MALAKI
Lutundo lwa Kalaga ku bantu bage
Tondo inyuwe mukubuzia bunee: “Buni buwatwelamine?”
Nu Yehowa akubuzia bunee: “Ndi Esau ntabezaga iselenzi wa Yakobo? Tondo natundile Yakobo, 3 nu nasombile Esau, nu nagalukizye miduko zage zibe makindu nu kukasa nyama nkali za lubanda bwiyani bwage.”
4 BaEdomu banatenda bunee: “Twazikibwa nunse, tondo twazanzule lingo misakati zeitu.”
Tondo Yehowa, Mwiya Mayombo, akutenda bunee: “Bobake tugu; tondo nasambule lingo. Bamanwe Kisi Kibi nu bantu baswilidwe na Yehowa ku milyalya. 5 Mukabamona na meiso meinyu mubenyene nu mwatende bunee: ‘Yehowa eli munene kutinga myaga za Israeli.’”
6 Yehowa, Mwiya Mayombo, akutenda bunee: “Mwana akwanza isi, nu mukiti akwanza mukota wage. Ndi nili isi lwanzo lwane luli kuni? Nu ndi nili mukota, boba kundi buli kuni? Ee basankoga bakubenga izina lyane.
Tondo mukubuzia bunee: ‘Tukubenga izina lyobe ku nzila nkizi?’
7 Mukubika idia lya nsese ku kasenga ka kayulo kane; nu mukubuzia bunee: ‘Tukubika nsese ku nzila nkizi?’
Kubuno mukutenda kasenga ka Yehowa keli kintu kya kubengwa. 8 Nkungu zimukukasana nyama zili kyuku ku kayulo, ndi tabuli bubi? Nu gamukukasana bitunga nu nyama zikusamba, ndi tabuli bubi? Kasanazi byo tanga ku mukota wobe; ndi atananizibwe nobe, aba akwitabizie?” U bukutenda Yehowa, Mwiya Mayombo.
9 Nu kano kaluma, segazi kyombo ku Kalaga buno atukase mponga, kubuno ndi bitondo bibino bikukitwa na maboko meinyu, ndi amwitabizie? U bwabuzia Yehowa, Mwiya Mayombo.
10 Songo kwabezaga umozi kumuli ukwigala lwibi, buno tamuningila nu kubangia keiya buliabulia ku kasenga ka kayulo kane. Nsili na mbogimbogi n'inyu aba nsitabizie tuyulo twa maboko meinyu,” u bwatenda Yehowa, Mwiya Mayombo. 11 “Kubuno kutukila kusanuka kwa musi aaba nu kugoba kwago, izina lyane lyabe inene munkatini mwa babilongo, ku kiziki na kiziki bakugisia aliga ku kabamba k'izina lyane nu tuyulo twisanana kubuno izina lyane lili inene munkatini mwa babilongo,” u bwatenda Yehowa, Mwiya Mayombo. 12 “Tondo inyuwe mwalibigia gamukutenda bunee: ‘Kasenga ka Yehowa keli nsese,’ nu biguma nu idia bikubikwa gantata ko byanyegwa. 13 Nu inyuwe mukutenda bunee: ‘Kitondo kikino kyatukutia nunse!’ Nu mwakyililika,” u bukutenda Yehowa, Mwiya Mayombo. “Nu mwavule na nyama za bwibi, nu zili bitunga, nu zikusamba; bibyo u bimukukasana ku kayulo. Ndi nitabizie bibyo mu maboko meinyu?” Yehowa akubuzia bubo. 14 “Tondo aswililwe mwengelezi, wozo ukulumbila kukasana kilimba kisoga mu kibombo kyage, tondo akukasana kili kitunga. Kubuno nili Mukota munene,” u bukutenda Yehowa, Mwiya Mayombo, “nu izina lyane likukubwa boba mu bilongo.”