12
1 Lilino lili iyuki lya Yehowa ku Israeli: Yehowa, wabumbile igulu, nu kubika kibanza kya kisi, nu kubumba mutima wa muntu mweli, akutenda bunee: 2 “Lolazi, nakite Yerusalema kuba kituma kya kubungiabungia bilongo binsania byamutimba. Nu Yuda lingo atimbwe na bita gamozi na Yerusalema. 3 Nu ku busi bubo nakite Yerusalema kuba ikozi izitu ku baBilongo bansania. Bilongo binsania byageleke kulitikya byabigibwe. Bilongo binsania byakundamanibwe kwitana na Yerusalema.” 4 Yehowa atenda, “Mu busi bubo nazangiezangie farasi, nu kwita mubakami wazo na busile. Nu nabike meiso mane ku numba za Yuda, nu nabike farasi na farasi za bilongo kuba byuku. 5 Nu bakota ba Yuda batende mu mitima zabo bunee, ‘Bantu ba ku Yerusalema beli na magala, kubuno Yehowa, Mwiya Mayombo, eli Kalaga wabo.’
6 Nu mu busi bubo, nakite bakota ba Yuda anga nyungu za keiya gasamba nkuzi, nu anga ngulumina za keiya munkatini mwa mikanda. Nu bagisie bilongo binsania ntungo insania, ku seidume nu ku seikazi, nu ba ku Yerusalema basigale bulonge bukata ku kiziki kyabo ku Yerusalema. 7 Yehowa alinge konia hema za Yuda, buno lutanuno lwa numba za Davidi nu lutanuno lwa bantu ba Yerusalema talwatinge lulo lwa Yuda. 8 Mu busi bubo, Yehowa alange bantu ba Yerusalema, nu wozo uli musosu munkatini mwabo abe anga Davidi nu kikanga kya Davidi kyabe anga buli Kalaga, anga mugenzi wa Yehowa lwabusio lwabo. 9 Nu ku busi bubo, nalonde kuzikya bilongo binsania bikukita bita na Yerusalema.
10 Nabalanganie ku numba za Davidi nu ku bantu ba ku Yerusalema, mutima wa mponga nu masego, nu bandole, wozo u basumitile, bamulilile anga bukulililaga muntu ngomo zage, nu bamulilile na kabebe anga bukulililaga muntu nkula zage. 11 Nu ku busi bubo kwabe idilo inene mu Yerusalema, anga idilo lya Hadadi-Rimoni mu kibitabita kya Megido.
12 Kisi kyalile, nu kikanga na kikanga mu kyage kiziki, nu bakikulu bakyo ku kyabo kiziki; kikanga kya Davidi mu kyage kiziki nu bakikulu babo mu kyabo; nu kikanga kya Natana mu kyabo kiziki nu bakikulu mu kyabo, 13 nu kikanga kya Lawi mu kyabo kiziki nu bakikulu mu kyabo, nu kikanga kya Simei mu kyabo kiziki nu bakikulu mu kyabo, 14 nu bingo bikanga byasigala mu byabo biziki, nu bakikulu mu kyabo.”