11
1 Ee Lebanoni, igula nibi zobe, buno keiya kagisie miti zobe za mierezi. 2 Ee muberoshi, kubuno mierezi zagoa; kubuno miti zasakama zasindwa nu kubigibwa; inyuwe miti minene za mwalo za Basani, lilazi, kubuno miti za mu lubanda lweinyu zagoa. 3 Ungwililazi kulila kwa balangi, kubuno biziki bya kulisizia ga bituganwa byabiga! Ungwililazi kuzuga kwa byana bya kimbwe, kubuno lubanda lwanaga lwa Yordani lwabiga! 4 Bubuno u bwatenda Yehowa, Kalaga wane: “Lisiazi kibombo kya kuseswa. 5 Babo bakukikunza bakisese, nu tabasungibwe, nu babo bakukikunzia bakutenda bunee: ‘Yehowa aganunwe, kubuno nne nili mugumi,’ nu balangi babo tabakukikwila kyombo. 6 Yehowa atenda bunee: ‘Kubuno nsyakwile lingo bantu kyombo, tondo nabike na muntu na muntu ku kuboko kwa munyage, nu ku kuboko kwa mukota wage, nu balibule kisi, nu nsyabonie kutuka mu kuboko kwabo.’”
7 Nu nalisizie kibombo kya kuseswa, embe bazambi ba ku kibombo. Nu natolile misumbo ibili, umozi nagumanine “Busoga,” nu w'ibili nagumanine “Bibombo”; nalisizie kibombo kya mikoko. 8 Natikizye balangi basatu mu mwezi umozi. Kubuno mutima wane wakutilwe nabo, mutima wabo wansombile lingo. 9 Nu natendile bunee, “Nsyamulisie lingo, wozo wakua nti akua, nu wozo wabikwa bulazi abikwe bulazi, nu zezo zasigale, nti zalia misuna za munyage.”
10 Nakatile musumbo wane u namanine “Busoga,” nu nagusesile byindi byindi, buno nite idagano linakitile na bilongo binsania. 11 Lyabungwidwe busi bubo, nu bazambi babo banungule bamenyine buno kyabezaga kitondo kya Yehowa. 12 Nu nababwide bunee: “Ndi bwamutananina munkase lukalilo lwane, ndi ta bubo, nti mwasigala nalo.” Nu baganzile byindi makumi masatu ma feza ku idigo lyane.
13 Nu Yehowa ankakizizie bunee: “Bilekele kwa mubumbi w'idega,” u bukunza busoga bunakunzilwe nabo. Nu natolile bibyo byindi makumi masatu, nu nabilekede kwa mubumbi w'idega mu numba za Yehowa. 14 Nu naketwide musumbo wane w'ibili wamaninwe “Bibombo” byindi byindi, nilekanukye mugomio gasamba baYuda nu baIsraeli.
15 Yehowa antendile lingo bunee, “Tola lingo bikagi bya mulangi wa bukongolo. 16 Kubuno nkabika mulangi mu kisi utakalanga bazimina, aba ntakalonda babo babalanganizibwe, aba ntakalonga zezo wabelekile, aba ntakalisia wozo guli na byulu ku mubili, tondo akalia misuna za mikoko zanona nu kutikya byondo byazo.
17 Kabebe ku mulangi kikongolo, ukusiga kibombo! Mwene wa nganda wasumite kuboko kwage nu ku liso lyage lya seidume! Kuboko kwage kukuoma! Nu liso lyage lya ku seidume lyazibwe nunsania!”