14
1 Lola, busi bwa Yehowa bwakuka; mu bo mwabeganie ntiko zimwakatile. 2 Nkakundamania baBilongo bansania ku Yerusalema kwitana bita nago, nu mwino wakatwe, nu numba zanyagwe, nu bakikulu bakatwe kwa magala, nu kyindi kya bantu ba mu mwino bende ku bukobe, nu basigala tabatikibwe mu mwino. 3 Nu Yehowa abase nu kwitana na baBilongo babo, anga bwalwanine mu busi bwa bita. 4 Nu magulu mage makemana busi bubo gantata ga Mwiduko wa Mizeituni guli ku lulenge lwa kuntata lwa Yerusalema, nu Mwiduko wa Mizeituni watwe kuba bibe bibili, na mpinga nnene gabisamba, kyindi kya mwiduko kyende ku lulenge lwa kwikazi, nu kingo kyindi kya mwiduko kyende ku lulenge lwa kwidume. 5 Nu mukatina ku nzila za mpinga za mwiduko wane, kubuno zabase aaba nu ku Azeli. Mukatina anga bumwatinine lwabusio lwa kaningini ka kisi mu bindi bya Uzia, mukota wa baYuda. Nu Yehowa, Kalaga wane, akavwa, gamozi na basililila bansania.
6 Mu kindi kikyo takukaba kyengi, aba mpego, aba muzuzo. 7 Nu kikaba kindi kyengukana, u kindi kizibwe na Yehowa wenyene, u kindi kiteli na musi aba kapilo, tondo nkungu z'igolo nti kukili kyengi. 8 Nu bukaba mu busi bubo mazi ma kalamo makatuka mu Yerusalema; kyindi kyamo kyagele ku kitatenge kya Munkange, a nu kyindi kyamo ku Kitatenge Kinene, b nu mazi makagela mu nkungu za kilimo nu mu nkungu za mpego.
9 Nu Yehowa akaba mukota munene wa kisi kinsania. Mu busi bubo kukaba Yehowa umozi tugu, nu izina lyage u izina limozi tugu. 10 Kisi kinsania kikaba anga masoa ma kibitabita kutukila Geba aaba nu ku Rimoni, kili ku lulenge lwa kwidume lwa Yerusalema. Nu Yerusalema akasakikwa nu kusigala ga kiziki kyago, kutukila ku lwibi lwa Benjamina aaba nu ku lwibi Lutangi, aaba nu ku lwibi lwa Kapindapinda, aaba nu ku lwibi lwa byindo bya Hananeli aaba nu ku kansango ka kukambutula biguma bya mukota. 11 Bantu bakeikala mu wozo mwino. Tabakazika lingo, nu babo ba ku Yerusalema bakeikala na bubobelelo kankanka.
12 Babo bakendela Yerusalema ku bita Yehowa akabasungia na lusambo lukali; mibili zabo zikabola nkungu zibeikibemana kima, nu meiso makabola mu biziki byamo, nu ndami zabo mu tunua twabo. 13 Mu busi bubo, Yehowa akabeitia na mizangozango. Bakakatana ga maboko, na muntu na muntu ku munyage, nu nawe na ukeitana na munyage. 14 BaYuda bakeitana mu mwino wa Yerusalema, bakatola bikulo bya bilongo byabatimba; bakakundamania olo, nu feza, nu nsulu. 15 Nyama insania za beiti ba baYuda u farasi, nu nyumbu, nu ngamia, nu mpunda, zikakua na lulo lusambo lukali anga bantu.
16 Mu nkungu zezo, baBilongo basigale ku babo beitanaga na Yerusalema bakavwaga mwaka na mwaka bakumbamina Mukota, u Yehowa, Mwiya Mayombo, nu kubogaboga ku Kisagulo kya Nusu. 17 Ndi kimozi kya bilongo bya ba kisi takyazige kubakama ku Yerusalema buno kikumbamine Mukota, u Yehowa, Mwiya Mayombo, nti mbula tazikaloka mu kisi kikyo. 18 Ndi baMisri banana kwenda ku Yerusalema kukumbamina nu kubogaboga ku Kisagulo kya Nusu, nti tabakalokezibwa mbula. Lusambo lukali lwasingile Yehowa ku bilongo lukabasa ku babo batazige kuvwa kubogaboga ku kikyo kisagulo. 19 Lulo lwabe lusungio ku Misri nu ku baBilongo batakundamane ku kikyo kisagulo.
20 Mu nkungu zezo, aba ngebengebe za farasi zikaba na masanzo ma “Kyasililila kya Yehowa;” nu nyungu za kuyika idia mu numba za Yehowa zikaswagibwa anga nyungu zili lwabusio lwa kasenga ka kayulo. 21 Nyungu na nyungu zili mu Yerusalema nu mu Yuda zikaba zasililila ku Yehowa, Mwiya Mayombo. Babo bakavwa kukasana bisansa bakatola ku zezo nyungu nu kuyika nyama muzo. Mu bindi bibyo takukaba aba umozi ukakunzia mu numba nnene za Yehowa, Mwiya Mayombo.