13
1 Nu atendile lingo bunee: “Ku busi bubo, kanuabalongo kamoneke ku numba za Davidi nu babo ba ku Yerusalema, ka kubasuga ku mibi nu ku bwagi bwabo.” 2 Yehowa, Mwiya Mayombo, atenda lingo bunee: “Mu busi bubo nazimizie meina ma nkisi mu kisi, nu tamakengelwe lingo, nu napumbie balengania ba buza, nu mitima mibi mu kikino kisi. 3 Nu ndi muntu es'alengania, nti isi nu nina bamubutile bakamubula bunee: ‘Ntwatunganana kulama lingo, kubuno ukulengania buza ku izina lya Yehowa.’ Nu isi nu nina bakamusumita nkungu zakulengania.
4 Mu busi bubo balengania bakue na nsoni nawe ku kabamba ka kalolesio kage nkungu za kulengania. Ntengelele bantu na kuvwala nsulu za myoza, a 5 tondo atende bunee: ‘Nne nsili mulengania, nili mulimi w'isoa; nabezaga mulimi kutukila bwana bwane.’ 6 Ndi umozi amubuzia bunee: ‘Byulu bya kikizi bibino byili mu kuboko kobe?’ Nti we akule bunee: ‘Byulu bibyo nabikule ku numba za kilemba kyane.’”
7 Yehowa, Mwiya Mayombo, atenda bunee: “Ee mwene wa nganda, yuka ku mulangi wane, ku muntu uli kilemba kyane. Libula mulangi nu mikoko nti zabalangana, nu nagalukye kuboko kwane ku byana.” 8 Nu Yehowa akubula lingo bunee: “Bukaba mu kisi kinsania buno byindi bibili byagusibwe gansi nu byakue; tondo kyindi kya bisatu kyasigale mukyo. 9 Nu natingie kyindi kikyo kya bantu mu keiya, nu kukyengia anga bukwengibagwa feza. Nu nabalindike anga bukulindikagwa olo. Bakammana mu izina lyane nu nabeitabile; natende bunee: ‘Beli bantu bane,’ nu batende bunee: ‘Yehowa eli Kalaga weitu.’”