9
1 Iyuki lya Yehowa lili ku kisi kya Hadiraki nu lyasigala ga Damasiki; kubuno meiso ma Yehowa makulola ku bantu bansania nu ku bikanga binsania bya Israeli, 2 nu ku Hamati guli na mwaga wage ku mwaga wa Israeli, nu ku Tiro nu Sidoni, kubuno beli na menge mingi. 3 Tiro eiyobakide kiziki kyalanga kya mukolo wa magala, nu akundamanizie feza anga mukungu nu olo anga bisogo bya mu nzila. 4 Lola Mukota atikye bikulo byage, nu kubigia magala mage mu kitatenge; a kyazike na keiya. 5 Askeloni amone, nu akue boba; Gaza lingo agilimine na lubaba nunse; nu Ekuroni lingo, kubuno kilemanizio kyage kyakue. Nu Gaza aziminwe na mukota wage, nu Askeloni ntabe na bantu. 6 Nu bageni beikale ku Asidodi, nu nne nise bulazi lwikotio lwa baFilistini. 7 Nu natikye mikila mu tunua twabo, nu bubi gasamba meinyo mabo. Nu babo basigala babe bantu ba Kalaga weitu, nu babe banene munkatini mwa Yuda, nu ba ku Ekuroni babe anga buli ba ku Yebusi. 8 Tondo nalange numba zane na banyagi. Nu musungia ntatinge lingo munkatini mwa bantu bane, kubuno nkubalangaga.
9 Ee mukinga wa Sayuni, bogaboga nunse! Ee mukinga wa Yerusalema, laluka na kyelele! Lola, mwangati wobe avwa kuguli; eli wisanana, nu eli na lonio, abota, nu abakama ga mpunda, nu kyana kya mpunda. 10 Nu natikye tuyanga ku Efuraimu, nu farasi za bita ku Yerusalema, nu bunkanda bwa bita bwakalike. Asambale bubobelelo ku baBilongo, nu bwangato bwage bwabe kutuka kitatenge aaba nu ku kitatenge, nu kutuka ku Luuzi Furati aaba nu ku kuzinda kwa kisi.
11 Nu kumuli, ku kabamba ka mikila z'idagano lyane n'inyu nakandule bakandwa beinyu kutuka mu muzinga uteli na mazi. 12 Inyuwe bakandwa ba kilemanizio, galukazi ku itinino lyeinyu lya magala; nu lelo nasambala buno namusubizie mambizi mabili. 13 Kubuno nagondile Yuda anga bunkanda bwane, nu nabikile Efuraimu anga musungu, nu Nne nayukye bana bobe, ee Sayuni, ku bana bobe, ee Ugriki; nakukite anga mwene wa nganda wa mukoloboyo.
14 Nu Yehowa amoneke kubeli, nu musungu wage wakelime anga mukenzi. Nu Yehowa, Mwiya Mayombo, ide monze; nu ende mu bisoa byatuka ku lulenge lwa kwidume. 15 Yehowa, Mwiya Mayombo abalange. Nu babigie nu kukinda na makozi meiswa, nu banue nu kukita kazege anga bakua na maku, nu beiyale anga nyungu, anga mega ma kayulo.