8
1 Iyuki lya Yehowa, Mwiya Mayombo, lyavule kundi bunee: 2 “Yehowa, Mwiya Mayombo, atenda bunee: ‘Namona lugi lunene ku Sayuni, namona lugi ku kabamba kago na bongoa bukali.’ 3 Yehowa atendile bunee: ‘Nasubye ku Sayuni nu kwikala ku Yerusalema; mu nkungu zezo Yerusalema wamanwe “Mwino wa Bulili” nu mwiduko wa Yehowa, Mwiya Mayombo, wamanwe “Mwiduko Wasililila.”’ 4 Yehowa, Mwiya Mayombo, atendile bunee: ‘Bakulu ba bamulume nu ba bakikulu beikale lingo mu nzila za Yerusalema, na muntu na muntu na musumbo wage mu kuboko, kubuno bindi byage bili byingi. 5 Nu nzila za mwino ziyale na basikila nu bakinga, bayane mu nzila zago.’ 6 Yehowa, Mwiya Mayombo, atenda bunee: ‘Ku bindi bibyo bubuno bwangamie babo basigede ku bantu babano ba Kalaga, ndi bwabe bunene ku meiso mane?’ Bubo u bukubuzia Yehowa, Mwiya Mayombo. 7 Yehowa, Mwiya Mayombo, atenda bunee: ‘Lola, nonie bantu bane kutuka ku kisi kya kuntata nu kutuka ku kisi kya kunsi; 8 Nu nabasubye kwikala mu Yerusalema; nu babe bantu bane, nu nabe bulili nu kwisanana nu Kalaga wabo.’
9 Yehowa, Mwiya Mayombo, atenda bunee: ‘Inyuwe bakungwa ku bitondo bibino kutuka ku tunua twa balengania babezaga gago mu nkungu za kukitwa kibanza kya numba za Yehowa, Mwiya Mayombo, maboko meinyu mabe na magala buno numba zobakwe. 10 Kubuno lwabusio lwa bindi bibyo takwabezaga lukalilo aba ku muntu aba ku nyama, nu bubobelelo tabwabezaga ku wozo mwiya kutuka nu kwingila ku kabamba ka mwiti, kubuno nabikile muntu na muntu ku munyage. 11 Tondo nsyakitile basigede ku bantu babano anga bunabakitile wakalazi.’ Bubo u bwatenda Yehowa, Mwiya Mayombo. 12 ‘Kubuno mbuto zase busoga, nu miti zakolame biguma byazo, nu kisi kyasie matubulo makyo, nu igulu likulokya bususuli. Nne nakase bibino binsania ku bantu babano basigala kubiyana. 13 Anga bumwabezaga kilongo kya kuswililwa munkatini mwa bilongo, ee Yuda nu Israeli, ububo namwonie nu mwabe kalolesio ka mponga; tamukue boba, tondo maboko meinyu mabe na magala.’
14 Kubuno Yehowa, Mwiya Mayombo, atenda bunee: ‘Anga bunakengede kumukitila bindi byanongezie basoinyuwe,’ u bwatenda Yehowa, Mwiya Mayombo, 15 ‘ububo nakengede bindi bibino kukitila lingo Yerusalema nu numba za Yuda mponga; tamukue boba. 16 Bibino u bitondo bimwakite: muntu na muntu atende bulili ku munyage, nu sungiazi lusungio lwa bulili nu lwa bubobelelo ga nusu zeinyu za milondo. 17 Nu muntu ntakengele mu mutima wage bubi ku munyage, nu tamulumbile buza. Kubuno nkusomba bitondo bibino.’ Bubo u bwatenda Yehowa.”
18 Iyuki lya Yehowa, Mwiya Mayombo lyabasile kundi bunee: 19 “Yehowa, Mwiya Mayombo, atenda bunee: ‘Kwikanda idia ku mwezi w'inazi, nu ku mwezi w'itano, nu ku mwezi wa mutubakamo, nu ku mwezi w'ikumi, kwabe bindi bya mbogimbogi nu kyelele nu bisagulo bya mbogimbogi ku baYuda. Ku kabamba kakano tundazi bulili nu bubobelelo.’
20 Yehowa, Mwiya Mayombo, atenda bunee: ‘Bantu beingi ba bilongo byingi nu ba ku miino mingi bakavwa. 21 Nu bantu ba ku mwino umozi bende ku ungo, nu batende bunee: “Twendazi lubilo kusega ku Yehowa nu kulonda Yehowa, Mwiya Mayombo. Nnenyene nkwenda.” 22 Nu bantu beingi nu bilongo bya magala byavwe ku Yerusalema kulonda Yehowa, Mwiya Mayombo, nu kusega mponga za Yehowa.’
23 Yehowa, Mwiya Mayombo, atenda bunee: ‘Kwabe mu busi bubo bantu ikumi ba mitendezi insania, nu ba bilongo bakate mupimbo wa nsulu za muYuda, nu batende bunee: “Twende gamozi n'inyu, kubuno tungule buno Kalaga eli gamozi n'inyu.”’”