw a Pabibiala
18 Na gagalu nu kabpelalakaw nu Isa al-Masih lu kanu ligid'u lanaw nu Galili na nailay nin su edsuled a si Simiun a bedtuan bun sa Pitru enggu si Anduk a 'bpamiala ka entu ba i pantialian nilan na kapamiala sa seda. 19 Nia nin pidtalu kanilan na “Sia kanu ka unut kanu sa laki ka baluyn ku sekanu a mamiala sa taw a mana bun su kabpamiala nu sa seda.” 20 Na kanu entu demun ba na tinagak'ilan su manga biala nilan ka minunut silan kanu Isa al-Masih. 21 Na kanu kapedtalus'u Isa al-Masih 'bpelakaw na nailay nin menem su edsuled a si Yakub enggu si Yuhan. Lu silan kanu awang a kaped'ilan su ama nilan a si Zabidi ka pengguguden nilan su manga biala nilan. Na inenggat silan nu Isa al-Masih sa kaunut'ilan sa lekanin. 22 Na kanu entu demun ba na tinagak'ilan su awang'ilan enggu su ama nilan ka minunut silan kanu Isa al-Masih.
Su Kinapamandu enggu su Kinapagkapia nu Isa al-Masih kanu aden manga Sakit'in
23 Na linapat'u Isa al-Masih su lusud'u Galili ka 'bpamamandu sekanin lu kanu manga pedsambayangan nu manga Yahudi enggu ibpangusiat'in su Mapia a Tutuma pantag kanu kapendatu nu Kadenan taman sa papegkapian nin su langun nu sakit enggu penggedamen nu manga taw. 24 Na nakapayapat bun kanu lusud'u Syria su makapantag sa lekanin. Na pinamananggit sa lekanin su langun nu aden sakit'in enggu pamenggedamen nin, su manga pedtala sa masakit, su inasukan nu manga saitan enggu su manga pamedsaingen taman kanu manga di pamakalakaw ka pinagkapia nin silan. 25 Na inunutan sekanin nu madakel a benal a taw a ebpun sa Galili, Awrusalim taman kanu ped a dalepa sa Yudia enggu Dikapulisi taman kanu ped a dalepa sa sebangan nu lawas'a ig'u Jordan.