Su Kinalu nu manga Pabibitun kanu Pimbatan kanu Isa al-Masih
2
Na su Isa al-Masih na lu pimbata sa Bitlihim a sakup'u Yudia a nia lun pendatu kanu entu a timpu na su Datu Hirud. Na aden manga mama a pabibituna a ebpun sa sebangan, nakauma silan lu sa Awrusalim 2 ka inidsa nilan kanu manga taw lu i “Endaw su pimbata a datu nu manga Yahudi? Ka nailay nami su kinasebang'u bitun nin.b Na sinemia kami ka enggu kami makasugiud sa lekanin.”3 Na guna makineg'u Datu Hirud su entu na nalingasa su ginawa nin apeg'u manga taw sa Awrusalim. 4 Na inipatawag'u Hirud su langun na mapulu nu 'bpamangurban apeg'u manga gulu nu pangitabanc ka inidsa nin kanilan u endaw embatan su Masih. 5 Na nia nilan lun inisumpat na “Lu sa Bitlihim a sakup'u Yudia a mana bun su nakasulat kanu kitab a sia nakanggulalan kanu nabid a
6 ‘Hu Bitlihim a inged kanu kalupan sa Yahuda,
dikena matag i kabalapantag'engka sa kanu langun na 'bpamegkamal sia sa Yahuda,
kagina makabpun sa leka su endatu
a temiakap kanu manga taw ku a Israil.’e”
7 Daka inipatawag'u Hirud su manga pabibitun sa dala nakataw lun ka inamad'in sa tidtu-tidtu kanilan u kanu i kinailay nilan kanu kinasebang'u bitun. 8 Na pinalu nin silan sa Bitlihim sa nia nin pidtalu kanilan na “Lu kanu sa Bitlihim ka edsabenali nu mangilay su wata a entu. Na endaw i katun nu lun na edtalu nu sa laki ka enggu aku makalu asal'a makasugiud aku bun sa lekanin.”
9-10 Na guna makineg'u manga pabibitun su kadtalu a nia nu Datu Hirud na ginemanat mambu silan, na da ka pan ba ka su bitun a nailay nilan na nailay nilan menem 'bpaluman. Na mana silan nakasugku sa langit sa kinapia na ginawa nilan. Na nangunanan kanilan su bitun taman kanu atag'u nabetadan nu wata. 11 Na linemudep silan kanu walay taman sa nailay nilan su wata apeg'u ina nin a si Mariam. Daka midtinggaleb silan ka sinemugiud silan kanu wata. Entu pan ka inukan nilan su it'ilan ka inenggay nilan sa lekanin su dalem'in a bulawan, mamut a tutungen enggu kamutan a mira.f
12 Guna su mangagan den muli su manga pabibitun na sinapalan silan nu Kadenan sa ukit a taginepen sa di den silan embalingan lu kanu Hirud. Guna su maitu na sinemibay silan sa lalan kanu kinauli nilan kanu inged'ilan.
Su Kinapalu nu Kadenan kani Yusup sa Egypt
13 Guna den makaganat su manga pabibitun na mibpapayag kani Yusup su malaikat'u Kadenan sa ukit a taginepen sa nia nin pidtalu na “Embangun ka, ka pamagayasi ka mananggit lu sa Egypt su wata apeg'u ina nin. Na lu kanu demun ba taman a di ku edtalun i embalingan kanu kagina 'bpangilayn den nu Hirud su wata a nan ka 'bpagimatayan nin.”
14 Daka kanu entu bun ba a magabi na mimbangun mamagayas si Yusup ka kinua nin su wata enggu su ina nin ka ginemanat silan 'bpawang sa Egypt. 15 Na lu demun ba silan taman sa di pan matay su Hirud. Na kanu entu a nanggula na natuman su kadtalu nu Kadenan a Mapulu sia nakanggulalan kanu nabi a “Tawagen ku su wata ku san sa Egypt.”g
Su Kabpagimatay nu Datu Hirud kanu manga Wata
16 Na guna katuntayi nu Hirud i pinagakalan sekanin nu manga pabibitun na sangat a nalipunget sekanin. Na inisugu nin i pangimatayan su langun na manga wata a mama a da pan masalagun taman sa dua lagun i umul'in lu sa Bitlihim enggu kanu manga dalepa a masupeg lun. Na sia nin kinua su entu a lagun kanu kutika a kinailay nu manga pabibitun kanu kinasebang'u entu a bitun.
17 Na natuman sia ba su pidtalu nu Nabi Yaramias sia kanu kitab a
18 “'Gkangakineg su 'bpamelendag sa matanug enggu sangat a 'gkangalidu i ginawa nin lu sa Rama,
sangat a 'bpaguguliangan ni Rakil su manga wata nin
taman sa di sekanin pegkiug 'bpelimpangen
kagina da den su manga wata nin.”h
Su Kinapambalingan nu Kadenan kani Yusup lu sa Israil
19 Na guna den matay su Datu Hirud na pibpayagan menem'u malaikat'u Kadenan si Yusup lu sa Egypt sa ukit a taginepen sa nia nin lun pidtalu na 20 “Embangun ka, ka kua ka su wata enggu su ina nin ka embalingan kanu lu sa Israil kagina minatay den su pegkiug 'bpagimatay kanu wata.” 21 Daka mimbangun mambu sekanin ka kinua nin su wata enggu su ina nin ka mimbalingan silan lu sa Israil.
22 Ugaid'a guna katawi ni Yusup i nia nakasambi a pendatu sa Yudia na su wata bun nu Hirud a si Arkilus na 'gkagilekan sekanin pembalingan lu. Na sinapalan mambu sekanin nu Kadenan sa ukit bun na taginepen tembu lu silan tinemalus sa prubinsia a Galili. 23 Na guna silan makauma lu na lu silan migkaleben kanu dalepa a bedtuan sa Nasarit. Kagina ka maitu na natuman sia ba su kadtalu nu Kadenan a sia nakanggulalan kanu manga nabi a “Bedtuan sekanini sa taw sa Nasarit.”