6
1 Nalambwide lingo meiso, nu namonine tuyanga tunazi twatuka munkatini mwa miduko ibili, u miduko za nsubi. 2 Kayanga katangi kabezaga na farasi zakisimana, nu kayanga ka tubili farasi zina, 3 nu kayanga ka tusatu farasi zenga, nu kayanga ka tunazi farasi z'idangi lya lwito; farasi insania zabezaga na magala nunse. 4 Nu nabuzizie mwanzelo watendaga na nne bunee: “Mukota wane, tutuno tuli tukizi?” 5 Nu anakwide bunee: “Zeno zili myuza inazi za kwigulu, zikutuka ku kiziki kyazo kya kwemana lwabusio lwa Mukota wa kisi kinsania. 6 Farasi zina zikwenda ku lulenge lwa kwikazi lwa kisi; farasi zenga zikwenda ku lulenge lwa kunsi; nu z'idangi lya lwito zikwenda ku lulenge lwa kwidume lwa kisi.”
7 Gendile farasi za magala, zasasizie kwenda kunsania mu kisi. Nu Yehowa azakwide bunee: “Endazi kunsania mu kisi!” Ububo zendile mu kisi kinsania.
8 Nu Yehowa antendile bunee: “Lola zezo zenda ku lulenge lwa kwikazi lwa kisi zabobelezizie mutima wane mu kikyo kisi.”
9 Iyuki lya Yehowa lyambaside, lyatendile bunee: 10 “Tola nkaso ku babo beigizibwe, u Heldai, nu Tobia nu Yedaya, babasa kutuka ku kisi kya Babeli, nu wingile busi bubo mu numba za Yosia, mwana wa Zefania. 11 Tola feza nu olo nu kita nazo nkumbu nu kuzibika ku itoe lya Yosua, mwana wa Yozadaki, sankoga munene. 12 Mubule buno Yehowa, Mwiya Mayombo, atenda bunee: ‘Lola kuli muntu izina lyage Lutabi; amone magala kutuka ku kiziki kyage, nu obake numba za Yehowa. 13 Akobaka numba za Yehowa, akukilwe na lutanuno, nu eikale nu kwangata ga kisumbi kyage kya bukota, nu abe sankoga ga kisumbi kyage kya bukota. Nu kwabe mugomio musoga gasamba bibyo bibili.’
14 Nkumbu za lutanuno zibe kakengelezio mu numba za Yehowa ka Heldai, a nu Tobia nu Yedaya nu Heni, mwana wa Zefania.”
15 Babo beli kulazi bakavwa kutozia numba za Yehowa, nu mwamenye buno Yehowa, Mwiya Mayombo, ansingile kumuli. Bibino byabase ndi mukwanza lebelebe Yehowa, Kalaga weinyu.