Yesu Akusinga Beigisibwa Ikumi nu Babili
9
1 Gamanine Yesu beigisibwa bage ikumi nu babili gamozi, abakasile magala nu bwangato gantata ga basumbu bansania, nu konia nsambo. 2 Abasingile kusambala bukota bwa Kalaga, nu konia basambi. 3 Ababwide bunee: “Tamweke kampa mu lugendo lweinyu, aba musumbo, aba nsago, aba kampampa, aba bikulo, nu muntu ntabe na makoti mabili. 4 Numba insania zimwingilage muzo, ikalazi muzo aaba nu gamwatuke mu wozo mwino. 5 Nu ndi bantu tabamusekela, nkungu zimukutuka mu wozo mwino, nti mwatitula mukungu wa ku magulu meinyu kuba bulongeki bweinyu kubeli.” 6 Nu batukile nu bendile ku mwino na mwino kusambala Musagu Musoga, nu konia bantu ku biziki binsania. Kuzangazanga kwa Herode
7 Mukota Herode ungule binsania byatingile, nu azangilezangile, kubuno bamozi babwide bunee: “Yoana Mututiki ayuka kutuka ku bakuzi;” 8 bango bamozi bunee: “Elia u wabasa.” 9 Tondo Herode abwide bunee: “Nasesile itoe lya Yoana; tondo nazi lingo wono u nkungwa ku misagu zage?” Nu alondile buno amumoneko.
Yesu Akulisia Bantu Tununu Tutano
10 Gasubizie basingwa, basambalide Yesu bunsania bubakitile. Abatolile, endile gamozi nabo nu eitundile ku lulenge lwa mwino umozi wamanagwa Betesaida. 11 Gamenyine bantu bubo, bamuyangile. Nu Yesu abasekede, nu abasambalide bya bukota bwa Kalaga; onezie lingo babo beiyaninaga konibwa.
12 Gabede busi buse mwigolo, beigisibwa ikumi nu babili bavule kwage, nu bamubwide bunee: “Lagana na bantu buno bende ku miino nu ku biziki bili bwigi, buno bamone gabaneiyombeka nu kulia idia: kubuno gano gatuli geli mu lubanda.” 13 Yesu ababwide bunee: “Bakasazi idia inyuwe mubenyene.” Tondo bakwide bunee: “Tuli tugu na tumpampa tutano nu byena bibili, umpanga ndi beiswe tubenyene twende kukunzila bantu babano bansania idia?” 14 Tondo kwabezaga bamulume bwigi na tununu tutano. Yesu abwide beigisibwa bage bunee: “Beikaziazi gansi bibombobibombo nu nakyo, nakyo na makumi matano.” 15 Bakitile bubo nu beikazizie bansania gansi. 16 Yesu atolile tuto tumpampa tutano nu bibyo byena bibili, nu agalamine kwigulu, nu aganwine Kalaga. Kusila, atubungwide nu atukasenne ku beigisibwa, buno babeganizie musanganano. 17 Bansania balide nu beikutile, nu beigisibwa basongezye nzi ikumi nu ibili ziyede na mbobu zasigalaga.
Petro Akwitabizia Buno Yesu Eli Mwana wa Kalaga
18 Busi bumozi Yesu asegaga wenyene, nu beigisibwa bage babezaga gamozi nage, ababuzizie bunee: “Bantu bakutenda buno, nili nazi?” 19 Bakwide bunee: “Yoana Mututiki; bango buno, Elia, nu bango buno, umozi wa ku balengania ba wakalazi u wayuka kutuka ku bakuzi.” 20 Yesu ababuzizie bunee: “Tondo inyuwe mukubula buno nili nazi?” Petro akwide bunee: “Kristo wa Kalaga.”
