Su Usiatan nu Nabi Yahiya enggu su Kapedsalawat'in kanu manga Taw
3
Na naipus su manga timpu na nakauma su Yahiya a 'Bpanalawata ka 'bpangusiat lu kanu tawan-tawan a dalepa sa Yudia 2 sa nia nin ibpangusiat na “Edtataubat kanu! Ka masupeg den a benal su kandatu nu Kadenan.” 3 Na su Nabi Yahiya bun ba a nia su pedtalun nu Nabi Isayas sia kanu kitab a“Aden 'bpananawag sa matanug lu kanu tawan-tawan a dalepa sa
‘Pagadil'u su lalan a 'bpagukitan nu Mapulu!b
Pakatidtu nu su entu a 'bpagukitan nin!’ ”c
4 Na su Yahiya na mimbalegkas sa ebpun sa bumbul'a unta enggu midsabitan sa upis'a binatang. Nia nin pegken na tapudi enggu teneb. 5 Na kanu entu ba na pibpawangan sekanin nu manga taw sa Awrusalim enggu manga taw a ebpun den kanu langun na ped pan a dalepa sa Yudia enggu lu kanu edsalipaga nu lawas'a ig'u Jordan. 6 Na inipangumpaya nilan su manga kabaladusan nilan entu pan ka sinalawatan silan nu Yahiya lu kanu lawas'a ig'u Jordan.
7 Ugaid'a guna mailay nu Yahiya i namakauma lu su madakel a taw a lusud kanu lumpukan a Parisiyu enggu Sadusiyud ka papedsalawat silan na nia nin pidtalu kanilan na “Sekanu a manga tupu nu manga nipay! Entain i midtalu sa lekanu sa mapukas kanu kanu pakauma a lipunget'u Kadenan? 8 Enggalebek kanu man sa kapianan a mana su penggalebeken nu taw a tidtu a midtaubat entu pan ka mapukas kanu kanu entu. 9 Di nu semaligi i kagina ka tupu kanu nu Nabi Ibrahim na mapukas kanu sa entu. Ka nia taman a madtalu ku sa lekanu na apia su manga watu ba a nia na magaga nu Kadenan maluy sa tupu nu Nabi Ibrahim! 10 Na nakakayang den man su kapa a ipedtebped kanu manga dalig'u kayu. Ka apia ngin a kayu a dili 'bpagunga sa mapia na 'bpanebpeden enggu ibpangidtug lu kanu apuy a pegkaleg.”
11 Na nia nin pan pidtalu na “Pedsalawatan ku sekanu sa ig a tanda nu kapedtaubat'u ugaid'a aden makatundug sa laki a labi lawan pan kumin sa laki ka apia su kapananggit ku kanu ampis'u ay nin na di aku makadait. Na su mama a nia a pakatundug sa laki na salawatan kanu nin kanu Suti a Ruh enggu apuy.e 12 Na pegkapetan nin den su 'bpagusalen nin sa kapapembayug ka papedsenggayan nin su matimegas enggu su ukap. Na su matimegas na itagu nin kanu kamalig a 'bpelimudan kanu bantad ugaid'a su ukap na tutungen nin lu kanu apuy a di den pebpatay.”
Su Kinasalawat kanu Isa al-Masih
13 Na kanu entu ba a manga kutika na nakauma su Isa al-Masih lu kanu lawas'a ig'u Jordan a ebpun sa Galili ka papedsalawat sekanin kanu Yahiya. 14 Ugaid'a pegkiugan pedsapal'u Yahiya su kapapedsalawat'in taman sa nia nin lun pidtalu na “Ngintu ka seka den i sinemia? Saki paman i pakanasisita kanu salawat'engka.” 15 Ugaid'a nia inisawal'u Isa al-Masih na “Suguti aku saguna, ka dait man a manggula ta i nia ka enggu matuman su langun na wagib a pigkahanda nu Kadenan.” Daka sinugutan den mambu sekanin nu Yahiya. 16 Na endaw demun i kinambuat'u Isa al-Masih kanu ig sa kanu kinasalawat lun na nakatekaw demun mimbuka su langit enggu nailay nin su Ruh nu Kadenan a nangalimbaba lu sa lekanin a linemagid sa malapati. 17 Daka aden suala a ebpun sa sulega a nia nin pidtalu na “Nia ba su Tunggal a wataf ku a pinadtaya enggu sangat a 'gkasuat aku sa lekanin.”