Herode Akwita Yoana Mututiki
14
1 Mu nkungu zezo mukota Herode ongule ku musagu wa Yesu, 2 nu abwide bakambi bage bunee: “Wono eli Yoana Mututiki; ayuka kutuka ku bakuzi; nu ku bubuno akukita migeleko zeno.” 3 Kubuno Herode akatile Yoana, amukandile, nu amubikile mu kikando ku kabamba ka Herodia, mukikulu wa muto wage Filipo. 4 Kubuno Yoana amubwide bunee: “Ku mulembe tabwakulungana kuguli kumusonga.” 5 Nu Herode atundile kumwita, tondo akule musanganano boba, kubuno akengede buno abezaga mulengania.
6 Tondo gabede busi bunene bwa kubutwa kwa Herode bwika, mukinga wa Herodia aminine lwabusio lwa bantu, nu atananizizie Herode. 7 Nu Herode alumbide bunee: “Kinsania kiwansegage nakukasekyo.” 8 Nu mukinga, gaasilile kwanoa na nina, atendile Herode bunee: “Nkase itoe lya Yoana Mututiki ga lupepe.” 9 Nu mukota abede na kabebe; tondo ku kabamba ka kulumbila kwage, nu ku kabamba ka babo baliaga nabo, akakizizie buno akaswe lyo; 10 nu asingile muntu buno asese itoe lya Yoana mu kikando. 11 Bavule nalyo ga lupepe, nu balikasile ku wozo mukinga nu aliekile ku nina. 12 Nu beigisibwa bage bavule nu bekile kitumba kyage nu bakiyikile mu nsinda; nu bendile kundula Yesu.
Yesu Akulisia Tununu Tutano
13 Gongule Yesu ku musagu wa lukuo lwa Yoana, akiminne mu bwato, endile mu lubanda kutabezaga bantu; nu gongule musanganano bubuno, batukile ku miino zabo, bamuyangile na magulu. 14 Nu gatukile Yesu mu bwato, amonine ku musanganano munene, agukwilide kyombo, nu onezie basambi babo.
15 Nu gabede buse mwigolo, beigisibwa bage bamuvwilide, nu batendile bunee: “Kiziki kikino kili lubanda, nu busi buse bwida; singa musanganano, buno bende kulonda idia ku miino.” 16 Tondo Yesu ababwide bunee: “Tabatunganana kwenda, inyuwe mubakase idia.” 17 Bamwakwide bunee: “Tuli na tumpampa tutano nu byena bibili tugu.” 18 Nu Yesu atendile bunee: “Vwazi nabyo kundi.” 19 Nu abwide musanganano bunee: “Ikalazi gansi,” nu akatile tumpampa tutano nu byena bibili; nu agalamine kwigulu, abisegede nu abibungwide nu abikasile beigisibwa nu beigisibwa babikasenne ku musanganano. 20 Nu bansania balide, nu bembukile: nu basongezye mbobu zasigalaga zizazizie nzi ikumi nu ibili. 21 Nu babo bansania baliaga babezaga bamulume bakuka tununu tutano, kuteli kuganza bakikulu nu bana.
Yesu Endile Gantata ga Mazi
22 Mu nkungu zezo Yesu asingile beigisibwa bage buno bakimine mu bwato, buno balinge kusoka ku lisilya, nu We asigede akulagana na musanganano. 23 Nu gaasilile kulagana na musanganano, abakamine ku mwiduko buno asege, nu gabwabede buse mwigolo abezaga kuko wenyene. 24 Tondo bwato bwabezaga buse munkatini mwa kitatenge, nu bwagingilegingile nunse na bimpumi kubuno kisoa kyabezaga kinene. 25 Bwigi na kukya kwa busi, Yesu avule kubeli endaga gantata ga kitatenge. 26 Nu gamonine beigisibwa bage akwenda gantata ga kitatenge bakule boba, batendile bunee: “Kili kitwanda;” nu balalukile kubuno bakuaga boba. 27 Tondo kazanga kongo Yesu ababwide bunee: “Kokomeziazi mitima zeinyu; nne u wono; tamukue boba.” 28 Nu Petro amwakwide bunee: “Mukota, ndi uwe u wozo, nkakizie nu nne buno nivwe gantata ga mazi.” 29 We amubwide bunee: “Vwa kundi.” Petro atukile mu bwato, endile gantata ga mazi, endile ku Yesu. 30 Tondo gaamonine ku kisoa akule boba, alingile kukoka mu kitatenge, alalukile bunee: “Mukota, nnonie!” 31 Yesu alambizie kuboko kwage, amuzanzwide, amubwide bunee: “Uwe musosu mu bukatizio, buni butakukatizia?”
32 Nu gaabakimine mu bwato, kisoa kyabotile. 33 Nu babo babezaga mu bwato bamukumbaminne, nu batendile bunee: “Lebelebe, Uwe uli Mwana wa Kalaga!”