Yesu Akusambala Musagu wa Lukuo Lwage nu Kuyuka Kwage
21 Nu Yesu abakakizizie bubibu buno, tabasambale bubo ku muntu wampa. 22 Atendile lingo bunee: “Bwatunganana Mwana wa Muntu asungibwe mu nkita ningi, nu kusombwa na bakulu nu na basankoga banene, nu na basozi ba milembe, nu kwitwa, nu kusila kwa bindi bisatu nti ayuka kutuka ku bakuzi.” 23 Kusila, abwide bansania bunee: “Ndi muntu akutunda kunyanga, nti eitune we wenyene, nu nti eka musalaba wage busi na busi; nu nti anyange. 24 Kubuno muntu unsania ukutunda konia kalamo kage, nti akakazimizia, tondo unsania wazimizia kalamo kage ku kabamba kane, nti akakonia. 25 Kubuno mutali mukizi ku muntu kuba na kisi kinsania, nu kwizimizia wenyene. 26 Kubuno muntu unsania ukamona nsoni kundi nu ku malagi mane, nti Mwana wa Muntu, akamumona nsoni gaakavwa mu lutanuno lwage, nu lulo lw'Isi, nu lwa banzelo basililila. 27 Lebelebe nkumubula buno, bantu bamozi bemana gano tabakakua lwabusio ndi tabemona ku bukota bwa Kalaga.”
Yesu Akugalukibwa Kilungi
28 Bwigi na bindi kinana kusila kwa kutenda bibino bitondo, Yesu akatile Petro gamozi nage, Yoana nu Yakobo, nu abakamine gantata ga mwiduko buno asege. 29 Gaabezaga akusega, kilungi kyage kyagalukile nu nsulu zage zabede na kyengi kikukelima nunse. 30 Nu bamonine ku bantu babili basambalaga nage; babezaga Musa nu Elia. 31 Bamonekile mu lutanuno lwa mwigulu. Batendaga ku kitondo kya lukuo lwage, bulukazindilila ku Yerusalema. 32 Petro nu banyage bazenzede nunse na tulo, tondo gabayukile ku tulo, bamonine ku lutanuno lwa Yesu nu babo bantu babili babezaga bemana gamozi nage. 33 Nu gabede bantu babano balekanuka na Yesu, Petro amubwide bunee: “Musozi, buli busoga twikale gano; tobakazi nusu isatu, lumozi lwobe, lumozi lwa Musa nu lungo lwa Elia.” Nu we ntamenyininne bwatendaga. 34 Gaabezaga akutenda bubo, kimpa kyavule nu kyabakukide, nu beigisibwa bakule na boba bubeingide mu kikyo kimpa. 35 Nu mu kimpa mwatukile iyuki lyatendile bunee: “Wono eli Mwana wane u nasombwede, mumungwilile!” 36 Nu iyuki lilino galyasilile kungubwa kulyo, Yesu amonekileko wenyene. Beigisibwa beikede kibibi, nu tabasambalide muntu wampa bubo bubamonineko mu zezo nkungu.
Yesu Akonia Mwana Wabezaga na Musumbu
37 Gakede busi, bagelile ku mwiduko, nu bantu beingi bavule kukulumana na Yesu. 38 Nu munkatini mwa musanganano, muntu umozi alalukile n'iyuki inene bunee: “Musozi, nkukusega buno ulole nunse musikila wane kubuno we eli mwana wane wa ngomo! 39 Kubuno musumbu umozi akumukataga nu kazanga kongo nti alaka nunse, nu wozo musumbu nti amutengiatengia na magala nu nti amubasia iyulo ku busundo nu nti buseli bubibu kumumenka ku magala. 40 Nasegile ku beigisibwa bobe buno bamwimbye tondo tababuvwamine.” 41 Nu Yesu atendile bunee: “Ee kibuti kiteli na bukatizio, nu beiya myango ndi nkeikalaga n'inyu kankanka? Gani gankakutilwa? Vwa na musikila wobe gano.” 42 Nu gaavule ku Yesu, wozo musumbu amugusizie gansi nu amubulubutizie bubibu. Tondo Yesu azugide wozo musumbu. Nu onezie wozo mwana nu amusubizie ku isi. 43 Nu bantu bansania bangamine nunse ku magala manene ma Kalaga.
