Su Mapia a Tutuma
a Inisulat'i Mataya
Su Tarsilan pantag kanu Isa al-Masih
1
Nia ba su namakasulat makapantag kanu tarsilana nu Isa al-Masih a tupu nu Nabi Daud a nia nin kaapuan na su Nabi Ibrahim. 2 Na su Ibrahim ba a nia i ama nu Nabi Iskak, su Iskak menem i ama nu Nabi Yakub. Na su Yakub menem i ama nu Yahuda enggu su manga lusud'in sa tian a mama.b 3 Na su Yahuda i ama nu Parez enggu Zira a nia nilan ina na su Tamar. Su Parez menem i ama nu Hisrun enggu su Hisrun menem i ama nu Aram. 4 Su Aram menem i ama nu Aminadab, su Aminadab menem i ama nu Nasun enggu su Nasun menem i ama nu Salmun. 5 Na su Salmun menem i ama nu Buas a nia nin ina na su Rahab. Su Buas menem i ama nu Ubid a nia nin ina na su Rut enggu su Ubid menem i ama nu Yisi. 6 Na su Yisi menem i ama nu Nabi Daud a Sultan nu Israil.Na su Nabi Daud i ama nu Ragya Sulaiman. Na su Ragya Sulaiman na wata nu Daud kanu babay a kaluma nu Uriya. 7 Su Ragya Sulaiman menem i ama nu Rubuam, su Rubuam menem i ama nu Abi enggu su Abi menem i ama nu Asa. 8 Na su Asa i ama nu Yusapat enggu su Yusapat menem i ama nu Yuram enggu su Yuram menem i ama nu Usiyas. 9 Na su Usiyas i ama nu Yutam, su Yutam menem i ama nu Akas enggu su Akas menem i ama nu Isikias. 10 Na su Isikias i ama nu Manasi enggu su Manasi menem i ama nu Amus enggu su Amus menem i ama nu Yusia. 11 Na su Yusia i ama nu Yakunia enggu su manga lusud'in sa tian a mama. Na kanu entu a timpu na sinigkem'u manga taw sa Babilunia su manga taw sa Israil ka pinananggit'ilan lu sa Babilunia.
12 Ulian nu kinapananggit kanu manga taw sa Israil lu sa Babilunia na pimbata nu Yakunia su Salatil. Na su Salatil i ama nu Zurubabil 13 enggu su Zurubabil menem i ama nu Abiud. Na su Abiud i ama nu Iliakim, su Iliakim menem i ama nu Asur 14 enggu su Asur menem i ama nu Saduk. Su Saduk i ama nu Akim, su Akim menem i ama nu Iliud 15 enggu su Iliud menem i ama nu Iliasar. Na su Iliasar i ama nu Matan enggu su Matan menem i ama nu Yakub. 16 Na su Yakubc i ama nu Yusupd a kaluma nu Mariam. Na su Mariam ba a nia su ina nu Isa a bedtuan sa Masih.e
17 Kagina ka maitu na langun na katupuan iganat kanu Nabi Ibrahim taman kanu Nabi Daud na sapulu enggu pat ka katupuan. Na iganat menem kanu Nabi Daud taman kanu kinapananggit kanu manga taw sa Israil lu sa Babilunia na sapulu enggu pat ka katupuan bun enggu iganat menem kanu kinapananggit kanu manga taw sa Israil lu sa Babilunia taman kanu kinambata kanu Masih na sapulu enggu pat ka katupuan bun.
Su Kinambata kanu Isa al-Masih
18 Na maya ba i nanganggula kanu kinambata kanu Isa al-Masih. Su Mariam a ina nu Isa al-Masih na 'gkagkaluma nu Yusup. Ugaid'a unan nu kadtampung'ilan na natawan i magingay sekanin sia nakanggulalan kanu Suti a Ruh.f 19 Na sabap sa matidtu a mama si Yusup a 'gkagkaluma nin na napagitung'in i pitaseng nin su Mariam sa dala gaid makataw lun kagina di nin kiugan a makayaya su Mariam sia kanu madakel a taw. 20 Na ulian nu kabpagitung'i Yusup kanu entu na mibpapayag su malaikat'u Kadenan sa ukit a taginepen sa nia pidtalu nu malaikat sa lekanin na “Yusup a tupu nu Daud, da ka 'gkagilek sa kapangaluma nengka kanu Mariam kagina su pegkalalingen nin na sia nakanggulalan kanu Suti a Ruh. 21 Embata sekanin sa wata a mama, na bedtui ka sekanin sa Isah kagina ilipuas'in su manga taw nin kanu manga kabaladusan nilan.”
22 Na kanu langun nu nia a nanggula na natuman su pidtalu nu Kadenan a Mapulu a sia nakanggulalan kanu nabi sa nia nin pidtalu na 23 “Ilay nu! 'Gkagingay su laga enggu embata sa wata a mama a bedtuan sa ngala a Imanuil”i (nia nin maena na “Kaped tanu su Kadenan”). 24 Na guna den makagedam si Yusup na pinggula nin su inisugu sa lekanin nu malaikat'u Kadenan ka pinangaluma nin mambu su Mariam. 25 Ugaid'a da nin imbalagiuma taman a da pan makagemaw su wata a mama a kagingay nu Mariam. Na guna makagemaw su wata na pinggungalanan ni Yusup sa Isa.