10
1 Segazi Yehowa mbula mu nkungu za kuyika masoa; Yehowa u gukukita bimpa byalokezye mbula. Akukasa nkungu za mbula ku bantu, nu ku biyikanwa bya masoa ku bansania. 2 Tondo tulaga tukutenda buza, nu bagila bakumona tulolesio twa buza, nu bakusambala ndozi za buza, nu bakubibya na bwengelezi. Ku kabamba kakano bantu bane bakutingatinga mu nzila zabo anga mikoko. Beli na tubebe, kubuno lebelebe takuli mulangi.
3 Yehowa akutenda bunee: “Bongoa bwane buli bukali ku balangi, nu nazikye bilimba bya mpene. Yehowa, Mwiya Mayombo, alange kibombo kyage, u bantu ba Yuda. Abakite anga farasi zage nsoga za bita. 4 Mu Yuda mwatuke ikozi lya kapindapinda, nu mweli mwatuke musumali wa hema, nu mweli mwatuke bunkanda bwa bita, nu mweli mwatuke bangati bansania. 5 Nu bamozi babe anga mapuka, banyante basombi babo mu bisogo mu nzila, nu beitane bita, kubuno Yehowa eli gamozi nabo, nu beitie babakami ba farasi na nsoni.
6 Nu nabike magala ku baYuda, nu nonie baYosefu. Nabasubye, kubuno nabakwila kyombo. Babe anga banteisile, kubuno nne nili Yehowa, Kalaga wabo, nu nne nabeitabile. 7 Nu baEfuraimu babe anga mapuka, nu mitima zabo zabogeboge anga zakaswa maku. 8 Nabalalukile nu kubakundamania; lebelebe nabakulule, nu babe beingi nunse anga bubabezaga. 9 Aba nababalanganizie anga mbuto mu bilongo, nu bankengele mu bisi bya bulazi, nu beikale na bana babo, nu basubye. 10 Nabasubye lingo kutuka ku kisi kya Misri, nu kubakundamania kutuka ku Asuria; nabasondelezie ku Gileadi nu Lebanoni, nu takwabe kiziki kyakuka kubeli. 11 Nu batinge mu kitatenge kya tubebe, nu kulibula bimpumi bya kitatenge, nu kukamia maziba mansania ma Nili, nu lwikotio lwa Asuria lwagezibwe, nu musumbo wa bukota watuke ku Misri. 12 Nu magala mabo mabe mu Yehowa, nu balame mu izina lyage. Bubo u bwatenda Yehowa.”