Yesu Akusambala Lingo Musagu wa Lukuo Lwage nu Kuyuka Kwage
Nu gababezaga bakuganagana ku bunsania bwakitile Yesu, We abwide beigisibwa bage bunee: 44 “Ungwililazi busoga malagi mamano: Mwana wa Muntu ende kugabulwa ku maboko ma bantu.” 45 Tondo beigisibwa tabamenyininne kitondo kikino kubuno kyabezaga kyabiswa kubeli buno banavwa kukisongolola nu bakule boba kumubuzia bwisulilwa bwa kitondo kikyo.
Nazi Uli Munene?
46 Nu beigisibwa balingile kwakanania bwabobwabo buno, nazi umozi mubo unavwama kuba munene? 47 Yesu amenyaga makengelo ma mitima zabo, ububo atolile mwana muto nu amubikile bwigi nage. 48 Nu abatendile bunee: “Na unsania wansekela, nti asekela wozo wansingile: kubuno wozo uli mukeke munkatini n'inyuwe bansania u wozo uli munene.”
Wozo Uteli Musombi weinyu Nti Eli wa ku Lulenge Lweinyu
49 Yoana atendile bunee: “Musozi, twamonine ku muntu umozi akutikya basumbu ku izina lyobe, nu twamunanizie, kubuno nteli umozi wa kutuli.” 50 Tondo Yesu akwide bunee: “Tamumunanie, kubuno wozo uteli musombi weinyu nti eli wa ku lulenge lweinyu.”
Mwino Umozi wa BaSamaria Bakunana Kusekela Yesu
51 Nu gabede bindi byage bya kwenda mwigulu bise bwigi na kukuka, Yesu akandile mutima kwenda ku Yerusalema. 52 Nu asingile migenzi lwabusio lwage. Nu bendile nu beingide mu mwino wa baSamaria buno balongeke kiziki kyage kya kwiyombeka. 53 Tondo bantu ba kuko tabamusekede kubuno bamonine alolela kwenda ku Yerusalema. 54 Gamonine beigisibwa bage Yakobo nu Yoana ku bubo, batendile bunee: “Mukota, ndi ukutunda tusege keiya kutuka kwigulu nu kubazikya?” 55 Tondo Yesu akebetukile kubeli nu abazugide nunse bunee: “Buni buli lukita lwa mitima zimuli nazo? 56 Kubuno Mwana wa Muntu avule, ta ku kuzimizia mitima za bantu, tondo kuzonia.” Nu bendile ku ungo mwino.
Babo Bakutunda Kuyanga Yesu
57 Gababezaga bakwenda mu nzila, muntu umozi amubwide bunee: “Mukota nakuyange kunsania kuwendage.” 58 Yesu amwakwide bunee: “Mikala zili na matengu, nu tuzoni twa mu mpelela tuli na bizumba, tondo Mwana wa Muntu nteli na kiziki kya kubikila g'itoe lyage.” 59 Atendile ku ungo muntu bunee: “Nyange.” Tondo wozo muntu akwide bunee: “Mukota, nkase tanga bwangato bwa kwenda kuyika tatane.” 60 Yesu amutendile bunee: “Siga bakuzi bayike bakuzi babo; tondo uwe enda usambale Musagu wa bukota bwa Kalaga.” 61 Ungo muntu amubwide lingo bunee: “Mukota, nakuyange, tondo nkase tanga bwangato kwenda kulagana na kikanga kyane.” 62 Yesu amwakwide bunee: “Wozo muntu ukubika kuboko kwage gantata g'iyembe nu kulima, nu lingo nti akulola kumbusa, ntatunganana ku bukota bwa Kalaga.”