7
1 Mu kindi kya binazi kya mwezi wa mubula, u mwezi ukumanwa Kisileu, wa mwaka w'inazi a wa mukota Dario, iyuki lya Yehowa lyavule ku Zekaria. 2 Bantu ba ku Beteli basingile Sarezeri nu Regemu-Meleki gamozi na bango bantu kusega ku Yehowa, 3 nu kubuzia basankoga babezaga mu numba za Yehowa, Mwiya Mayombo, nu balengania bage bunee: “Ndi bwatunganana kukanda kulia mu mwezi w'itano anga bunakitile ku zezo myaka mingi?” 4 Nkungu zezo iyuki lya Yehowa, Mwiya Mayombo, lyavule kundi bunee: 5 “Buzia bantu bansania ba kisi nu basankoga bunee: ‘Gamwikandile kulia ku mwezi w'itano nu wa mutubakamo ku myaka makumi mutubakamo, ndi kwabezaga ku kabamba kane ku mwikandile idia? 6 Nkungu zimwalide nu kunua, ndi tamwabezaga mukulia nu kunua ku kabamba keinyu mubenyene? 7 Ndi lilino talyabezaga iyuki lyasambalile Yehowa ku balengania ba wakalazi, gabezaga Yerusalema nu miino zabezaga bwigi zabezaga na bubobelelo nu busoga, nu kibe kya lulenge lwa kwidume nu kibe kya kunsi byabezaga na beikalaga mubyo?’”
8 Nu iyuki lya Yehowa lyavule lingo ku Zekaria, lyatendile bunee: 9 “Yehowa, Mwiya Mayombo, atenda bunee: ‘Sungiazi lusungio lwisanana, nu lolesiazi mponga nu kyombo, muntu na muntu ku mubuto wage; 10 nu tamusungie musigala aba nkubi aba mugeni aba muzambi; nu muntu umozi munkatini mweinyu ntakengele mu mutima wage bubi ku mubuto wage.
11 Tondo basombile kungwa, bagalukizye migongo, bazibile matuzi mabo buno tabongwe. 12 Ee, bakitile mitima zabo anga ikozi ibibu, tabongule mulembe nu bitondo bya Yehowa, Mwiya Mayombo, byasingile na Muuza wage ku kuboko kwa balengania ba wakalazi. Ku kabamba kakano, Yehowa, Mwiya Mayombo ongilwe nunse.’
13 Yehowa, Mwiya Mayombo, atenda bunee: ‘Nu ganabamanine, tabazigile kungwilila; ububo gabalilile, nu nne nsyungwilide. 14 Nababalanganizie na lumpumpu lwa kutimba munkatini mwa bilongo binsania, mubyo babezaga bageni. Kisi kyabezaga makindu kumbusa kwabo, buno takwatingile muntu aba kusubya. Ububo bubabigizie kisi kisoga kibe bukindu.’”